Beauty Benefits of Drinking Haldi Water :పసుపులో ఎన్నో ఔషధ గుణాలు ఉంటాయని మనందరికీ తెలిసిన విషయమే. ఎన్నో రకాల వ్యాధులు, ఇన్ఫెక్షన్లు, ఇతర ఆరోగ్య సమస్యలకు ఇది దివ్య ఔషధంలా పనిచేస్తుంది. అందుకే డైలీ మనం చేసుకునే అన్ని వంటకాల్లో దాదాపుగా పసుపును వినియోగిస్తుంటాం. ఇది వంటలకు రంగు, రుచిని ఇవ్వడంతో పాటు ఎన్నో ఆరోగ్య ప్రయోజనాలను అందిస్తుంది. అంతేకాదు.. ముఖ సౌందర్యాన్ని పెంచడంలో పసుపు(Turmeric Powder)చాలా కీలక పాత్ర పోషిస్తుందంటున్నారు ఆరోగ్య నిపుణులు. ఇందులోని సుగుణాలు, ఔషధ గుణాలు పలు చర్మ సంబంధిత సమస్యల్ని దూరం చేసి మోముకు మెరుపును తెచ్చిపెడతాయంటున్నారు. అయితే, అందుకోసం మీరు చేయాల్సిందల్లా రోజూ పసుపు వాటర్ను తాగడమే! ఇలా డైలీ తాగడం వల్ల అనేక రకాల బ్యూటీ బెనిఫిట్స్ పొందవచ్చంటున్నారు నిపుణులు. అవేంటో ఈ స్టోరీలో తెలుసుకుందాం.
గ్లోయింగ్ స్కిన్ మీ సొంతం :పసుపులో ఉండే పోషకాలు శరీరంలోని టాక్సిన్లను తొలగించడంలో చాలా బాగా ఉపయోగపడుతుంది. ముఖ్యంగా ఇందులోని యాంటీ ఆక్సిడెంట్లు, యాంటీ ఇన్ఫ్లమేటరీ లక్షణాలు కణాలు దెబ్బతినకుండా చర్మాన్ని కాంతివంతంగా చేస్తాయంటున్నారు నిపుణులు. కాబట్టి మీరు డైలీ పసుపు నీరు తీసుకోవడం ద్వారా మంచి గ్లోయింగ్ స్కిన్ సొంతం చేసుకోవచ్చంటున్నారు.
మొటిమలు, మచ్చలను తగ్గిస్తుంది : పసుపులో ఉండే కర్కుమిన్.. బ్యాక్టీరియాతో పోరాడటానికి, వాపును తగ్గించడానికి చాలా బాగా సహాయపడుతుందని నిపుణులు చెబుతున్నారు. ఇది మొటిమల చికిత్సలో, మచ్చలను తగ్గించడంలో ప్రభావవంతంగా పనిచేస్తుందంటున్నారు నిపుణులు.
యవ్వనంగా కనిపిస్తారు :మీరు డైలీ పసుపు వాటర్ తీసుకోవడం ద్వారా వృద్ధాప్య ప్రక్రియను అడ్డుకోవచ్చంటున్నారు నిపుణులు. ముఖ్యంగా పసుపులోని యాంటీ ఆక్సిడెంట్లు చిన్న వయసులో వృద్ధాప్యానికి కారణమయ్యే ఫ్రీ రాడికల్స్తో పోరాడటానికి సహాయపడతాయని చెబుతున్నారు. ఇది ముఖంపై ముడతలు, గీతలు రాకుండా చేసి.. నవయవ్వనంగా ఉంచేలా తోడ్పడుతుందని నిపుణులు సూచిస్తున్నారు.
డార్క్ సర్కిల్స్ తగ్గిస్తుంది : ప్రస్తుత రోజుల్లో చాలా మంది కళ్ల కింద డార్క్ సర్కిల్స్తో ఇబ్బందిపడుతున్నారు. అలాంటి వారు పసుపు కలిపిన నీరు లేదా పసుపు ఆధారిత క్రీమ్ను కళ్ల కింద అప్లై చేయడం ద్వారా ఈజీగా ఈ సమస్య నుంచి ఉపశమనం పొందవచ్చంటున్నారు నిపుణులు.
2019లో 'ఇంటర్నేషనల్ జర్నల్ ఆఫ్ డెర్మటాలజీ'లో ప్రచురితమైన ఒక నివేదిక ప్రకారం.. డార్క్ సర్కిల్స్ ఉన్న వారు రోజుకు రెండు సార్లు పసుపు ఆధారిత క్రీమ్ అప్లై చేసుకోవడం వల్ల నల్లటి వలయాలు తగ్గినట్లు పరిశోధకులు గుర్తించారు. ఈ పరిశోధనలో దిల్లీలోని డెర్మటాలజీ అండ్‌ కాస్మెటిక్‌ సర్జరీ విభాగంలో పని చేసే డాక్టర్‌. సంజయ్‌ శర్మా పాల్గొన్నారు. పసుపులోని పోషకాలు కళ్ల కింద డార్క్ సర్కిల్స్ను తగ్గించడంలో చాలా బాగా సహాయపడతాయని ఆయన పేర్కొన్నారు.