ఏం గురూ మందు మానేస్తారా? - ఇలా చేస్తే ఇక గ్లాస్ ముట్టుకోరు!

- న్యూ ఇయర్ రెజల్యూషన్​ విజయవంతం అవుతుంది - ఆరోగ్యం, ఆర్థిక పరంగా "ఫిట్​" అయిపోతారు!

Best Tips to Stop Drinking Alcohol :మద్యం శరీరాన్ని ఆరోగ్య పరంగా, కుటుంబాన్ని ఆర్థిక పరంగా తీవ్రంగా దెబ్బతీస్తుంది. ఈ విషయం తెలుసుకునే సరికే వ్యవహారం చాలా దూరం వెళ్లిపోయి ఉంటుంది. తాగడం బంద్ చేయాలని అనిపిస్తున్నప్పటికీ.. తమ వల్ల కావట్లేదంటూ చేతులు ఎత్తేస్తుంటారు. ఇలాంటి వారు కొన్ని టిప్స్ పాటించడం ద్వారా మందు మానేయడం సాధ్యమే అంటున్నారు నిపుణులు. మరి, అవేంటో ఇప్పుడు చూద్దాం.

మద్యం తాగడం వల్ల ఎన్నో రకాల అనారోగ్యాలు చుట్టు ముడతాయి. దీర్ఘకాలం మందు తాగడం వల్ల కాలేయం దెబ్బ తింటుుంది. ఇంకా.. రొమ్ము, పేగు క్యాన్సర్లు సహా అనేక రకాల క్యాన్సర్లు ఎటాకే చేస్తాయి. హై-బ్లడ్ ప్రెషర్, షుగర్, ఆట్రియల్ ఫైబ్రిలేషన్ వంటి గుండె సంబంధింత సమస్యలూ వస్తాయి. అయితే.. తాము రోజూ తాగట్లేదని, వీకెండ్స్​ లో మాత్రమే గ్లాస్ పట్టుకుంటున్నామని కొందరు చెబుతారు. కానీ.. మద్యం ఎంత తక్కువ తాగినా, ఆరోగ్యానికి ముప్పేనని "హార్వర్డ్ మెడికల్ స్కూల్‌"కు చెందిన ప్రొఫెసర్ డాక్టర్ జాన్ ఎఫ్. కెల్లీ అంటున్నారు. అందుకే.. మద్యం తాగడం మానేయాల్సిందేనని చెబుతున్నారు. అయితే.. ఒకేసారి మానేస్తే, కొన్ని రోజుల్లోనే తిరిగి మొదలు పెట్టే ఛాన్స్ ఉందని నిపుణులు చెబుతున్నారు. అందుకే.. ఒక పద్ధతి ప్రకారం దూరం పెట్టాలని సూచిస్తున్నారు.

తిన్న తర్వాత తాగండి..

మద్యం ఖాళీ కడుపుతో తాగడం చాలా ప్రమాదం. దీనివల్ల వేగంగా మత్తులోకి వెళ్లిపోతారు. ఆ మత్తులో మరో పెగ్గు, ఇంకో పెగ్గు, ఇంకా, ఇంకా అంటూ వెళ్లిపోతారు. అందుకే.. తినకముందు తాగకూడదని సూచిస్తున్నారు. తప్పకుండా కడుపు నిండా తిన్న తర్వాత తాగాలని సూచిస్తున్నారు. దీనివల్ల మీరు ఎక్కువగా మద్యం తీసుకునే వీలు ఉండదు. మనసు కూడా ఎక్కువగా తాగాలని ఆరాటపడదు. పొట్టలో ఎలాగో ఆహారం ఉంది కాబట్టి.. డ్యామేజ్​ తీవ్రత కాస్త తగ్గుతుంది. ఫైనల్​గా మీరు మందు మానేయాలని భావిస్తున్నారు కాబట్టి.. తక్కువతోనే ఆపేయాలనే స్పృహ ఉంటుందని సూచిస్తున్నారు.

