సైఫ్ అలీ ఖాన్​ కేసులో ట్విస్ట్​- నిందితుడికి ఫేస్ రికగ్నిషన్ టెస్ట్- అసలు నేరస్థుడు ఇతడు కాదా?

సైఫ్‌పై దాడి కేసు నిందితుడి కస్టడీ 29 వరకు పొడిగింపు- సీసీటీవీలో ఉన్నది, అరెస్టయ్యింది ఒక్కరేనా కాదా? తేల్చనున్న పోలీసులు- నిందితుడికి ఫేషియల్ రికగ్నిషన్ టెస్ట్​ చేస్తామని వెల్లడి

Saif Stabbing Case :బాలీవుడ్ నటుడు సైఫ్ అలీఖాన్‌పై గతవారం దాడికి పాల్పడిన బంగ్లాదేశీయుడికి ఫేషియల్ రికగ్నిషన్ చేయాల్సి ఉందని ముంబయిలోని మెజిస్ట్రేట్ కోర్టుకు పోలీసులు తెలిపారు. దాడి జరిగిన రోజు సీసీటీవీ ఫుటేజీలో కనిపించిన వ్యక్తి, అరెస్టయిన నిందితుడు షరీఫుల్ ఇస్లామ్ షెహజాద్ అలియాస్ మహ్మద్ రొహిల్లా అమీన్ ఫకీర్ (30) ఒక్కరేనా, కాదా అనేది తేల్చడానికి ఫేషియల్ రికగ్నిషన్ చేస్తామన్నారు. షరీఫుల్ ఇస్లామ్ షెహజాద్‌ను శుక్రవారం ముంబయిలోని మెజిస్ట్రేట్ కోర్టు ఎదుట పోలీసులు ప్రవేశపెట్టారు.

ఈ కేసులో అరెస్టయిన వ్యక్తి (షరీఫుల్ ఇస్లామ్ షెహజాద్) తండ్రి ఇటీవలే కీలక వ్యాఖ్యలు చేశారు. "సైఫ్ నివాసంలోని సీసీటీవీ ఫుటేజీలో కనిపించిన వ్యక్తి నా కొడుకు కాదు. ఆ వ్యక్తి పోలికలతో ఉన్నాడనే నెపంతోనే నా కుమారుడిని అరెస్టు చేశారు" అని నిందితుడి తండ్రి ఆరోపించాడు. ఈ నేపథ్యంలో షరీఫుల్ ఇస్లామ్ షెహజాద్‌‌కు ఫేషియల్ రికగ్నిషన్ చేయడానికి పోలీసులు కోర్టును అనుమతి కోరడం గమనార్హం.

పోలీసుల వాదన
"సైఫ్ నివాసంలోని పాదముద్రలు, నిందితుడి పాదముద్రలు ఒకేలా ఉన్నాయా, లేదా అనేది మేం నిర్ధరణ చేసుకోవాల్సి ఉంది. సైఫ్ ఇంట్లోకి చొరబడిన సమయంలో నిందితుడు షరీఫుల్ ఇస్లామ్ షెహజాద్ ధరించిన షూ ఇంకా రికవర్ కాలేదు. సైఫ్‌పై దాడికి వినియోగించిన కత్తిలోని మిగతా భాగాన్ని రికవర్ చేయాల్సి ఉంది. నిందితుడు విచారణలో మాకు సహకరించడం లేదు" అని కోర్టుకు పోలీసులు వివరించారు. "నిందితుడి వద్ద బంగ్లాదేశీ డ్రైవింగ్ లైసెన్స్ దొరికింది. అయితే అతడు విజయ్ దాస్ పేరుతో భారత్‌లో నకిలీ ఆధార్, పాన్ కార్డులు తయారు చేసుకున్నాడు. ఇందుకోసం షరీఫుల్ ఇస్లామ్ షెహజాద్‌కు సహకరించిన వారిని గుర్తించాల్సి ఉంది" అని న్యాయస్థానానికి ముంబయి పోలీసులు తెలిపారు.

నిందితుడి తరఫు న్యాయవాదుల వాదన
అయితే పోలీసుల వాదనతో నిందితుడి తరఫు న్యాయవాదులు దినేశ్ ప్రజాపతి, సందీప్ షేర్ కహ్నే విభేదించారు. "అసలు సైఫ్‌పై దాడి జరిగిన ఘటనే నమ్మశక్యంగా లేదు. దాడి జరిగిన చాలాసేపటి తర్వాత సైఫ్ అలీఖాన్ నుంచి పోలీసులకు ఫిర్యాదు అందింది. ఎందుకింత జాప్యం చేశారు? నిందితుడిని ఇంకా పోలీసులకు రిమాండ్ చేయాల్సిన అవసరం లేదు. షరీఫుల్ ఇస్లామ్ షెహజాద్‌‌ను జ్యుడీషియల్ కస్టడీకి అప్పగిస్తే సరిపోతుంది" అని నిందితుడి తరఫు న్యాయవాదులు కోర్టును కోరారు. పోలీసుల తరఫున పబ్లిక్ ప్రాసిక్యూటర్లు కె.ఎస్.పాటిల్, ప్రసాద్ జోషి వాదనలు వినిపించారు. పోలీసుల వాదనతో ఏకీభవించిన జ్యుడీషియల్ మేజిస్ట్రేట్ కె.సి.రాజ్‌పుత్, నిందితుడి పోలీసు కస్టడీ గడువును జనవరి 29 వరకు పొడిగిస్తూ ఆదేశాలు జారీచేశారు.

జనవరి 16న ఘటన
దొంగతనం చేసేందుకు జనవరి 16న తెల్లవారుజామున సైఫ్‌ అలీఖాన్ నివాసంలోకి బంగ్లాదేశీయుడు షరీఫుల్ ఇస్లామ్ షెహజాద్ చొరబడ్డాడు. తనను పట్టుకోబోయిన సైఫ్‌పై అతడు కత్తితో ఆరు పోట్లు పొడిచాడు. అనంతరం అక్కడి నుంచి పరారయ్యాడు. అపార్ట్‌మెంట్ నుంచి దుండగుడు పారిపోవడం సీసీటీవీ కెమెరాల్లో రికార్డ్ అయింది. ఆ ఫుటేజీ ఆధారంగా విచారణ జరిపిన పోలీసులు జనవరి 19న నిందితుడిని అరెస్టు చేశారు.