ముఖంపై మొటిమలు, మచ్చలు - చింతపండు ఫేస్​ప్యాక్ ట్రై చేసి చూడండి!

చింతపండు చర్మానికి మేలు చేస్తుందంటున్న నిపుణులు - కాసింత అరటి గుజ్జు కలిపితే సరి!

Ways To Use Tamarind for Skin :చింతపండుతో రసం, చారు, పులిహోర చేస్తుంటాం. ఇలా కూరలకు పుల్లటి రుచిని అందించే చింతపండు సౌందర్య పోషణలోనూ ఉపయోగించుకోవచ్చని నిపుణులు సూచిస్తున్నారు. చింతపండుతో కొన్ని ఫేస్​ప్యాక్స్​ ట్రై చేయడం వల్ల మొటిమలు, మచ్చలు వంటి చర్మ సమస్యల్ని తగ్గించుకోవచ్చని అంటున్నారు. ఆ ఫేస్​ప్యాక్స్​ ఎలా రెడీ చేసుకోవాలో ఇప్పుడు చూద్దాం.

Tamarind (ETV Bharat)

స్కిన్​ గ్లో :

టేబుల్‌స్పూన్ చిక్కటి చింతపండు గుజ్జును తీసుకొని దానికి అరచెంచా పసుపు కలపాలి. ఈ మిశ్రమాన్ని చర్మానికి రాసుకొని 20 నిమిషాల తర్వాత గోరువెచ్చని నీటితో క్లీన్ చేసుకోవాలి. ఈ ఫేస్ ప్యాక్ స్కిన్​ గ్లోని పెంచుతుంది.

బ్లీచ్‌గానూ :

చింతపండు గుజ్జుకు కొద్దిగా అరటిపండు గుజ్జు, శనగపిండిని జత చేసి పేస్ట్‌లా రెడీ చేసుకోవాలి. దీనిని చర్మానికి పట్టించి ఆరిన తర్వాత గోరువెచ్చని వాటర్​తో కడిగేసుకోవాలి. ఈ మిశ్రమం బ్లీచింగ్ ఏజెంట్‌లా పనిచేసి చర్మాన్ని క్లీన్​ చేస్తుంది.

Tamarind Paste (ETV Bharat)

స్క్రబ్‌గా :

చింతపండు గుజ్జును కొద్దిమొత్తంలో తీసుకొని దానికి టేబుల్‌స్పూన్ నిమ్మరసం, చెంచా పంచదార, అరచెంచా బేకింగ్ సోడా కలపాలి. ఈ మిశ్రమంతో శరీరాన్ని మృదువుగా మర్దన చేసుకొని 15 నిమిషాల తర్వాత వేడినీటితో స్నానం చేయాలి. ఈ మిశ్రమం జిడ్డు చర్మం కలిగిన వారికి, మొటిమల సమస్యతో బాధపడే వారికి బాగా ఉపయోగపడుతుంది.

మొటిమలకు చెక్​!

ముందుగా నిమ్మకాయంత సైజంత చింతపండును తీసుకొని దాన్ని పావుకప్పు వేడినీటిలో వేసి కాసేపు నాననివ్వాలి. తర్వాత పిప్పిని వేరుచేయాలి. ఇందులోంచి టేబుల్ స్పూన్ చిక్కటి గుజ్జును తీసుకోవాలి. దీనికి ఒక టేబుల్​స్పూన్​ ముల్తానీ మట్టి, కొద్దిగా రోజ్‌వాటర్ కలపాలి. ఈ మిశ్రమాన్ని బాగా కలిపి ముఖానికి, మెడకు మాస్క్‌లా అప్లై చేసుకోవాలి. ఓ 15 నిమిషాల తర్వాత చల్లటి నీటితో కడిగేసుకోవాలి. ఈ మిశ్రమాన్ని ఒకేసారి ఎక్కువ మొత్తంలో చేసుకొని ఫ్రిడ్జ్‌లోనూ స్టోర్​ చేసుకోవచ్చు. ఈ ఫేస్‌ప్యాక్ తరచూ వేసుకోవడం వల్ల మొటిమల సమస్య క్రమంగా తగ్గుముఖం పడుతుందని నిపుణులు చెబుతున్నారు. అంతేకాకుండా చర్మం కొత్త మెరుపును సంతరించుకుంటుందని అంటున్నారు.

టోనర్‌గా :

రెండు టేబుల్​స్పూన్ల చింతపండు రసాన్ని తీసుకొని, దీనికి రెండు చెంచాల టీ డికాషన్‌ను కలపాలి. ముఖం కడుక్కున్న తర్వాత ఈ మిశ్రమంలో దూదిని ముంచి ముఖానికి అప్లై చేసుకోవాలి. కొద్దిసేపటి తర్వాత చల్లటి నీటితో మరోసారి ముఖాన్ని క్లీన్ చేసుకోవాలి.

గమనిక :ఇక్కడ ఒక విషయం గుర్తుంచుకోవాల్సిన ఉంది. అది ఏంటంటే చింతపండును చర్మానికి నేరుగా రాసుకోకూడదు. దీనిని ఇతర పదార్థాలతో కలిపి మాత్రమే ఉపయోగించాలి. అంతేకాదు చింతపండును వాడడం వల్ల కొంతమందిలో అలర్జీ వంటి దుష్ప్రభావాలు కూడా రావచ్చు. కాబట్టి ఈ బ్యూటీ టిప్స్​ విషయంలో వ్యక్తిగత సౌందర్య నిపుణులను సంప్రదించి వారి సలహా మేరకు ముందుగా ప్యాచ్ టెస్ట్ చేసిన తర్వాతే ఉపయోగించడం మంచిది.