నైట్‌షిఫ్ట్‌ వల్ల మీ ఆరోగ్యం దెబ్బతింటోందా? ఈ టిప్స్ మీకోసమే

Night Shift Health Care In Telugu : కార్పొరేట్‌ ప్రపంచంలో చాలా మంది రాత్రిపూట ఉద్యోగాలు చేయాల్సి వస్తోంది. రాత్రంతా విధి నిర్వహణలో ఉండటం, ఉదయం నిద్రపోవడం వల్ల కొన్ని రకాల ఆరోగ్య సమస్యలు తలెత్తుతున్నాయి. అయితే అలాంటివారు ఏ టిప్స్ పాటించి ఆరోగ్యాన్ని కాపాడుకోవచ్చో ఈ స్టోరీలో తెలుసుకుందాం.

Night Shift Health Care In Telugu : ప్రస్తుత సాంకేతిక యుగంలో చాలా మంది నైట్ షిఫ్ట్​లు చేస్తున్నారు. దీంతో పలు అనారోగ్య సమస్యలకు గురవుతున్నారు. నైట్ షిఫ్ట్ చేసినా ఆరోగ్యం దెబ్బతినకుండా ఉంటాలంటే పాటించాల్సిన చిట్కాలేంటో తెలుసా?

మన శరీరం కూడా రాత్రిపూట విశ్రాంతి తీసుకోవడానికి అలవాటు పడింది. కానీ, ప్రస్తుత కాలంలో కొందరు ఉద్యోగులు నైట్ షిఫ్ట్ చేయాల్సి వస్తోంది. ఈ క్రమంలో సూర్యోదయంతోపాటు పగటిపూట వెలుగుకి దూరంగా ఉంటున్నారు. దీంతో శరీరానికి సహజంగా అందాల్సిన డీ విటమిన్ అందట్లేదు. మరికొన్ని అనారోగ్య సమస్యలకు గురవుతున్నారు. మరి నైట్​ షిఫ్ట్​లో పనిచేసినా ఆరోగ్యం దెబ్బతినకుండా ఉండాలంటే తీసుకోవాల్సిన జాగ్రత్తలు తెలుసుకుందాం.

సాఫ్ట్​వేర్​, మీడియా, ఫార్మా వంటి రంగాల్లో పనిచేస్తున్నవారు ఎక్కువగా నైట్‌ డ్యూటీలు చేయాల్సి వస్తుంది. ముఖ్యంగా సాఫ్ట్‌వేర్‌ ఉద్యోగులు ప్రపంచ దేశాల్లో కంపెనీ పనివేళల తగ్గట్లు నైట్ షిఫ్ట్​లు చేయాలి. దీనివల్ల డయాబెటిస్‌తోపాటు కొన్ని దీర్ఘకాలిక వ్యాధులకు లోనవుతున్నారు. చిన్నవయసులోనే అనారోగ్యంతో మానసికంగా, శారీరకంగా కుంగిపోతున్నారు. కార్పొరేట్‌ సంస్కృతి కారణంగా ఆహార అలవాట్లలోనూ మార్పులు రావడం వల్ల మరికొన్ని ఇతర సమస్యలు తోడవున్నాయి.

సహజంగా శరీరం రాత్రిపూట పలు మార్పులకు లోనవుతుంది. రాత్రి పూట విశ్రాంతి లేకపోవడం వల్ల ఫిట్‌నెస్‌ కోల్పోవాల్సి వస్తుంది. ఇలాంటివారి కోసం బాలీవుడ్‌ హీరోయన్లు కరీనా కపూర్, అలియా భట్, కంగనా రనౌత్ వంటివారికి డైటీషియన్‌గా పనిచేసిన రజుతా దివేకర్‌ కొన్ని సూచనలు చేశారు. నైట్‌షిఫ్ట్‌ ఉద్యోగుల తీసుకోవాల్సిన డైట్‌తో పాటు ఇతర సూచనలు చేస్తూ తన ఇన్‌స్టాగ్రామ్‌ అకౌంట్‌లో ఓ వీడియోను అప్‌లోడ్‌ చేశారు.

నైట్‌ షిఫ్ట్‌ వల్ల ఆరోగ్యం దెబ్బతింటుందని, ముఖ్యంగా జీవక్రియ సరిగ్గా జరగక హార్మోన్‌ సమస్యలు వస్తున్నాయని రజుతా దివేకర్ తెలిపారు. నైట్‌షిఫ్ట్‌ చేస్తున్న ఉద్యోగులు ముఖ్యంగా మితాహారం తీసుకోవడం మంచిదని అభిప్రాయపడ్డారు. మిలెట్లతో తయారు చేసిన జావ తాగడం, జొన్న, రాగి దోశలు వంటివి తినాలని సూచించారు. రాత్రిపూట కూల్​డ్రింక్స్ తాగడం, చిప్స్‌ తినడం వంటివి చేయకూడదని సలహా ఇస్తున్నారు.

రాత్రిపూట టీ, కాఫీలు తాగొద్దు
చాలామంది షిఫ్ట్ ప్రారంభించే సమయంలో కప్పు టీ లేదా కాఫీ తాగే అలవాటు ఉంటుంది. ఈ అలవాటు వల్ల కడుపు ఉబ్బరం వంటి సమస్యలు వస్తాయి. అసిడిటీ, వికారం, చిరాకు వంటివి ఎక్కువవుతాయి. ఈ సమస్యలను నివారించడానికి టీ, కాఫీలు తాగడం కన్నా మజ్జిగ, షర్బత్‌ వంటివి తాగడం మంచిది. దీనిని అనుసరించడం వల్ల షిఫ్ట్ తర్వాత ఇంటికి వచ్చినప్పుడు కడుపు ప్రశాంతంగా ఉంటుంది. దీంతో హాయిగా నిద్రపడుతుంది. అప్పుడు ఒత్తిడి వంటి సమస్యలను నివారించొచ్చు. ఇక నిద్రకు ఉపక్రమించే ముందు అరటిపండు లేదా మామిడిపండు వంటివి తీసుకోవడం మంచిదని పోషకాహార నిపుణులు సూచిస్తున్నారు.

సూర్య నమస్కారాలు చేయండి
నైట్‌ డ్యూటీలు చేయడం వల్ల శరీరం పూర్తిగా నిస్తేజంగా మారిపోతుంది. కనుక వ్యాయామం, సూర్య నమస్కారాలు చేయడం మంచిదని పోషకాహార నిపుణులు అంటున్నారు. ముఖ్యంగా సూర్య నమస్కారాలు చేయడం వల్ల ఒత్తిడి వంటి తగ్గుతాయని చెబుతున్నారు. రాత్రిపూట ఉద్యోగాలు చేసేవారు అనారోగ్య సమస్యలను వస్తే వైద్యులను సంప్రదించమని సలహా ఇస్తున్నారు.