NBK 109 Villian Bobby Deol : నందమూరి బాలకృష్ణ నటిస్తున్న లేటెస్ట్ మూవీ 'NBK 109'. డైరెక్టర్‌ బాబీ దర్శకత్వంలో ఈ సినిమా రూపొందుతోంది. తాజాగా ఈ మూవీ నుంచి అదిరిపోయే అప్డేట్ను ఇచ్చారు మేకర్స్. ఈ మూవీలో బాలయ్యను ఢీ కొట్టే విలన్గా 'యానిమల్' స్టార్ను రంగంలోకి దింపనున్నట్లు కొద్ది రోజులుగా ప్రచారం సాగుతోంది. ఇప్పుడు దాన్ని నిజం చేస్తూ తాజాగా మేకర్స్ అఫీషియల్ అనౌన్స్మెంట్ ఇచ్చారు. ఈ చిత్రంలో బాబీ దేఓల్ నటిస్తున్నట్టు అధికారిక ప్రకటన చేశారు. నేడు(జనవరి 27) బాబీ దేఓల్ బర్త్‌డే సందర్భంగా ఆయన అప్‌కమింగ్ చిత్రాలపై అప్‌డేట్స్‌ వస్తున్నాయి. ఇందులో భాగంగానే ఈ అప్డేట్ కూడా వచ్చింది.
ఈ అప్డేట్ చూసిన నందమూరి ఫ్యాన్స్‌ ఫుల్ ఖుషీ అవుతున్నారు. నటసింహానికి సరైన విలన్ దొరికాడంటూ, దర్శకుడు బాబీ ఈ మూవీని ఏ లెవల్లో ప్లాన్‌ చేశారో బాబీ దేఓల్ ఎంపికతోనే అర్థమైపోతుదంటూ కామెంట్లు చేస్తున్నారు. థియేటర్లో పూనకాలు ఖాయమంటూ తెగ సంబర పడిపోతున్నారు.
ఇకపోతే 'భగవంత్‌ కేసరి' తర్వాత నటసింహం బాలకృష్ణ నటిస్తోన్న చిత్రమిది. పవర్‌ఫుల్‌ యాక్షన్‌ కథాంశంతో వస్తున్న ఈ సినిమా రెగ్యులర్‌ షూటింగ్ ఈ మధ్యే ప్రారంభమైంది. ఇప్పటికే 'బ్లడ్‌ బాత్‌కు బ్రాండ్‌ నేమ్‌ - వయలెన్స్‌కు విజిటింగ్‌ కార్డ్‌' అనే క్యాప్షన్‌తో రిలీజ్ చేసిన పోస్టర్‌ కూడా సినీ ప్రియులను బాగా ఆకర్షించింది. సితార ఎంటర్‌టైనర్‌మెంట్‌ పతాకంపై సూర్య దేవరనాగవంశీ, సాయి సౌజన్య దీన్ని నిర్మిస్తున్నారు.