How Many Time Filing Revised ITR: ఆదాయపు పన్ను పరిధిలోకి వచ్చే వారందరూ తమ ఆదాయం, పన్నులకు సంబంధించిన వివరాలతో ఐటీ రిటర్నులు ఫైల్ చేయాల్సి ఉంటుంది. ప్రస్తుతం ఇన్‌కమ్ ట్యాక్స్ రిటర్నుల దాఖలు చేసే గడువు దగ్గర పడుతోంది. చాలా మంది ఇప్పటికే తమ రిటర్నులు దాఖలు చేశారు కూడా. అయితే, ఏవైనా తప్పులు దొర్లినప్పుడు వాటిని సవరించుకునేందుకు ఇన్‌కమ్ ట్యాక్స్ విభాగం అవకాశం కల్పిస్తోంది. దానినే రివైజ్డ్ ఐటీఆర్ అంటారు. అంటే ప్రాథమిక ఇన్‌కమ్ ట్యాక్స్ రిటర్నుల్లో ఏమైనా తప్పులు ఉంటే సరిచేయడం, పాత సమాచారాన్ని తొలగించడం వంటివి చేయొచ్చు.
ఇన్‌కమ్ ట్యాక్స్ చట్టం 1961లోని సెక్షన్ 139(5) అనేది రివైజ్డ్ ఐటీఆర్ ఫైల్ చేసేందుకు అవకాశం కల్పిస్తుంది. తప్పులను సరిచేసుకుని కచ్చితమైన ట్యాక్స్ ఫైలింగ్ చేసేందుకు అవకాశం ఇస్తుంది. అయితే, 2023-24 ఆర్థిక సంవత్సరానికి సంబంధించి ఐటీఆర్ ఫైల్ చేసేందుకు గడువు 2024 జులై 31తో ముగిస్తుంది. ఆలోపే ఏదైనా చేయాల్సి ఉంటుంది. లేదంటే తర్వాత పెనాల్టీలు కట్టాల్సి వస్తుంది.
ఎన్నిసార్లు రివైజ్డ్ ఐటీఆర్ ఫైల్ చేయొచ్చు?
కొన్నిసార్లు తప్పుడు ఐటీఆర్ ఫామ్ ఫైల్ చేయడం, తప్పులు దొర్లలడం, సరైన సమాచారం లేకపోవడం వంటి కారణాలతో ఐటీఆర్ కరెక్షన్ చేయాల్సి వస్తుంది. అయితే, ఎన్నిసార్లు తప్పులు సరిచేసుకుని రివైజ్డ్ చేసేందుకు అవకాశం ఉంది? అనే ప్రశ్న చాలా మంది పన్ను చెల్లింపుదారుల్లో ఉండే ఉంటుంది. అయితే, ఐటీ నిబంధనల ప్రకారం గడువు ముగిసే వరకు ఎన్నిసార్లైనా మీ ఐటీఆర్‌లో తప్పులు సరి చేసుకోవచ్చు. సెక్షన్ 139(5) ప్రకారం రివైజ్డ్ ఐటీఆర్ ఫైల్ చేసే గడువు డిసెంబర్ 31 వరకు ఉంది. అయితే, పాత అసెస్మెంట్ సంవత్సరాలకు సంబంధించినవి అయితే మాత్రం ఐటీ విభాగం సూచించిన గడువు లోపు పూర్తి చేయాల్సి ఉంటుంది.