Elon Musk Putin :ఉక్రెయిన్‌తో యుద్ధంలో రష్యా ఓడిపోయే ప్రసక్తే లేదని టెస్లా, స్పేస్‌ఎక్స్‌ అధినేత ఎలాన్ మస్క్ అన్నారు. ఒకవేళ రష్యా అధ్యక్షుడు పుతిన్ ఈ విషయంలో వెనక్కి తగ్గితే ఆయనను హతమార్చే అవకాశం ఉందని చెప్పారు. అందుకని ఈ పోరాటాన్ని ఆయన కొనసాగిస్తూనే ఉంటారన్నారు. ఆ మేరకు ఆయనపై తీవ్ర ఒత్తిడి ఉందన్నారు. 'ఎక్స్‌' స్పేసెస్‌ వేదికపై రిపబ్లికన్‌ పార్టీ ప్రతినిధులతో జరిగిన చర్చా కార్యక్రమంలో ఆయన వ్యాఖ్యలు చేశారు.
మస్క్ ఆవేదన
రష్యా విషయంలో చేసిన వ్యాఖ్యలపై తనను చాలా మంది విమర్శిస్తున్నారని మస్క్ అన్నారు. అయితే వాస్తవాలు తెలుసుకుంటే మంచిదని సూచించారు. కాగా, ఉక్రెయిన్‌లో రష్యా ఓడిపోయే అవకాశాలే లేవన్నారు. ఇంకా రష్యాపై ఉక్రెయిన్ గెలుస్తుందని అనుకోవడం ఆ దేశానికి ఏమాత్రం శ్రేయస్కరం కాదన్నారు. యుద్ధాన్ని సుదీర్ఘంగా కొనసాగించడం వారికే నష్టమని అన్నారు. మరోవైపు, అమెరికా తాజాగా ప్రకటించిన ఆర్థిక సాయం వల్ల ఉక్రెయిన్కు ఎలాంటి ప్రయోజనం ఉండదని తేల్చి చెప్పారు.
నా లక్ష్యం అదే : మస్క్
తనపై వస్తున్న విమర్శల గురించి మస్క్ స్పందించారు. 'రష్యాకు వ్యతిరేకంగా మా కంపెనీలు పనిచేస్తున్నాయి. ఉక్రెయిన్కు మా 'స్టార్‌లింక్‌' సేవలు అందుతున్నాయి. రష్యాకు వ్యతిరేకంగా కీవ్‌ సమాచార వ్యవస్థలో ఇప్పుడు అది కీలకంగా మారింది. రష్యా అంతరిక్ష వ్యాపారాల నుంచి స్పేస్‌ఎక్స్‌ తప్పుకుంది. రెండువైపులా ప్రాణనష్టాన్ని అడ్డుకోవడమే నా లక్ష్యం' అని మస్క్ వ్యాఖ్యానించారు. మరోవైపు రష్యాలో పుతిన్ను గద్దె దించాలనుకునేవారు ఆయన స్థానంలో ఎవరిని కోరుకుంటున్నారని ప్రశ్నించారు. రాబోయేవారు శాంతికాముకులు అయ్యుంటారని ఎలా ఆశిస్తారన్నారు. వారు మరింత కఠినంగా వ్యవహరించే అవకాశం లేకపోలేదన్నారు.