TDP Leaders on YSRCP Govt Advertising Scam: సమాచార పౌరసంబంధాల శాఖ ద్వారా ఇచ్చిన ప్రకటనల కుంభకోణంపై హౌస్ కమిటీ వేయాలని శాసనసభలో టీడీపీ సభ్యులు డిమాండ్ చేశారు. 850 కోట్ల రూపాయల మేర ప్రకటనల్ని 2019–24 మధ్య జారీ చేశారని, ఇందులో పక్షపాత ధోరణి ఉందని టీడీపీ సభ్యులు నక్కా ఆనంద్ బాబు, ధూళిపాళ నరేంద్ర, తెనాలి శ్రవణ్కుమార్ డిమాండ్ చేశారు. శాసనసభలో ప్రశ్నోత్తరాల సమయంలో ఈ అంశాన్ని సభ్యులు లేవనెత్తారు.
ఏబీసీ సర్క్యులేషన్ రిపోర్టుకు విరుద్ధంగా గత ప్రభుత్వ హయాంలో సమాచార పౌర సంబంధాల శాఖ అధికారులు వ్యవహరించారని ఆరోపించారు. ఈ నేపథ్యంలో దీనిపై చర్యలు తీసుకోవాలని డిమాండ్ చేశారు. ప్రతి 15 రోజులకూ తమకు కావాల్సిన పత్రికలు, మీడియాలో నిబంధనలకు విరుద్ధంగా ప్రకటనలు ఇచ్చి అనుచిత లబ్ధి కలిగించారని వ్యాఖ్యానించారు. ఈ విషయంలో ప్రభుత్వం, పాలకులు మారినా అధికారులు మాత్రం మారలేదని ఆక్షేపించారు. ప్రకటనలకు సంబంధించిన చెల్లింపుల్లో పక్షపాత ధోరణి ఉందని వ్యాఖ్యానించారు. గత ముఖ్యమంత్రి జగన్, ఆయన సతీమణి ఆధ్వర్యంలో నడిచిన సాక్షికి పెద్ద ఎత్తున ప్రకటనల డబ్బులు చెల్లించారని సభ్యులు ఆరోపించారు. సాక్షి పత్రికకు అనుచిత లబ్ధిచేకూరేలా చేయటంపై విచారణ కమిటీ వేస్తామని సభ్యుల ప్రశ్నలకు మంత్రి కొలుసు పార్థసారథి సమాధానమిచ్చారు.