Etela Rajender Comments on Congress: వచ్చే లోక్సభ ఎన్నికల్లో మెదక్ నియోజకవర్గంలో కమలం పాటి వికసించాలని బీజేపీ జాతీయ కార్యవర్గ సభ్యుడు ఈటల రాజేందర్(Etela Rajender) అన్నారు. దేశ ఖ్యాతిని ప్రపంచం నలుమూలల వ్యాప్తి చేసిన వ్యక్తి ప్రధాని నరేంద్ర మోదీ అని తెలిపారు. మెదక్ పార్లమెంట్లోని బీజేపీ విస్తృతస్థాయి కార్యకర్తల సమావేశంలో ఆయన పాల్గొన్నారు. పార్టీ కార్యకర్తలు నేరుగా కలిసి కేంద్రం ప్రభుత్వం చేపట్టిన పనులను తెలియజేయాలని ఈటల రాజేందర్ అన్నారు. ప్రజా సమస్యలపై పోరాటం చేసిన వారికి ప్రజలు ఓటు ద్వారా మద్దతు తెలుపుతారని ఆశాభావం వ్యక్తం చేశారు. కేంద్రంలో మళ్లీ తమ పార్టీని గెలిపించాల్సిన ఆవశ్యకతను కార్యకర్తలకు వివరించారు.
లోక్సభ ఎన్నికల్లో ఎవరితోనూ పొత్తులు ఉండవు : కిషన్‌రెడ్డి
BJP Followers Meeting at Medak: ప్రపంచంలో ఆర్థికంగా వెనకబడిన దేశాల్లో ఒకటిగా ఉన్న భారతదేశాన్ని ఐదో స్థానంలో నిలబెట్టిన ఘనత నరేంద్ర(Narendra Modi) మోదీదే అని ఈటల కొనియాడారు. బీజేపీ ఎప్పుడు ఇతర మతాలను కించపరిచే విధంగా మాట్లాడలేదని పేర్కొన్నారు. హిందూ మత అస్థిత్వాన్ని, రావాల్సిన హక్కుల కోసం పోరాడిందే తప్పా ఏ మతానికి వ్యతిరేకం కాదని స్పష్టం చేశారు. వందల సంవత్సరాల క్రితం ఉన్న దేవాలయాన్ని సుప్రీంకోర్టు ఆదేశాల మేరకు నిర్మించిన ఘనత నరేంద్ర మోదీదని కొనియాడారు.