వీటిని ట్రై చేయండి..

నిత్యం మద్యం తాగేవారు ఉన్నట్టుండి పూర్తిగా తగ్గించడం సాధ్యం కాకపోవచ్చు. అదే సమయంలో అసలు తాగకుండా ఉండలేరు. కాబట్టి ఆల్కహాల్ ఎక్కువగా ఉండే మీ బ్రాండ్​ మార్చేయాలని సూచిస్తున్నారు. ఆల్కహాల్​ పర్సంటేజ్ తక్కువగా ఉండే వైన్​ లాంటి పానీయాలను ఎంచుకోవడం మంచిదని చెబుతున్నారు. మార్కెట్లో ఇలాంటి ఆప్షన్స్​ చాలానే ఉన్నాయి. ఇలా బ్రాండ్​ మార్చడం వల్ల మీ శరీరంలోకి వెళ్లే ఆల్కహాల్ పర్సంటేజ్ తగ్గుతుంది. తాగామనే ఫీలింగ్ కూడా ఉంటుంది. క్రమంగా దీన్ని కూడా తగ్గిస్తూ పోవాలి.

ఇంట్లో మందు ఉంచొద్దు..

నిత్యం మందు తాగేవారిలో చాలా మంది ఇంటికి కూడా క్యారీ చేస్తుంటారు. వాళ్ల ఇంట్లో మందు స్పేర్​గా ఉంచుతారు. తాగడం బంద్ చేయాలని అనుకునేవారు ఎట్టి పరిస్థితుల్లోనూ ఇంట్లో మద్యం ఉంచకూడదు. పక్కనే ఉన్నప్పుడు తాగాలనే కోరిక ఎక్కువగా కలుగుతుంది.

పార్టీలను స్కిప్ చేయండి..

మిత్రులైనా, ఫ్యామిలీ పార్టీలు అయినా ఏర్పాటు చేసినప్పుడు వాటికి దూరంగా ఉండండి. ఫంక్షన్లకు దూరుంగా ఉన్నప్పుడు మద్యం తాగాలనే కోరిక పెద్దగా ఉండదు. కానీ.. ఫంక్షన్లకు వెళ్లి, మద్యం తాగేవారిని కలిసినప్పుడు ఆ కోరిక ఒక్కసారిగా పెరిగిపోతుంది. తోటివారు బలవంతపెడితే తప్పని పరిస్థితుల్లో తాగేస్తుంటారు. అందుకే.. ఇలాంటి పార్టీలను స్కిప్ చేయాలని సూచిస్తున్నారు. ఒకవేళ అనివార్యంగా వెళ్లాల్సి వస్తే.. మద్యం తాగాలని ఎవరైనా బలవంతం చేస్తే.. డాక్టర్​ మందు మానేయాలని సీరియస్​గా చెప్పారు అని చెప్పండి. అప్పుడు మిమ్మల్ని ఎవరూ బలవంతం చేసే అవకాశం ఉండదు.

వ్యాయామం మొదలు పెట్టండి..

వ్యాయామం చేయడం వల్ల మనలో అద్భుతమైన ఎనర్జీ వస్తుంది. ఇది మందు మీదకు మనసు మళ్లకుండా చూస్తుందని నిపుణులు చెబుతున్నారు. ఎక్సర్​ సైజ్​ ఎంతో ఎఫెక్టివ్​గా పనిచేస్తుందని సూచిస్తున్నారు. దీంతోపాటుగా డైరీ రాసుకోవాలని.. అందులో మీ ఆరోగ్యం గురించి, కుటుంబ బాధ్యతలు, పిల్లల భవిష్యత్తు గురించి రాసుకోవాలని, వాటిని తరచూ చూసుకుంటూ ఉండాలని సూచిస్తున్నారు. ఈ పనులు పక్కాగా చేస్తే.. మీరు మద్యం మానేయడం కూడా తప్పకుండా జరిగి తీరుతుందని చెబుతున్నారు.