Health Insurance Claim Remember Things :నేటి కాలంలో చాలా మంది అనారోగ్యం వస్తే ఆదుకుంటుందని ఆరోగ్య బీమా పాలసీ తీసుకుంటున్నారు. అయితే, కొన్నిసార్లు ఆరోగ్య బీమా క్లెయిమ్స్ రిజెక్ట్ అవుతుంటాయి. అలాగే, కొన్ని సందర్భాల్లో అన్ని వివరాలను సరిగ్గా పేర్కొన్నా కూడా సెటిల్మెంట్ చేయడంలో తీవ్రమైన జాప్యం జరుగుతుంటోంది. కాబట్టి, మీరు తీసుకున్న హెల్త్ ఇన్సూరెన్స్ పాలసీ క్లెయిమ్ రిజెక్ట్ అవ్వకుండా ఉండాలంటే ఫైల్ చేసే ముందు ఈ విషయాలను తప్పక తెలుసుకోవాలంటున్నారు నిపుణులు. ఈ జాగ్రత్తలు తీసుకోవడం ద్వారా సకాలంలో ఆరోగ్య బీమా పాలసీని క్లెయిం చేసుకోవచ్చంటున్నారు. మరి, అవేంటో ఇప్పుడు చూద్దాం.
ఆరోగ్య బీమా పాలసీలు తీసుకున్న వారు ముందుగా పాలసీ క్లెయిం అంగీకరించకపోవడం, తిరస్కరణ ఈ రెండింటినీ సరిగా అర్థం చేసుకోవాలి. ముఖ్యంగా కంప్లీట్ ఇన్ఫర్మేషన్ లేకుండా, క్లెయింలో లోపాలు ఉండటం వల్ల పాలసీ క్లెయింను అంగీకరించకపోవచ్చు. ఇదేమీ శాశ్వతం కాదనే విషయాన్ని గుర్తుంచుకోవాలి. అలాంటి టైమ్లో బీమా సంస్థ చెప్పిన అభ్యంతరాలను సవరించి, తిరిగి క్లెయిం చేసుకోవచ్చు. కానీ, అదే పాలసీ క్లెయిం నిబంధనల పరిధిలోకి రాదు అనుకున్నప్పుడు బీమా సంస్థ దాన్ని తిరస్కరించే ఛాన్స్ ఉంటుంది. ఇలాంటి సందర్భాల్లో పరిహారం లభించడం కూడా కొంచెం కష్టమేనని తెలుసుకోవాలి.
క్లెయిం రిజెక్ట్ ఎందుకు అవుతుంది?
ముఖ్యంగా పాలసీ నిబంధనల్లో మినహాయింపుల కారణంగా హెల్త్ ఇన్సూరెన్స్ క్లెయింను తిరస్కరించే అవకాశం ఎక్కువగా ఉంటుంది. ఉదాహరణకు ఆరోగ్య బీమా పాలసీ తీసుకునేటప్పుడు కొన్ని వ్యాధులకు శాశ్వత మినహాయింపు అని పేర్కొనవచ్చు. అలాంటి సందర్భాల్లో ఆ వ్యాధి చికిత్స ఖర్చులను చెల్లించేందుకు బీమా కంపెనీ సముఖత చూపదు. అదేవిధంగా కొన్నిసార్లు ముందుగా ఉన్న వ్యాధులను వెల్లడించకపోయిన సందర్భాల్లోనూ క్లెయిం తిరస్కరిస్తుంది బీమా సంస్థ.
కారణం అర్థం చేసుకోవాలి :
పాలసీదారులు ముందుగా క్లెయిం తిరస్కరణకు గల కారణాన్ని తెలుసుకొని దాన్ని అర్థం చేసుకోవాలి. బీమా సంస్థ పేర్కొన్న కారణాలను విశ్లేషించుకోవాలి. పాలసీ నిబంధనలకు అనుగుణంగానే నిర్ణయం తీసుకున్నారా? లేదా? అని చెక్ చేసుకోవాలి. తిరస్కరణకు సరైన పత్రాలు లేకపోవడమే అని తెలిస్తే, వెంటనే వాటిని సబ్మిట్ చేయాలి. పాలసీదారులకు సరైన సహాయం అందించేందుకు బీమా సహాయ కేంద్రాలుంటాయి. వాటిని సంప్రదించి, మీ సమస్యను వివరించాలి. వారి నుంచి అవసరమైన స్పష్టత తీసుకోవాలి. తద్వారా మీ సమస్యకు పరిష్కారం దొరుకుతుంది.
ఒకవేళ మీకు వారు ఇచ్చిన సమాధానం నచ్చకపోతే బీమా సంస్థ ఫిర్యాదు సెల్‌ను సంప్రదించవచ్చు. ఐఆర్‌డీఏఐ మార్గదర్శకాల ప్రకారం 14 రోజుల్లో మీకు సమాధానం రావాలి. లేకపోతే గ్రీవెన్స్‌ రిడ్రెసల్‌ ఆఫీసర్‌ (జీఆర్‌ఓ)కి విషయాన్ని తెలియజేయవచ్చు.