Sweat in Sleep Causes:వాతావరణం వేడిగా ఉండడం, ఇంట్లోకి గాలి ప్రసరణ సరిగ్గా లేకపోవడం, శరీరంలో వేడి ఎక్కువగా ఉండడం.. ఇలాంటి సమయాల్లో చెమటలు పట్టడం సర్వసాధారణం. అయితే కొంతమందికి మాత్రం వాతావరణం చల్లగా ఉన్నప్పటికీ రాత్రుళ్లు నిద్రలో విపరీతంగా చెమటలు పడుతుంటాయి. ఇది చిన్న సమస్యే కదా అని చాలామంది నిర్లక్ష్యం చేస్తుంటారు. కానీ వివిధ రకాల అనారోగ్యాలకు ఇదే సంకేతమని నిపుణులు హెచ్చరిస్తున్నారు. అందుకే సమస్య తీవ్ర రూపం దాల్చకముందే.. వైద్యుల్ని సంప్రదించడం ఉత్తమమని చెబుతున్నారు. ఈ నేపథ్యంలోనే రాత్రుళ్లు ఉన్నట్లుండి చెమటలు ఎందుకు పడతాయి? ఇందుకు తీసుకోవాల్సిన జాగ్రత్తలు ఏంటో ఇప్పుడు తెలుసుకుందాం.
హైపర్‌ థైరాయిడిజం:జీవక్రియలతో పాటు ఇతర శారీరక విధులు నిర్వర్తించడంలో థైరాయిడ్‌ గ్రంథి సమర్థంగా పనిచేస్తుందని నిపుణులు వివరిస్తున్నారు. అయితే ఇది అత్యంత చురుగ్గా మారినప్పుడు హైపర్‌ థైరాయిడిజం సమస్య బారిన పడతామని.. ఫలితంగా శరీరం వేడికి తట్టుకోలేక చెమటలు పడుతుంటాయని అంటున్నారు. 2017లో European Thyroid Journal ప్రచురితమైన "Thyroid-Associated Symptoms in Patients with Hyperthyroidism" అనే అధ్యయనంలో తేలింది. (రిపోర్ట్ కోసం ఇక్కడ క్లిక్ చేయండి)
ఒత్తిడి/ఆందోళన:మనం ఒక్కోసారి అకస్మాత్తుగా ఒత్తిడి, ఆందోళనలకు గురవుతాం. అయితే, వాటి ప్రభావం మెదడు, శరీరంపై పడి నిద్రలో చెమటలు పడతాయని నిపుణులు అంటున్నారు.
మానసిక రుగ్మతలు:కొన్ని రకాల మానసిక రుగ్మతలు కూడా నిద్రలో చెమటలకు కారణం అవుతుందని అంటున్నారు. ఈ రుగ్మతలు ఉన్నప్పుడు మనసులో ఒక రకమైన ఒత్తిడి, ఆందోళన మొదలై నిద్రలో చెమటలు పడతాయని అంటున్నారు.
మెనోపాజ్:40 దాటిన మహిళల్లో రాత్రుళ్లు నిద్రలో చెమటలు పడుతున్నాయా? అయితే, వీరంతా మెనోపాజ్‌కు చేరువవుతున్నారనడానికి సూచనగా భావించవచ్చని నిపుణులు సూచిస్తున్నారు.
హెచ్‌ఐవీ: టీబీ, హెచ్‌ఐవీ, లుకేమియా వంటి సమస్యలు ఉన్నవారిలోనూ అకస్మాత్తుగా శరీరంలో ఉష్ణోగ్రత పెరిగిపోతుంటుంది. దీని వల్ల కూడా రాత్రుళ్లు చెమటలు పడతాయని నిపుణులు అంటున్నారు.