కేసీఆర్​ బస్సు యాత్ర కాదు, మోకాళ్ల యాత్ర చేసినా ప్రజలు నమ్మరు : లక్ష్మణ్ - LAXMAN ON KCR BUS YATRA

BJP Laxman Slams KCR : కేసీఆర్​ బస్సు యాత్ర కాదు, మోకాళ్ల యాత్ర చేసినా ప్రజలు నమ్మే పరిస్థితుల్లో లేరని బీజేపీ ఎంపీ లక్ష్మణ్ అన్నారు. తెలంగాణలో జరగబోయే లోక్​సభ ఎన్నికల్లో 10 నుంచి 12 సీట్లు గెలుస్తామని ఆశా భావం వ్యక్తం చేశారు.

BJP MP Laxman fires On BRS And Congress Parties : కేసీఆర్​ ఎలాంటి యాత్రలు చేసినా ప్రజలు నమ్మే పరిస్థితిలో లేరని బీజేపీ ఎంపీ లక్ష్మణ్​ వ్యాఖ్యానించారు. పార్టీ రాష్ట్ర కార్యాలయంలో మాట్లాడిన ఆయన తెలంగాణలో 10 నుంచి 12 స్థానాల్లో బీజేపీ గెలుస్తుందని ఆశాభావం వ్యక్తం చేశారు. రాష్ట్రంలోబీజేపీ అభ్యర్థులకు రోజురోజుకు ఆదరణ పెరుగుతోందని, దాన్ని జీర్ణించుకోలేక దుష్ప్రచారం చేస్తున్నారని విమర్శించారు. బీజేపీపై కాంగ్రెస్​, బీఆర్​ఎస్​ నేతలు అవాస్తవాలు ప్రచారం చేస్తున్నారని మండిపడ్డారు.

"వికసిత్ భారత్ తరహాలో వికసిత్ తెలంగాణ పత్రాన్ని త్వరలోనే విడుదల చేస్తాం. మా ప్రణాళికను స్పష్టంగా ప్రజల ముందు ఉంచుతాం. దేశ వ్యాప్తంగా 102 స్థానాలకు ఎన్నికలు పూర్తయ్యాయి. 21 రాష్ట్రాల్లో ఓటింగ్ సరళి చూస్తుంటే మోదీ మేనియా స్పష్టంగా కనిపిస్తోంది. మహిళలు పెద్ద సంఖ్యలో వచ్చి ఓట్లు వేశారు. 63 శాతం ఓటింగ్ జరిగింది. శుక్రవారం జరిగిన ఓటింగ్ లో 50 శాతానికి పైగా బీజేపీ విజయం కనిపిస్తోంది తెలంగాణలో 12 సీట్లు గెలుస్తామనే నమ్మకం కలుగుతోంది."- లక్ష్మణ్​, బీజేపీ ఎంపీ

కాంగ్రెస్‌ ఎమ్మెల్యేలు తమతో టచ్‌లో ఉన్నారని కేసీఆర్ అన్నారని కానీ ఆయన అన్న 24 గంటల్లోనే ప్రకాష్‌ గౌడ్‌ వెళ్లి రేవంత్‌రెడ్డిని కలిశారని లక్ష్మణ్ అన్నారు. బీజేపీని రెచ్చగొట్టేలా కేసీఆర్‌ మాట్లాడుతున్నారని ఆగ్రహం వ్యక్తం చేశారు. నవంబరులో ఎన్నికలు వస్తాయంటున్న కేసీఆర్ మాటలకు ప్రజలు నవ్వుకుంటున్నారని ఎద్దేవా చేశారు. అధికారం లేకుండా కేసీఆర్​, కేటీఆర్​ ఉండలేకపోతున్నారని అన్నారు.

"మోదీ చరిష్మాను బీఆరఎస్, కాంగ్రెస్ జీర్ణించుకోలేకపోతున్నాయి 20మంది కాంగ్రెస్ ఎమ్మెల్యే లు మాతో టచ్​లో ఉన్నారని కేసీఆర్ అంటున్నారు. ఆలోపే ప్రకాష్ గౌడ్ కాంగ్రెస్ పార్టీలోకి వెళ్లారు. అభద్రతా భావనలో రేవంత్ రెడ్డి కనిపిస్తున్నారు. రేవంత్ రెడ్డి పాలన ఓటమికి దారులు వెతుక్కుంటున్నట్టు ఉంది. నవంబర్, డిసెంబర్​లో ఎన్నికలు వస్తాయని, మళ్లీ బీఆర్ఎస్​ అధికారంలోకి వస్తుందని కేసీఆర్ జోస్యం చెబుతున్నారు." అని ఎంపీలక్ష్మణ్​ అన్నారు.

ప్రజల ఆలోచనలను డైవర్ట్​​ చేసేందుకు బీఆర్ఎస్, కాంగ్రెస్​లు మైండ్​ గేమ్​ ఆడుతున్నాయని ఎంపీ లక్ష్మణ్ విమర్శించారు. కేసీఆర్​, కేటీఆర్​కు అహంకారం తగ్గలేదని అన్నారు. కేసీఆర్​ బస్సు యాత్ర కాదు, మోకాళ్ల యాత్ర చేసినా ప్రజలు నమ్మే పరిస్థితుల్లో లేరని పేర్కొన్నారు. పదేళ్ల అవినీతి వైఫల్యాలతో విసుగు పుట్టి కేసీఆర్​ను ప్రజలు ఇంటికే పరిమితం చేశారని వ్యాఖ్యానించారు. దేశ వ్యాప్తంగా కాంగ్రెస్ కనుమరుగయ్యే పరిస్థితుల్లో ఉందని, బీఆర్​ఎస్​ పార్టీకి భవిష్యత్తు లేదని జోస్యం చెప్పారు. ఉజ్వల భవిష్యత్తుతో బీజేపీ దూసుకుపోతుందన్న లక్ష్మణ్, పార్లమెంట్​ అభ్యర్థుల్లో ఎలాంటి మార్పు ఉండదని స్పష్టం చేశారు. తెలంగాణ ప్రచారానికి ఏపీ కూటమి నేతలు ఎవరూ రారని వివరించారు.