ఓఆర్‌ఆర్‌ నుంచి గ్రీన్‌ఫీల్డ్​కు రహదారి - రెండు ప్యాకేజీల్లో పనులు పూర్తి

గ్రీన్​ఫీల్డ్​ రహదారి నిర్మాణం మొదలు - ఓఆర్‌ఆర్‌ నుంచి గ్రీన్‌ఫీల్డ్‌ రహదారికి టెండర్లు ఆహ్వానం - కొలిక్కి వచ్చిన భూ సేకరణ

Telangana Government To Build Ratan Tata Road : తెలంగాణ రాష్ట్ర ప్రభుత్వం ప్రతిష్ఠాత్మకంగా చేపడుతున్న స్కిల్​ సిటీ, ఫ్యూచర్ సిటీలకు సంబంధించి గ్రీన్​ఫీల్డ్​ రహదారి (రతన్ టాటా రోడ్డు) నిర్మాణం మొదలు కానుంది. ఈ ప్రాజెక్టుకు సంబంధించి పనుల కోసం హెచ్​ఎండీఏ మంగళవారం టెండర్లను ఆహ్వానించింది. రెండు ప్యాకేజీల్లో ఈ రహదారి నిర్మాణం పనులు పూర్తి చేయనున్నారు.

కొలిక్కి వచ్చిన భూ సేకరణ : ప్రస్తుతం అవుటర్ రింగ్ ​రోడ్డుని రావిర్యాల ఇంటర్​ఛేంజ్ 13 నుంచి ఆమన్​గల్​​ రీజినల్ రింగ్ రోడ్డు అనుసంధానంగా మొత్తం 41.50 కిలోమీటర్ల పొడవుతో ఈ గ్రీన్​ఫీల్డ్​ రహదారిని నిర్మించనున్నారు. ఇప్పటికే భూ సేకరణ ప్రక్రియ కూడా కొలిక్కి వచ్చింది. దీంతో పనులు చేపట్టేందుకు హెచ్​ఎండీఏ సమాయత్తమవుతోంది. తొలి దసలో రావిల్యాల్ ఇంటర్ ఛేంజ్ నుంచి మీర్​ఖాన్​పేట్​ వరకు 19.2 కిలోమీటర్ల మేర నిర్మించనున్నారు.

మార్చి 21న సాంకేతిక బిడ్లు : రెండో దశలో మీర్​ఖాన్​పేట్ నుంచి ఆమన్​గల్​ వరకు 22.30 కిలోమీటర్ల మేర అందుబాటులోకి రానుంది. రంగారెడ్డి జిల్లాలోని మహేశ్వరం, ఇబ్రహీంపట్నం, కందుకూరు, యాచారం, కడ్తాల్, ఆమన్​గల్ మండలాలు, 14 గ్రామాలను కలుపుతూ ఈ రహదారి అందుబాటులోకి రానుంది. టెండర్ పత్రాలు ఈ నెల 28 నుంచి సమర్పించాలని, మార్చి 21న సాంకేతిక బిడ్లు తెరవనున్నట్లు హెచ్​ఎండీఏ తెలిపింది.

• మొత్తం గ్రీన్‌ఫీల్డ్‌ రహదారి పొడవు- 41.5 కిలోమీటర్లు
• తొలి దశ- 19.2 కి.మీ(ఓఆర్‌ఆర్‌ రావిర్యాల నుంచి మీర్‌ఖాన్‌పేట్‌ వరకు)
• మొత్తం వ్యయం- రూ.1,665 కోట్లు
• రెండో దశ- 22.30 కి.మీ(మీర్‌ఖాన్‌పేట నుంచి రీజనల్‌ రింగ్‌ రోడ్డు ఆమన్‌గల్‌ వరకు)
• మొత్తం వ్యయం- రూ.2,365 కోట్లు
• వెడల్పు- 100 మీటర్లు (యాక్సెస్‌ కంట్రోల్‌ ఎక్స్‌ప్రెస్‌ వే) నిర్మాణం
• ఆరు లైన్ల మెయిన్‌ క్యారేజ్‌ వే భవిష్యత్తులో 8 లైన్లుగా విస్తరణకు వెసులుబాటుగా భూసేకరణ
• మెట్రో/రైల్వే కారిడార్‌ కోసం అటు ఇటు 20 మీటర్ల వెడల్పుతో భూమి రిజర్వు.పచ్చదనం కోసం 2 మీటర్ల వెడల్పుతో సెంట్రల్‌ మీడియన్‌
• ఇరువైపులా గ్రీన్‌బెల్ట్, సైకిల్‌ ట్రాక్, యుటిలిటీ కారిడార్‌ నిర్మించనున్నారు.