ITR ఫైల్​ చేయాలా? పాత, కొత్త ఇన్​కం ట్యాక్స్ స్లాబ్​ రేట్స్ ఇవే! - Income Tax Return Filing

Income Tax Return Filing : ఇన్​కం ట్యాక్స్​ రిటర్న్స్​ ఫైల్​ చేయడానికి సమయం దగ్గర పడుతోంది. మరి మనం పాత, కొత్త పన్ను చెల్లింపు విధానాల్లో దేన్ని ఎంచుకోవాలి? వీటి వల్ల కలిగే పన్ను ప్రయోజనాలు ఏంటి? ట్యాక్స్​ స్లాబ్​లు ఎలా ఉన్నాయి? అనే వివరాలు ఈ స్టోరీలో తెలుసుకుందాం.

Income Tax Return Filing :ఆదాయ పన్ను రిటర్నులు దాఖలు​ చేయడానికి ఉన్న తుది గడువు 2024 జులై 31. అంటే ఐటీఆర్​ దాఖలు చేయడానికి ఇంకా 45 రోజుల సమయం మాత్రమే ఉంది. పన్ను చెల్లింపుదారులు ప్రభుత్వం నిర్ణయించిన ట్యాక్స్ స్లాబ్​​ రేట్ల ప్రకారం ఆదాయపు పన్నులు చెల్లించాల్సి ఉంటుంది. అయితే ఇక్కడ పాత ట్యాక్స్​ రెజిమ్, కొత్త ట్యాక్స్​ రెజిమ్​ అనే రెండు రకాల పన్ను చెల్లింపు విధానాలు ఉన్నాయని ట్యాక్స్​ రిటర్న్స్​ ఫైల్​ చేసేవారు గుర్తుంచుకోవాలి. ఈ రెండింటికి వేర్వేరు ట్యాక్స్​ స్లాబ్స్ ఉంటాయి.

పాత పన్ను చెల్లింపు విధానానికి ప్రత్యామ్నాయంగా, కేంద్ర ప్రభుత్వం 2020 ఏప్రిల్ 1 (2020-2021 ఆర్థిక సంవత్సరం) నుంచి కొత్త ట్యాక్స్​ రెజిమ్​ను తీసుకొచ్చింది. వ్యక్తులు, హిందూ అవిభాజ్య కుటుంబాల(HUF)కు చెందిన పన్ను చెల్లింపుదారులు సులభంగా ట్యాక్స్​ రిటర్న్స్​ను దాఖలు చేసేందుకు ఈ విధానాన్ని అందుబాటులోకి తెచ్చింది. 2023-24 ఆర్థిక సంవత్సరానికిగాను ప్రవేశపెట్టిన బడ్జెట్​లో, కొత్త పన్ను విధానాన్ని డీఫాల్ట్​ ట్యాక్స్​ రెజిమ్​గా ప్రకటించారు విత్త మంత్రి నిర్మలా సీతారామన్.

కొత్త పన్ను విధానం
ఈ కొత్త పన్ను విధానం వ్యక్తులు, హిందూ అవిభాజ్య కుటుంబాలు(HUFs), అసోషియేషన్ ఆఫ్ పర్సన్స్(AOPs) వంటి వారికి ఒకే విధంగా వర్తిస్తుంది. రెండు రకాల పన్ను విధానాలు ఉన్న నేపథ్యంలో, పన్ను చెల్లింపుదారులు తమకు అనువైన విధానాన్ని ఎంచుకోవచ్చు. అయితే ఆ విషయాన్ని తమ యాజమాన్యానికి తెలియజేయాలి. ఒక వేళ తమ యాజమాన్యానికి తెలపకపోతే, ఆటోమెటిక్​గా కొత్త పన్ను విధానం ప్రకారంగా డిడక్షన్స్​ను ప్రాసెస్​ చేస్తారు. అయితే ఈ కొత్త పన్ను విధానానికి కొన్ని పరిమితులు ఉన్నాయి. హెచ్​ఆర్ఏ, ఎల్​టీఏ సహా సెక్షన్ 80సీ, సెక్షన్​ 80డీ కింద పన్ను మినహాయింపులు ఉండవు. ఇవి పాత పన్ను విధానంలో మాత్రం ఉంటాయి.

2024-25 ఆర్థిక సంవత్సరానికి ట్యాక్స్​ స్లాబ్​లు :

1. రూ.3 లక్షల వరకు - ఎలాంటి పన్ను వర్తించదు
2. రూ.3 లక్షల నుంచి రూ.6 లక్షల వరకు - రూ.3 లక్షల కంటే ఎక్కువ ఆదాయంపై 5% చెల్లించాలి.
3. రూ.6 లక్షల నుంచి రూ.9 లక్షల వరకు - రూ.15,000 + రూ.6 లక్షల కంటే ఎక్కువ ఆదాయంపై 10% చెల్లించాలి.
4. రూ.9 లక్షల నుంచి రూ.12 లక్షల వరకు - రూ.45,000 + రూ.9లక్షల కంటే ఎక్కువ ఆదాయంపై 15% చెల్లించాలి.
5. రూ.12 లక్షల నుంచి రూ.15 లక్షల వరకు - రూ.90,000 + రూ.12 లక్షల కంటే ఎక్కువ ఆదాయంపై 20% చెల్లించాలి.
6. రూ.15 లక్షలకు మించి ఆదాయం ఉంటే - రూ.1,50,000 + రూ.15 లక్షల కంటే ఎక్కువ ఆదాయంపై 30% పన్ను చెల్లించాలి.

కొత్త పన్ను విధానం మినహాయింపు జాబితా

• దివ్యాంగుల రవాణా అలవెన్సులు w.r.t.
• రవాణా భత్యం
• ప్రయాణం/ పర్యటనలు/ బదిలీ పరిహారం
• వాలంటరీ రిటైర్మెంట్ స్కీమ్ మినహాయింపులు u/ సెక్షన్ 10(10C)
• గ్రాట్యుటీ మొత్తం u/ సెక్షన్ 10(10)
• లీవ్ ఎన్‌క్యాష్‌మెంట్ u/ సెక్షన్ 10(10AA)
• అగ్నివీర్ కార్పస్ ఫండ్ u/ సెక్షన్ 80CCH(2)లో డిపాజిట్లపై తగ్గింపులు

పాత పన్ను విధానం
పాత పన్ను విధానంలో హెచ్​ఆర్​ఏ, లీవ్ ట్రావెల్ అలవెన్స్ (LTA)లపై, సెక్షన్‌లు 80C, 80D, 80CCD(1b), 80CCD(2) ప్రకారం ఇతర మినహాయింపులు ఉన్నాయి.

• రూ.2.5 లక్షల వరకు - ఎలాంటి పన్ను వర్తించదు.
• రూ.2.5 లక్షల నుంచి రూ.5 లక్షల వరకు - 5% పన్ను
• రూ.5 లక్షల నుంచి రూ.10 లక్షల వరకు - 20% పన్ను
• రూ.10 లక్షలకు మించి ఆదాయం ఉంటే - 30% పన్ను చెల్లించాలి.