How to Eat Pulses for Protein:మనం ఆరోగ్యం కోసం వివిధ రకాల ఆహార పదార్థాలను ప్రతి రోజూ తింటుంటాం. కానీ, ఆయా ఆహార పదార్థాల్ని తీసుకునే క్రమంలో కొన్ని కచ్చితమైన నియమాలు పాటిస్తేనే అందులోని పోషకాలు శరీరానికి అందుతాయని నిపుణులు చెబుతున్నారు. ముఖ్యంగా చాలా మంది తినే పప్పుల విషయంలో కొన్ని అంశాలు దృష్టిలో పెట్టుకోవాలని సూచిస్తున్నారు. అవేంటో ఇప్పుడు తెలుసుకుందాం.
పప్పుల్లో ప్రొటీన్లు, విటమిన్లు, ఖనిజాలు వంటి పోషకాలు పుష్కలంగా ఉంటాయని నిపుణులు చెబుతున్నారు. కానీ, వీటితో పాటు పోషకాల పనితీరుకు ఆటంకం కలిగించే యాంటీ న్యూట్రియంట్లు కూడా ఉంటాయని వెల్లడిస్తున్నారు. ఇవి పోషకాల్ని శరీరం గ్రహించకుండా అడ్డుపడతాయని.. తద్వారా అజీర్తి, కడుపుబ్బరం, గ్యాస్ట్రిక్‌ సమస్యలు తలెత్తే ప్రమాదం ఉందని హెచ్చరిస్తున్నారు. అందుకే ఈ సమస్యలు రాకూడదంటే పప్పుల్ని ఆహారంగా తీసుకునే క్రమంలో కొన్ని నియమాలు పాటించడం ముఖ్యమని నిపుణులు సూచిస్తున్నారు. అవేంటో ఇప్పుడు తెలుసుకుందాం.
మొలకెత్తాకే!
చాలామందికి పప్పుల్ని నేరుగా వండుకోవడం లేదంటే వివిధ వంటకాల్లో భాగం చేసుకుంటుంటారు. కానీ ముందు వీటిని నానబెట్టి, మొలకలొచ్చాక వండుకునే వారు చాలా తక్కువమంది ఉంటారు. ఇలా చేయడం వల్ల యాంటీ న్యూట్రియంట్లను విచ్ఛిన్నం చేసే ఎంజైమ్‌లను ప్రేరేపించచ్చని నిపుణులు చెబుతున్నారు. ఎందుకంటే పప్పుల్లో ఉండే పోషకాల్ని శరీరం గ్రహించకుండా ఈ యాంటీ న్యూట్రియంట్లు అడ్డుపడతాయని వివరిస్తున్నారు. అదే నానబెట్టి, మొలకలెత్తించిన పప్పుల్లో వీటి శాతం తగ్గిపోతుందని అంటున్నారు. తద్వారా సూక్ష్మ పోషకాలు, ప్రొటీన్‌ వంటివి శరీరానికి అందుతాయని తెలిపారు. ఫలితంగా జీర్ణశక్తి మెరుగుపడి వివిధ రకాల జీర్ణ సంబంధిత సమస్యలు తలెత్తకుండా జాగ్రత్తపడచ్చని వెల్లడిస్తున్నారు. 2018లో Journal of Food Scienceలో ప్రచురితమైన "Effect of Soaking and Cooking on Nutrient Retention in Pulses" అనే అధ్యయనంలోనూ ఈ విషయం తేలింది.
వాటితో కలపండి!
పప్పుల్ని బియ్యంతో కంటే చిరుధాన్యాలు, కాయధాన్యాలతో కలిపి తీసుకోవడం వల్ల వాటిలోని సుగుణాలను శరీరం గ్రహించే సామర్థ్యం పెరుగుతుందని నిపుణులు చెబుతున్నారు. ఫలితంగా ఎముకలు దృఢంగా మారతాయని.. శరీరంలో యాంటీబాడీలు ఉత్పత్తై రోగనిరోధక శక్తి మెరుగుపడుతుందని అంటున్నారు. అంతేకాకుండా.. చిన్న వయసులోనే జుట్టు నెరిసిపోకుండానూ జాగ్రత్తపడచ్చని వివరిస్తున్నారు.