Phone Excessive Usage Effects On Skin Health :నేటి టెక్నాలజీ యుగంలో స్మార్ట్ఫోన్ అరచేతిని వీడని ఆభరణమై పోయింది. పొద్దున లేచింది మొదలు.. రాత్రి పడుకునే వరకూ అది లేకుండా అరక్షణం గడపలేని పరిస్థితి. అవసరం దగ్గర నుంచి ఎంటర్టైన్మెంట్ దాకా ఏది కావాలన్నా చేతిలో ఫోన్ ఉండాల్సిందే! అయితే, ఫోన్తో అనేక ఉపయోగాలు ఉన్నప్పటికీ.. అంతే మొత్తంలో ఆరోగ్యానికి హాని చేసే నష్టాలు ఉన్నాయనే విషయాన్ని గమనించాలంటున్నారు నిపుణులు. ముఖ్యంగా స్మార్ట్ఫోన్ను(Smartphone) ఎక్కువగా వాడడం చర్మ ఆరోగ్యంపై తీవ్ర ప్రభావం చూపి అందాన్ని తగ్గిస్తుందంటున్నారు. అలాగే.. వివిధ చర్మ సంబంధిత సమస్యలతో పాటు త్వరగా వృద్ధాప్య ఛాయలు రావడానికి దారితీస్తుందంటున్నారు. అదెలాగో ఈ స్టోరీలో తెలుసుకుందాం.
వృద్ధాప్య ఛాయలు: సూర్యుడి నుంచి వెలువడే యూవీ కిరణాలు చర్మానికి ఏ విధంగా హాని చేస్తాయో మనందరికీ తెలిసిన విషయమే. అదే మాదిరిగా స్మార్ట్ఫోన్ నుంచి వెలువడే హై ఎనర్జీ విజిబుల్‌ లైట్... అదేనండి నీలికాంతి కూడా చర్మ ఆరోగ్యంపై తీవ్ర ప్రభావం చూపిస్తుందంటున్నారు నిపుణులు. యూవీ కిరణాలకంటే ఎక్కువగా చర్మ లోతుల్లోకి చొచ్చుకొని పోయే సామర్థ్యం ఈ కాంతికి ఉంటుందని చెబుతున్నారు. అంతేకాదు.. నీలి కాంతి చర్మ కణాలతోపాటు సాగే గుణానికి కారణమైన కొల్లాజెన్‌నీ దెబ్బతీసి, త్వరగా వృద్ధాప్యఛాయలు వచ్చేలా చేస్తుందంటున్నారు.
2019లో "Journal of Investigative Dermatology"లో ప్రచురితమైన ఒక నివేదిక ప్రకారం.. మొబైల్ నుంచి వెలువడే నీలి రంగు కాంతి మానవ చర్మ కణాలపై ప్రభావం చూపి కొల్లాజెన్ ఉత్పత్తిని తగ్గిస్తుందని కనుగొన్నారు. ఈ పరిశోధనలో యూఎస్ఏలోని 'యూనివర్సిటీ ఆఫ్ రోచెస్టర్ మెడికల్ సెంటర్'కు చెందిన ప్రముఖ డెర్మటాలజిస్ట్ డాక్టర్ J. Dirk ELDREDGE పాల్గొన్నారు. స్మార్ట్ఫోన్ను అతిగా వాడడం వల్ల దాని నుంచే వెలువడే బ్లూ లైట్ కొల్లాజెన్ ఉత్పత్తిని తగ్గించి త్వరగా వృద్ధాప్య ఛాయలు రావడానికి కారణమవుతుందని ఆయన పేర్కొన్నారు.
మచ్చలు: కొందరిలో బుగ్గలు, ముక్కుమీద నల్లని మచ్చలు వస్తుంటాయి. అందుకు అతిగా ఫోన్ వాడడం కూడా ప్రధాన కారణమని చెబుతున్నారు నిపుణులు. ఎందుకంటే.. మొబైల్ ఎక్కువగా ఉపయోగించడం వల్ల మెలనిన్‌ ఉత్పత్తి పెరిగి ఈ పిగ్మెంటేషన్‌ ఏర్పడుతుందని సూచిస్తున్నారు. అంతేకాదు.. చర్మం పొడిబారి చిట్లినట్లుగా అవుతుందంటున్నారు. దీంతో యాక్నే, ఎగ్జిమా వంటివి రావడానికి కూడా దారితీస్తుందని సూచిస్తున్నారు నిపుణులు. కాబట్టి, ఇలాంటి సమస్యల బారిన పడకుండా ఉండాలంటే స్మార్ట్ఫోన్ వాడకాన్ని తగ్గించడం మంచిదంటున్నారు. అలాగే కొన్ని జాగ్రత్తలు పాటించడం ద్వారా చర్మ సౌందర్యం దెబ్బతినకుండా చూసుకోవచ్చంటున్నారు. అవేంటంటే..
ఫోన్ అడిక్షన్తో బాధపడుతున్నారా? ఈ సింపుల్ చిట్కాలతో సమస్యకు చెక్ పెట్టండి!
- రోజూ రెండు పూటలా ఫేస్ వాష్ చేసుకోవడం, మాయిశ్చరైజర్‌ రాయడం తప్పనిసరి చేసుకోవాలంటున్నారు నిపుణులు. అలాగే వాడే క్రీముల్లో విటమిన్‌ సి, ఇ, నియాసినమైడ్‌ వంటి యాంటీఆక్సిడెంట్లు ఉండేలా చూసుకోవాలని చెబుతున్నారు.
- అలాగే.. మీ స్కిన్‌కేర్‌ రొటీన్‌లో యూవీఏ, యూవీబీలతోపాటు నీలికాంతి నుంచి రక్షణనిచ్చే బ్రాడ్‌స్పెక్ట్రమ్‌ సన్‌స్క్రీన్‌ని తప్పక చేర్చుకోవాలంటున్నారు నిపుణులు. దానిలో జింక్‌ ఆక్సైడ్, టైటానియం డయాక్సైడ్, ఐరన్‌ ఆక్సైడ్స్‌ వంటివి ఉంటే ఇంకా మంచిదంటున్నారు.
- చేతిలోకి ఫోన్ తీసుకున్న ప్రతిసారీ టైమ్ని చూసుకోండి. 20 నిమిషాలు అవుతోంది అనిపించగానే పక్కన పెట్టడానికి ట్రై చేయండి. వీలుంటే కాస్త దూరాన ఉన్న ఏదైనా వస్తువును తదేకంగా చూస్తే మేలు అంటున్నారు. ఇలా చేయడం ద్వారా చర్మంతోపాటు కళ్లకీ హాని తగ్గుతుందని చెబుతున్నారు.
- అదేవిధంగా స్మార్ట్ఫోన్కు స్క్రీన్ ప్రొటెక్టర్ వేయించుకోవడం మంచిది. దీని వల్ల ఫోన్ కింద పడ్డప్పుడు స్క్రీన్ పగలకుండా ఉండడమే కాదు.. నీలి కాంతి ప్రభావాన్ని తగ్గించడంలోనూ అది చాలా బాగా సహాయపడుతుందంటున్నారు నిపుణులు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
హెచ్చరిక : మహిళల గర్భాశయంపై మొబైల్ ఎఫెక్ట్ - ఏం జరుగుతుందో తెలుసా?
