చర్మంపై ఈ లక్షణాలు కనిపిస్తే - మీకు షుగర్ వ్యాధి రాబోతున్నట్టే!

Warning Signs of Diabetes on Skin : దీర్ఘకాలిక వ్యాధులలో షుగర్‌ ముందు వరుసలో ఉంటుంది. దీనివల్ల శరీరానికి జరిగే డ్యామేజ్​ అంతా ఇంత కాదు. అయితే.. మీ రక్తంలో షుగర్​ ఎక్కువగా ఉంటే చర్మంపై కొన్ని లక్షణాలు కనిపిస్తాయని నిపుణులంటున్నారు. ఆ వివరాలు ఈ స్టోరీలో చూద్దాం..

Warning Signs of Diabetes on Skin :వయసుతో సంబంధం లేకుండా విస్తరిస్తోన్న వ్యాధి.. డయాబెటిస్. సాధారణంగా మన బాడీలో ప్యాంక్రియాస్ తగినంత ఇన్సులిన్‌ ఉత్పత్తి చేయలేనప్పుడు.. లేదా ఉత్పత్తి అయిన ఇన్సులిన్‌ను సమర్థవంతంగా ఉయోగించలేనప్పుడు.. షుగర్ లెవల్స్ పెరిగి డయాబెటిస్ వస్తుంది. అయితే.. రక్తంలో చక్కెర స్థాయులను తెలుసుకోవాలంటే టెస్టులు మాత్రమే కాకుండా.. చర్మంపై కొన్ని లక్షణాలు కనిపిస్తాయి. అంటే.. మనకి మధుమేహం వచ్చిందో లేదో విషయాన్ని ఈ లక్షణాల ద్వారా తెలుసుకోవచ్చంటున్నారు నిపుణులు. మరి, చర్మంపై కనిపించే ఆ లక్షణాలేంటో ఈ స్టోరీలో తెలుసుకుందాం..

డయాబెటిక్ పేషెంట్లలో చర్మ సమస్యలు:అమెరికన్​ అకాడమీ ఆఫ్​ డెర్మటాలజీ అసోసియేషన్​ ప్రకారం.. టైప్​ 2 డయాబెటిస్​తో బాధపడుతున్న వారిలో బ్యాక్టీరియా ఇన్ఫెక్షన్లు, ఫంగల్ ఇన్ఫెక్షన్లు, దురద, పొక్కులు వంటి కొన్ని చర్మ సమస్యలు ఉంటాయి. ఈ చర్మ సమస్యలు ఎవరికైనా సంభవించవచ్చు. అయితే డయాబెటిక్ రోగులలో చర్మాన్ని ఎక్కువగా ఇబ్బంది పెట్టే సమస్యలు వస్తాయి. అవేంటంటే..

ప్యాచెస్(patches)​: మధుమేహం ఉన్న వ్యక్తులలో చర్మంపై ప్యాచెస్ రావడం చాలా సాధారణం. ఈ ప్యాచెస్ చాలా రకాలుగా ఉండవచ్చు. ఇవి మొదటగా చిన్నగా ప్రారంభమవుతాయి. తర్వాతర్వాత మొటిమలుగా కనిపిస్తాయి. ఆ తర్వాత అక్కడ చర్మం వాపు వచ్చి గట్టిగా మారుతుంది. దీనినే నెక్రోబయోసిస్​ లిపోడికా అని పిలుస్తారు. అలాగే ఈ ప్రదేశంలో చర్మంపై దురద ఉండటంతో పాటు నొప్పిగా కూడా ఉంటుంది.

డార్క్​ స్కిన్​:ఈ మచ్చలు చర్మం మడతలలో ముఖ్యంగా.. మెడ, చంకలు, మోకాళ్లు, గజ్జల చుట్టూ బ్లాక్​ కలర్​లో రౌండ్​ షేప్​లో ఉంటాయి. అంటే దీని అర్థం.. మీ రక్తంలో ఇన్సులిన్ చాలా ఎక్కువగా ఉందని.. ఇది ప్రీడయాబెటిస్‌కు సాధారణ సంకేతమని వైద్యులు అంటున్నారు. దీనినే అకాంటోసిస్ నైగ్రికాన్ 1 అని కూడా పిలుస్తారు. ఈ చర్మ పరిస్థితి ఎక్కువగా అధిక బరువు ఉన్నవారిలో సంభవిస్తుంది.

బొబ్బలు లేదా పొక్కులు(Blisters):రక్తంలో అధిక చక్కెర కారణంగా.. చర్మంపై ఆకస్మిక పొక్కులు కనిపిస్తాయి. చేతులు, కాళ్లు, లేదా రెండింటిపై ఈ బొబ్బలు ఏర్పడతాయి. ఈ బొబ్బలు స్కిన్ బర్న్ తర్వాత కనిపించే బొబ్బల మాదిరిగానే కనిపిస్తాయి. కానీ, నొప్పి కలిగించవు. ఈ బొబ్బలకు సకాలంలో చికిత్స చేయకపోతే తీవ్రమైన గాయాలను కలిగిస్తాయి.

గ్రాన్యులోమా యాన్యులారే(Granuloma Annulare):గ్రాన్యులోమా యాన్యులారే (GA) అనేది చర్మంపై చిన్న, ఎరుపు గడ్డలు ఏర్పడే ఒక దీర్ఘకాలిక చర్మ పరిస్థితి. ఈ గడ్డలు సాధారణంగా రింగ్​ నమూనాలో చుట్టూ తెల్లటి రంగుతో ఉంటాయి. చేతులు, కాళ్లు, మెడ, తుంటిపై కనిపిస్తాయి. GA చాలా మందిలో దురద లేదా నొప్పిని కలిగించదు. కానీ కొంతమందిలో అది చికాకు కలిగిస్తుంది.

నెక్రోబయోసిస్ లిపోయిడికా డయాబెటికోరం (Necrobiosis Lipoidica Diabeticorum):ఇది డయాబెటిస్‌కు సంబంధించిన అసాధారణ చర్మ పరిస్థితి. ఇది ఎక్కువగా కాళ్ల దిగువ భాగాన్ని ప్రభావితం చేస్తుంది. ఇది రక్తనాళాల వాపుతో ముడిపడి ఉంటుందని వైద్యులు చెబుతున్నారు. ఈ చర్మ పరిస్థితి చర్మంలోని కొల్లాజెన్ వంటి ప్రొటీన్లను దెబ్బతీస్తుంది. సాధారణంగా టైప్ 1 డయాబెటిస్‌తో బాధపడుతున్నవారిలో కనిపిస్తుంది. స్మోకింగ్​ అలవాటు ఉన్నవారిలో నెక్రోబయోసిస్ లిపోయిడికా డయాబెక్టోరమ్ ప్రమాదం పెరుగుతుంది. మధుమేహం ఉన్నవారిలో సగం కంటే తక్కువ శాతం మందే ఈ సమస్యతో బాధపడుతున్నారు. పై లక్షణాలు కనిపిస్తే.. వెంటనే చికిత్స తీసుకోవాలని నిపుణులు సూచిస్తున్నారు.