Stock Market Today November 22, 2024 :వరుస నష్టాలతో కొట్టుమిట్టాడుతున్న దేశీయ స్టాక్ మార్కెట్లు శుక్రవారం తేరుకుని, భారీ లాభాలను మూటగట్టుకున్నాయి. అంతర్జాతీయ మార్కెట్ల నుంచి సానుకూల సంకేతాలు రావడం, బ్యాంకింగ్, ఐటీ స్టాక్స్ రాణించడమే ఇందుకు కారణం. ఒకానొక దశలో సెన్సెక్స్ 2000 పాయింట్లు మేర పెరిగింది.
చివరకు బొంబాయి స్టాక్ ఎక్స్ఛేంజీ సూచీ సెన్సెక్స్ 1961 పాయింట్లు లాభపడి 79,117 వద్ద స్థిరపడింది. జాతీయ స్టాక్ ఎక్స్ఛేంజ్ సూచీ నిఫ్టీ 557 పాయింట్లు వృద్ధి చెంది 23,907 వద్ద ముగిసింది.
- లాభపడిన షేర్లు :ఎస్బీఐ, టీసీఎస్, ఇన్ఫోసిస్, టైటాన్, ఐటీసీ, ఆల్ట్రాటెక్ సిమెంట్, ఎల్ అండ్ టీ, పవర్గ్రిడ్, హెచ్సీఎల్ టెక్, రిలయన్స్, బజాజ్ ఫైనాన్స్, భారతీ ఎయిర్టెల్, ఎన్టీపీసీ, ఐసీఐసీఐ బ్యాంక్, అదానీ పోర్ట్స్
- నష్టపోయిన షేర్లు : హెచ్డీఎఫ్సీ బ్యాంక్
కోలుకున్న అదానీ షేర్స్ :తమ వ్యాపారాభివృద్ధి కోసం, లాభాల కోసం గౌతమ్ అదానీ అధికారులకు లంచం ఇచ్చారనే అభియోగంతో అమెరికాలో ఓ కేసు నమోదైన విషయం తెలిసిందే. దీనితో గత సెషన్స్లో భారీగా నష్టపోయిన అదానీ షేర్లు, శుక్రవారం కోలుకుని లాభాల్లోకి దూసుకువచ్చాయి.
బొంబాయి స్టాక్ ఎక్స్ఛేంజీలో అదానీకి చెందిన అంబుజా సిమెంట్ 3.50 శాతం, ఏసీసీ 3.17 శాతం, అదానీ ఎంటర్ప్రైజెస్ 2.16 శాతం, అదానీ పోర్ట్స్ 2.05 శాతం, అదానీ టోటల్ గ్యాస్ 1.18 శాతం, ఎన్డీటీవీ 0.65 శాతం మేర పెరిగాయి.
కలిసొచ్చిన అంశాలు ఇవే!
- దేశీయ స్టాక్ మార్కెట్లు వరుస నష్టాలను చవిచూసినందున బ్లూచిప్ స్టాక్స్ భారీగా క్షీణించాయి. ఈ నేపథ్యంలో తక్కువ ధరకే ఫండమెంటల్గా స్ట్రాంగ్ ఉన్న బ్లూచిప్ స్టాక్స్ను కొనుగోలు చేసేందుకు మదుపరులు ఆసక్తి చూపించారు. ఫలితంగా ఎస్బీఐ, ఐసీఐసీఐ బ్యాంక్, రిలయన్స్ షేర్లు బాగా రాణించాయి.
- శుక్రవారం ఆసియా మార్కెట్లు లాభాల్లో ట్రేడవడం, గురువారం యూఎస్ మార్కెట్లు మంచి లాభాలతో ముగియడం కూడా ఇండియన్ మార్కెట్లకు కలిసొచ్చింది.
- అమెరికాలో విడుదలైన నిరుద్యోగ డేటా ప్రకారం, నవంబర్ నెలలో ఉద్యోగాల్లో వృద్ధి కనిపించింది. ఇది ప్రధానంగా ఐటీ స్టాక్స్కు కలిసివచ్చింది.
విదేశీ పెట్టుబడులు :స్టాక్ ఎక్స్ఛేంజీ డేటా ప్రకారం, గురువారం విదేశీ సంస్థాగత మదుపరులు రూ.5,320.68 కోట్ల విలువైన ఈక్విటీ షేర్లను అమ్మేశారు. మరోవైపు దేశీయ సంస్థాగత పెట్టుబడిదారులు రూ.4,200.16 కోట్ల విలువైన ఈక్విటీలను కొనుగోలు చేశారు.
ముడిచమురు ధరలు :అంతర్జాతీయ మార్కెట్లో ముడిచమురు ధరలు 0.19 శాతం మేర పెరిగాయి. ప్రస్తుతం బ్యారెల్ క్రూడ్ ఆయిల్ ధర 74.37 డాలర్లుగా ఉంది.
