2025 Sankranthi Release Movies : తెలుగు రాష్ట్రాల్లో జనవరి అనగానే భోగి, సంక్రాంతి పండగలే కాదు కొత్త సినిమాల సందడి కూడా మొదలవుతుంది. ప్రతి ఏడాది మాదిరిగానే, ఈసారి కూడా చాలా సినిమాలు సంక్రాంతి బరిలో నిలిచేందుకు రెడీ అవుతున్నాయి. ప్రస్తుతానికి రామ్‌చరణ్ 'గేమ్ ఛేంజర్', బాలకృష్ణ 'NBK109 (వర్కింగ్ టైటిల్‌)', వెంకటేశ్ 'సంక్రాంతికి వస్తున్నాం', సందీప్ కిషన్ 'మజాకా' సినిమాలు రేసులో ఉన్నట్లు స్పష్టమైంది. ప్రస్తుతం ఇవన్నీ కూడా షూటింగ్, పోస్ట్ ప్రొడక్షన్ పనుల్లో ఉన్నాయి.
మరోవైపు ఈ పండగ సీజన్‌లో భారీ బడ్జెట్‌ సినిమాలు రిలీజ్‌ కాబోతున్నాయి. ప్రొడ్యూసర్లు, డిస్ట్రిబ్యూటర్ల వందల కోట్ల డబ్బు ప్రేక్షకుల నిర్ణయంపై ఆధారపడి ఉంది. ముఖ్యంగా 2025 సంక్రాంతి సీజన్‌లో ఇద్దరు కీలకం కానున్నారు.
దిల్ రాజు 'గేమ్ ఛేంజర్' అవుతారా?
రాబోయే సంక్రాంతికి విడుదలయ్యే నాలుగు సినిమాల్లో మూడు దిల్ రాజుకి చెందినవే కావడం విశేషం. 'గేమ్ ఛేంజర్', 'సంక్రాంతికి వస్తున్నాం' చిత్రాలకు ఆయనే నిర్మాత. అలాగే 'NBK109' మూవీకి నైజాంలో డిస్ట్రిబ్యూటర్‌గా వ్యవహరిస్తున్నారు. దిల్ రాజుకి 2024వ ఏడాది పెద్దగా కలిసి రాలేదనే చెప్పాలి. ఆయన నిర్మాతగా 'ఫ్యామిలీ స్టార్', 'లవ్ మీ', 'జనక అయితే గనక' సినిమాలు బాక్సాఫీస్ వద్ద ఆశించిన స్థాయిలో టాక్ అందుకోలేకపోయాయి. అలానే నైజాంలో మహేష్ బాబు, త్రివిక్రమ్‌ కాంబోలో వచ్చిన 'గుంటూరు కారం' మూవీకి డిస్ట్రిబ్యూషన్‌ బాధ్యతలు తీసుకున్నారు. అది కూడా ఆశించిన ఫలితాన్ని అందించలేదు. ఇప్పుడు దిల్ రాజుకు 'గేమ్ ఛేంజర్', 'సంక్రాంతికి వస్తున్నాం', 'NBK109' విజయాలు చాలా కీలకం. ప్రధానంగా భారీ బడ్జెట్‌ సినిమా 'గేమ్ ఛేంజర్' సక్సెస్‌ అవ్వడం ముఖ్యం.