KTR Fires on Congress Government :కాంగ్రెస్ చెప్పిన మార్పంటే కరెంటు కోతలు, ఐటీ కంపెనీల తరలింపేనా అని మాజీ మంత్రి కేటీఆర్ ప్రశ్నించారు. ఎమ్మెల్సీ ఎన్నికల ప్రచారంలో భాగంగా వరంగల్, హనుమకొండలో జరిగిన పట్టభద్రుల సమావేశాల్లో ఆయన పాల్గొన్నారు. రైతు బంధు డబ్బులు నాట్ల సమయానికి కాకుండా ఓట్ల సమయానికే పడుతున్నాయని ఆరోపించారు. కాంగ్రెస్ పార్టీ అధికారంలోకి వచ్చి ఆరు నెలలైనా రాష్ట్రంలో రుణమాఫీ చేయలేదని ఎద్దేవా చేశారు.
అన్ని వడ్లకు రూ.500 బోనస్ ఇస్తామని చెప్పి రైతులను కాంగ్రెస్ ప్రభుత్వం మోసం చేసిందని కేటీఆర్ విమర్శించారు. పట్టభద్రుల ఎమ్మెల్సీగా ప్రశ్నించే గొంతు కావాలో, యూట్యూబ్ను అడ్డుపెట్టుకొని దందా చేసే వ్యక్తి కావాలో గ్రాడ్యుయేట్స్ తేల్చుకోవాలని అన్నారు. మోసాల పరంపర కొనసాగిస్తున్న కాంగ్రెస్కు ఎమ్మెల్సీ ఎన్నికల్లో బుద్ధి చెప్పాలని కేటీఆర్ పిలుపునిచ్చారు.
"ఇక్కడేమో గోల్డ్ మెడలిస్ట్ ఉన్నాడు. కాంగ్రెస్లోనేమో గోల్డ్ ఎత్తుకుని పోయేవాడు ఉన్నాడు. చదువుకున్నవారి ఎలాంటి వ్యక్తి ప్రతినిధిగా ఉండాలి. ఒక సామాన్య రైతు కుటుంబం నుంచి వచ్చాడు. పట్టభద్రుల ఎమ్మెల్సీగా ప్రశ్నించే గొంతు కావాలో, యూట్యూబ్ను అడ్డుపెట్టుకొని దందా చేసే వ్యక్తి కావాలో గ్రాడ్యుయేట్స్ తేల్చుకోవాలి. కాంగ్రెస్ చెప్పిన మార్పంటే కరెంటు కోతలు, ఐటీ కంపెనీల తరలింపేనా? రైతు బంధు డబ్బులు నాట్ల సమయానికి కాకుండా ఓట్ల సమయానికే పడుతున్నాయి."- కేటీఆర్, బీఆర్ఎస్ కార్యనిర్వాహక అధ్యక్షుడు
రాకేశ్ రెడ్డి ప్రస్థానం : నల్గొండ-ఖమ్మం-వరంగల్ పట్టభద్రుల ఎమ్మెల్సీ ఉప ఎన్నిక బీఆర్ఎస్ పార్టీ అభ్యర్థిగా ఏనుగుల రాకేశ్ రెడ్డి పోటీ చేస్తున్నారు. ఈ మేరకు ఆయన నామినేషన్ కూడా దాఖలు చేశారు. ఉన్నత విద్యావంతుడైన ఏనుగుల రాకేశ్రెడ్డి స్వస్థలం హనుమకొండ జిల్లా హసన్పర్తి మండలం వంగపహాడ్. బీజేపీ ఉన్నప్పుడు ఫైర్ బ్రాండ్గా పేరు తెచ్చుకున్నారు. నగరంలో అనేక సమస్యలపై పోరాటం చేశారు. పలువురి పేర్లను బీఆర్ఎస్ పార్టీ పరిశీలించగా విద్యావంతుడైన రాకేశ్ రెడ్డి వైపే అధిష్ఠానం మొగ్గు చూపింది.
ఉపఎన్నికల ఎలా వచ్చింది : 2021 మార్చిలో పల్లా రాజేశ్వర్ రెడ్డి వరంగల్-ఖమ్మం-నల్గొండ స్థానానికి ఎమ్మెల్సీగా ఎన్నిక అయ్యారు. ఆ పదవి కాలం 2027 మార్చి వరకు ఉంది. అయితే అంతలోనే ఆయన 2023 అసెంబ్లీ ఎన్నికల్లో జనగామ శాసనసభ్యుడిగా పోటీ చేయడంతో ఆ పదవికి రాజీనామా చేయాల్సిన పరిస్థితి వచ్చింది. పల్లా రాజేశ్వర్ రెడ్డి రాజీనామాతో ఆ స్థానానికి కేంద్ర ఎన్నికల సంఘం మే 27న పోలింగ్ నిర్వహించడానికి ఏర్పాట్లను చేసింది. దీనికి సంబంధించిన ఓట్లు లెక్కింపు మాత్రం జూన్ 5న ఉండగా అదే రోజు ఫలితాలు ప్రకటించనున్నారు.
కాంగ్రెస్ మార్పంటే కరెంటు కోతలు, ఐటీ కంపెనీల తరలింపు : కేటీఆర్ (ETV Bharat) లోక్సభ పోరు ముగిసింది - ఇక పట్టభద్రుల ఎమ్మెల్సీ ఎన్నికపై ప్రధాన పార్టీల గురి - Telangana Graduate MLC By Election
పట్టభద్రుల ఎమ్మెల్సీ ఉపఎన్నిక - ఫుల్ స్వింగ్లో ప్రచారం - Graduate MLC BY Campaign in TS
