NDA Target 40 Seats Bihar : ల‌క్ష్యం పెద్ద‌దిగా ఉన్న‌ప్పుడు దానిని ఛేదించే వ్యూహాలు కూడా సుదీర్ఘంగానే ఉంటాయి. ఇప్పుడు ఇదే సుదీర్ఘ ల‌క్ష్యాల‌తో కేంద్రంలోని భారతీయ జ‌న‌తా పార్టీ అడుగులు వేస్తోంది. ఇప్పటికే రెండు సార్లు కేంద్రంలో అధికారం ద‌క్కించుకున్న బీజేపీ, త్వరలో జరగనున్న పార్ల‌మెంటు ఎన్నికల్లో విజ‌యం ద‌క్కించుకునే దిశ‌గా అడుగులు ముమ్మ‌రం చేసింది. ఒక్క విజ‌య‌మే కాదు ఏకంగా 400 పైచిలుకు పార్ల‌మెంటు స్థానాల్లో విజ‌యం ద‌క్కించుకోవాల‌ని లక్ష్యంగా నిర్దేశించుకుంది.
అయితే ఈ ల‌క్ష్య ఛేద‌న‌కు సంబంధించి చేయాల్సినవ‌న్నీ పూర్తి చేసుకున్న కేంద్రంలోని న‌రేంద్ర మోదీ ప్రభుత్వం, 2029లో వ‌చ్చే ఎన్నికలకు సంబంధించి కూడా గ్రౌండ్ వ‌ర్క్ ప్రారంభించేసింది. మొత్తంగా 2014, 2019 ఎన్నికల్లో సాధించిన విజ‌యాల‌తో సంతృప్తి చెంద‌కుండా ప్ర‌స్తుత ఏడాది జరగనున్న ఎన్నిక‌ల‌తో పాటు 2029లో జ‌ర‌గ‌బోయే ఎన్నికలకు కూడా ప‌క్కా ప్లాన్‌ను రెడీ చేసుకుని రంగంలోకి దిగింది. అందులో భాగంగా 40 లోక్సభ సీట్లు ఉన్న బిహార్పై ప్రత్యేక శ్రద్ధ పెట్టింది. తమను గద్దె దించాలని నిర్ణయించుకుని ఏర్పడిన విపక్షాల కూటమికి గట్టి షాక్ ఇచ్చి జేడీయూతో కలిసి మళ్లీ బిహార్ పీఠాన్ని కైవసం చేసుకుంది.
మహాగఠ్బంధన్తో కలిసి ఏడాదిన్నర క్రితం ప్రభుత్వాన్ని ఏర్పాటు చేసిన జేడీయూ అధినేత నీతీశ్ కుమార్ తిరిగి ఎన్డీఏ గూటికి చేరిపోయారు. బీజేపీతో కలిసి మరోసారి ప్రభుత్వాన్ని ఏర్పాటు చేశారు. ఆదివారం సాయంత్రం ముఖ్యమంత్రిగా ప్రమాణ స్వీకారం చేశారు. అయితే ఎన్డీఏలో జేడీయూ చేరిక ఇరుపార్టీలకు లాభం చేకూరుతుందని రాజకీయ విశ్లేషకులు చెబుతున్నారు. ఇక బిహార్లో గతసారి 39 లోక్సభ స్థానాలను కైవసం చేసుకున్న ఎన్డీఏ, ఈసారి 40 స్థానాలను టార్గెట్గా పెట్టుకుంది.
"నీతీశ్తో బీజేపీ పొత్తు రాష్ట్రానికి మేలు చేస్తుంది. లోక్సభ ఎన్నికల్లో బిహార్లో ఎన్డీఏ క్లీన్ స్వీప్ చేస్తుంది. మొత్తం 40 సీట్లు గెలుచుకుంటాం. రాష్ట్రాన్ని కొత్త ప్రభుత్వం ఉజ్వల్ బిహార్గా మార్చుతుంది. ఎన్డీఏ అధికారంలో ఉన్నప్పుడే బిహార్ ప్రజలు అభివృద్ధి పరంగా లాభపడ్డారు."
- జేపీ నడ్డా, బీజేపీ జాతీయ అధ్యక్షుడు
2020 జరిగిన బిహార్ అసెంబ్లీ ఎన్నికల్లో ఎన్డీఏ 125 సీట్లను గెలుచుకుంది. మహాగఠ్బంధన్ 110 సీట్లు గెలుచుకోగా ఇతరులు 8స్థానాలను కైవసం చేసుకున్నారు. నీతీశ్ కుమార్ నేతృత్వంలో ఎన్డీఏ ప్రభుత్వాన్ని ఏర్పాటు చేసింది. ఇక అంతకుముందు లోక్సభ ఎన్నికల్లో ఎన్డీఏ కూటమి 39 సీట్లు గెలుచుకోగా మహాగఠ్ బంధన్ ఒకే ఒక్క ఎంపీ సీటు గెలుచుకుంది. ఇప్పుడు మరోసారి లాలూ ప్రసాద్ యాదవ్ నేతృత్వంలోని ఆర్జేడీకి మరోసారి లోక్సభ ఎన్నికల్లో షాక్ ఇవ్వాలని బీజేపీ నిర్ణయించుకుంది.