ఈ అలవాట్లు మీలో ఉంటే - ఒక్క మొటిమ కూడా మీ ముఖంపై కనపడదు! పైగా గ్లోయింగ్​ స్కిన్​ పక్కా! - Pimples Free Skin Habits

Pimples Free Skin Habits : చర్మం ఆరోగ్యంగా, కోమలంగా ఉండాలని చాలా మంది కోరుకుంటారు. కానీ.. మచ్చలు, మొటిమలతో చర్మం నిర్జీవంగా మారి అందవిహీనంగా కనిపిస్తుంది. మీరు అలాంటి సమస్యతో బాధపడుతున్నారా? అయితే, ఈ అలవాట్లు ఫాలో అయ్యి చూడండి. మొటిమలు లేని గ్లోయింగ్ స్కిన్ మీ సొంతమవుతుందంటున్నారు నిపుణులు. అవేంటో ఇప్పుడు చూద్దాం.

Good Habits For Pimples Free Skin :చాలా మంది అందంగా కనిపించడానికి, సౌందర్యాన్ని పెంపొందించుకోవడానికి రకరకాల క్రీములను యూజ్ చేస్తుంటారు. ముఖ్యంగా మొహంపై కనిపించే మొటిమలు, నల్ల మచ్చలు తగ్గడానికి వివిధ రకాల సౌందర్య సాధనాలను వాడుతుంటారు. అయినా ఫలితం అంతంతమాత్రమే. అలాంటి వారు ఈ అలవాట్లు ఫాలో అయితే ఎలాంటి బ్యూటీ ప్రొడక్ట్స్​ వాడకుండానే మొటిమలు(Pimples), మచ్చలు లేకుండా న్యాచురల్ బ్యూటీస్​గా కనిపించవచ్చని నిపుణులు అంటున్నారు. మరి, అవేంటో ఈ స్టోరీలో తెలుసుకుందాం.

ఫేస్ వాష్ :చాలా తక్కువ మంది రోజుకు రెండు సార్లు ఫేస్​వాష్​ చేసుకుంటారు. అది మార్నింగ్ నిద్ర లేచిన వెంటనే, నైట్ పడుకునే ముందు. అయితే, ముఖంపై మొటిమలు రావడానికి ఇలా రెండు సార్లు ముఖం కడుక్కోకపోవడమూ ఓ కారణం కావొచ్చంటున్నారు నిపుణులు. కాబట్టి.. ఈ రెండు సందర్భాలతో పాటు.. చెమట ఎక్కువగా వచ్చినప్పుడు తప్పనిసరిగా ఫేస్ వాష్ చేసుకోవాలంటున్నారు. దాంతో ముఖంపై దుమ్ము, జిడ్డుదనం తొలగిపోయి చర్మ రంధ్రాలు మూసుకుపోకుండా ఉంటాయి. అలాగే మొటిమలూ ఏర్పడవట! అయితే, ఈ క్రమంలో మీరు గుర్తుంచుకోవాల్సిన విషయమేమిటంటే.. చర్మతత్వానికి సరిపడే ఫేస్‌వాష్‌ను సెలెక్ట్ చేసుకోవడమూ ఇంపార్టెంట్​ అంటున్నారు నిపుణులు!

తరచూ వీటిని శుభ్రం చేసుకోవాలి : సాధారణంగా మనం మొబైల్, ల్యాప్‌టాప్.. వంటి గ్యాడ్జెట్స్‌ని ఉపయోగిస్తున్నప్పుడు వాటిపై పేరుకున్న దుమ్ము, ధూళిని అంతగా పట్టించుకోం. కానీ, వాటిపై చేరే బ్యాక్టీరియా చేతికి అంటుకొని.. దాంతో ముఖంపై తుడుచుకున్నప్పుడు అది స్కిన్ పైకి చేరుతుంది. ఇది కూడా మొటిమలు రావడానికి ఓ కారణమే అంటున్నారు నిపుణులు. అంతేకాదు.. కొన్ని అధ్యయనాల్లో పబ్లిక్ టాయిలెట్ కంటే మొబైల్‌ స్క్రీన్‌ ఎక్కువ అపరిశుభ్రంగా ఉంటుందని తేలింది! కాబట్టి, ఫోన్ స్క్రీన్​తో పాటు ఇతర గ్యాడ్జెట్స్​ని ఎప్పటికప్పుడు క్లీన్​ చేసుకోవడం మంచిదంటున్నారు.

2015లో 'జర్నల్ ఆఫ్ డెర్మటాలజీ'లో ప్రచురితమైన ఒక నివేదిక ప్రకారం.. మొబైల్ స్క్రీన్ తాకి చేతులు శుభ్రం చేసుకోకుండా ముఖాన్ని తాకే వ్యక్తులకు మొటిమలు వచ్చే అవకాశం ఎక్కువగా ఉందని కనుగొన్నారు. ఈ పరిశోధనలో న్యూయార్క్‌లోని మౌంట్ సినాయ్ స్కూల్ ఆఫ్ మెడిసిన్‌కు చెందిన ప్రముఖ డెర్మటాలజిస్ట్ డాక్టర్ డేవిడ్ డే పాల్గొన్నారు. తరచుగా ఫోన్ స్క్రీన్ తాకి చర్మాన్ని తాకడం మొటిమల సమస్యను పెంచే ఛాన్స్ ఉందని ఆయన పేర్కొన్నారు.

ఇలా అస్సలు చేయవద్దు : కొంతమందికి పదే పదే ముఖానికి చేతుల్ని తాకించే హ్యాబిట్ ఉంటుంది. ఫలితంగా చేతులకున్న క్రిములు, మురికి ముఖం పైకి చేరి మొటిమలకు కారణమవుతాయంటున్నారు నిపుణులు. కాబట్టి, ముఖం కడుక్కునేటప్పుడు తప్ప మిగతా సమయాల్లో వీలైనంత వరకు చేతుల్ని ఫేస్​కి తాకించకుండా చూసుకోవాలంటున్నారు.

దిండ్ల విషయంలో ఈ జాగ్రత్తలు :మనం దిండ్లను డైలీ వాడే క్రమంలో స్కిన్, జుట్టు కుదుళ్లలో ఉన్న జిడ్డు వాటి కవర్ల పైకి చేరుతుంది. ఈ అపరిశుభ్రమైన దిండ్లనే ఎక్కువ రోజులు వాడడం, ఇతరులు వీటిని యూజ్ చేయడం వల్ల ముఖంపై మొటిమలొస్తాయంటున్నారు నిపుణులు. అందుకే.. వారానికోసారైనా దిండ్ల కవర్లను మార్చుకోవడం, ఎవరి దిండు వారే వాడుకోవడం మంచిదంటున్నారు.

ఆహారపు అలవాట్లు :ముఖం శుభ్రంగా ఉండాలనుకునేవారు డైలీ తీసుకునే ఆహారం విషయంలోనూ కొన్ని జాగ్రత్తలు పాటించాలని నిపుణులు అంటున్నారు. ముఖ్యంగా డైట్​లో కాయగూరలు, ఆలివ్‌ నూనె, తృణ ధాన్యాలు, తక్కువ మొత్తంలో మాంసం.. వంటివి ఉండేలా చూసుకోవాలంటున్నారు. వీటి ద్వారా చర్మానికి కావాల్సిన పోషకాలన్నీ అంది ఆరోగ్యంగా, అందంగా కనిపిస్తారంటున్నారు నిపుణులు. అంతేకాదు.. మొటిమల సమస్య రాకుండా ఉండాలంటే బరువు అదుపులో ఉండేలా చూసుకోవాలంటున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.