Bangaladumpa Mudda Kura Recipe in Telugu :ఎక్కువ మంది ఇష్టపడే కూరగాయలలో ఒకటి.. బంగాళదుంప. దీనితో కర్రీ, ఫ్రై, కుర్మా, ఆలూ రైస్, వడ వంటి రకరకాల వంటకాలు ట్రై చేస్తుంటారు. కానీ, కొందరికి ఆలూతో ఎప్పుడూ రొటీన్ కర్రీలే తినడం బోరింగ్గా అనిపిస్తోంది. అలాంటి వారికోసమే ఒక సూపర్ రెసిపీ తీసుకొచ్చాం. అదే.. "బంగాళదుంప ముద్ద కూర". దీన్నే బంగాళదుంపపచ్చిమిర్చి వేపుడు అని కూడా అంటారు. సూపర్ టేస్టీగా ఉండే ఈ కర్రీని నిమిషాల్లో ప్రిపేర్ చేసుకోవచ్చు. అన్నం, చపాతీ ఇలా దేనిలోకైనా ఇది చాలా బాగుంటుంది. ఇంతకీ, ఈ కర్రీ తయారీకి కావాల్సిన పదార్థాలేంటి? ఎలా తయారు చేసుకోవాలో ఇప్పుడు చూద్దాం.
కావాల్సిన పదార్థాలు :
- బంగాళదుంపలు - 3(మీడియం సైజ్వి)
- పచ్చిమిర్చి - తగినన్ని
- ఉల్లిపాయలు - 2(మీడియం సైజ్వి)
- జీలకర్ర - 1 టీస్పూన్
- వెల్లుల్లి రెబ్బలు - 5
- ఉప్పు - రుచికి సరిపడా
- ఆయిల్ - 2 టేబుల్స్పూన్లు
- పోపు గింజలు - 1 టేబుల్స్పూన్ట
- కరివేపాకు - 2 రెమ్మలు
- పసుపు - పావుటీస్పూన్
- ధనియాల పొడి - 1 టీస్పూన్
అన్నం, టిఫెన్స్లోకి సూపర్ కాంబినేషన్ - ఘుమఘుమలాడే "హరియాలీ దమ్ ఆలూ" - నెవ్వర్ బిఫోర్ టేస్ట్!
తయారీ విధానం :
- ముందుగా బంగాళదుంపలను శుభ్రంగా కడిగి సగానికి కట్ చేసుకోవాలి. ఆ తర్వాత వాటిని కుక్కర్లోకి తీసుకొని ముప్పావు కప్పు వాటర్, కొద్దిగా ఉప్పు వేసుకొని మూడు విజిల్స్ వచ్చేంత వరకు ఉడికించుకోవాలి.
- ఇలా బంగాళదుంపలను రెండు ముక్కలు చేసుకొని కుక్కర్లో ఉడికించడం వల్ల అవి త్వరగా, చక్కగా ఉడుకుతాయి.
- అవి ఉడికేలోపు మిక్సీ జార్ తీసుకొని అందులో మీరు తినే కారానికి తగ్గట్లు పచ్చిమిర్చిని ముక్కలుగా తుంపి వేసుకోవాలి. అలాగే జీలకర్ర, వెల్లుల్లి రెబ్బలు, కాస్త ఉప్పు వేసుకొని కాస్త కచ్చాపచ్చాగా గ్రైండ్ చేసుకొని పక్కన ఉంచుకోవాలి.
- ఇప్పుడు కుక్కర్లో ఉడికించుకున్న బంగాళదుంపలను పొట్టు తీసుకొని మీడియం సైజ్ ముక్కలుగా కట్ చేసుకొని పక్కన పెట్టుకోవాలి.
- అనంతరం స్టౌపై కడాయి పెట్టుకొని ఆయిల్ వేసుకోవాలి. నూనె వేడయ్యాక పోపు గింజలు వేసుకొని కాసేపు వేయించుకోవాలి.
- ఆవాలు చిటపడలాడేవరకు వేయించుకున్నాక.. అందులో నాలుగైదు నిలువుగా కట్ చేసుకున్న పచ్చిమిర్చి చీలికలు, పొడవుగా సన్నగా తరుకున్న ఉల్లిపాయముక్కలు వేసుకొని మీడియం ఫ్లేమ్ మీద రెండు నిమిషాల పాటు ఫ్రై చేసుకోవాలి. అలా వేయించుకునేటప్పుడే కరివేపాకు వేసుకోవాలి.
- ఆవిధంగా వేయించుకున్నాక ముందుగా కట్ చేసి పెట్టుకున్న బంగాళదుంప ముక్కలు, పసుపుయాడ్ చేసుకొని కలిపి లో ఫ్లేమ్ మీద ఒకటి లేదా రెండు నిమిషాల పాటు వేయించుకోవాలి.
- అనంతరం ఆ మిశ్రమంలో గ్రైండ్ చేసుకున్న పచ్చిమిర్చి పేస్ట్ వేసుకొని కలిపి పచ్చివాసన పోయేంత వరకు ఫ్రై చేసుకోవాలి. అలా వేయించుకునేటప్పుడు ధనియాల పొడి వేసుకోవడంతో పాటు ఉప్పు సరిపోయిందో లేదో చెక్ చేసుకొని అడ్జస్ట్ చేసుకోవాలి.
- ఆపై మిశ్రమంలో ఎక్కడా పచ్చివాసన లేకుండా ఓ ఐదు నిమిషాల పాటు వేయించుకొని చివరగా కొద్దిగా కొత్తిమీర వేసుకొని కలిపి దింపుకుంటే చాలు. అంతే.. యమ్మీ యమ్మీగా "బంగాళదుంప ముద్ద కూర" రెడీ!
లంచ్ బాక్స్ స్పెషల్ - యమ్మీ యమ్మీ "ఆలూ రైస్" - ఇలా చేస్తే పిల్లలు అస్సలు వద్దనకుండా తినేస్తారు!
