48ఓట్లతో గెలిచిన రవీంద్ర- 25ఏళ్లకే ఎంపీగా శాంభవి- సత్తా చాటిన ఆ ఆరుగురు! - Lok Sabha Election Results 2024

Lowest Margin Candidate In Lok Sabha Polls : సార్వత్రిక ఎన్నికల ఫలితాలు వచ్చేశాయి. అయితే ఈ ఎన్నికల్లో అతితక్కువ మెజార్టీతో గెలిచిన ఎంపీ ఎవరు? అత్యంత పిన్న వయసులో ఎంపీగా నిలిచిందెవరు? స్వతంత్రులు గెలిచిన స్థానాలు ఎన్ని? తదితర విషయాలు ఈ స్టోరీలో తెలుసుకుందాం.

Lowest Margin Candidate In Lok Sabha Polls : లోక్​సభ ఎన్నికల ఫలితాల్లో ఎన్​డీఏ మెజార్టీ మార్క్​ను సాధించి ప్రభుత్వ ఏర్పాటుకు సిద్ధమవుతోంది. అయితే ఈ సార్వత్రిక పోరులో చాలాచోట్ల అనూహ్య ఫలితాలు వచ్చాయి. నార్త్- వెస్ట్ ముంబయిలో మహారాష్ట్ర సీఎం ఏక్ నాథ్ శిందే వర్గం అభ్యర్థి రవీంద్ర వైకర్ కేవలం 48 ఓట్ల తేడాతో గెలుపొందారు. అలాగే బిహార్​లోని సమస్తీపుర్​లో ఎల్​జేపీ(ఆర్) తరఫున గెలిచిన శాంభవి చౌదరీ దేశంలోనే అత్యంత పిన్న వయసు ఎంపీగా నిలిచారు. మరోవైపు, ఈ ఎన్నికల్లో ఆరుగురు స్వతంత్రులు సత్తా చాటారు.

48ఓట్ల తేడాతో విజయం
శివసేన(యూబీటీ) అభ్యర్థి అమోల్ కీర్తికర్​పై శిందే వర్గం అభ్యర్థి రవీంద్ర వైకర్ ఈ లోక్​సభ ఎన్నికల్లో 48 తేడాతో గెలుపొందారు. రవీంద్ర వైకర్​కు 4,52,644 ఓట్లు రాగా, అమోల్ కీర్తికర్‌ కు 4,52,596 ఓట్లు వచ్చాయి. ఈ ఎన్నికల్లో మహారాష్ట్రలో మహావికాస్ అఘాడీ కూటమి ఎక్కువ సీట్లు గెలుచుకుని ఆధిపత్యం చెలాయించినా, నార్త్ వెస్ట్ ముంబయిలో మాత్రం శిందే వర్గం తరఫున పోటీ చేసిన రవీంద్ర వైకర్ విజయం సాధించారు.

అత్యంత పిన్న వయస్కురాలిగా రికార్డు
బిహార్​లో ఎన్​డీఏ మిత్రపక్షమైన ఎల్​జేపీ(ఆర్) సత్తా చాటింది. 5 స్థానాల్లో చిరాగ్ పాసవాన్ నేతృత్వంలోని ఆ పార్టీ విజయకేతనం ఎగురవేసింది. ఎల్​జేపీ(ఆర్) తరఫున సమస్తీపుర్ నుంచి పోటీ చేసిన శాంభవీ చౌధరీ కాంగ్రెస్ అభ్యర్థి సన్నీ హజారీపై 1,87,537 ఓట్ల తేడాతో విజయం సాధించి దేశంలోనే పిన్న వయస్కురాలైన ఎంపీగా నిలిచారు. ఎంపీగా ఎన్నికైన నాటికి శాంభవి వయసు(25ఏళ్ల 11 నెలల 20 రోజులు)మాత్రమే.

ప్రధాన మోదీతో శాంభవి (ETV Bharat)

సత్తా చాటిన స్వతంత్ర అభ్యర్థులు
2024 సార్వత్రిక ఎన్నికల్లో పలువురు స్వతంత్ర అభ్యర్థులు కూడా సత్తా చాటారు. ఆరు లోక్ సభ స్థానాల్లో ప్రధాన పార్టీ అభ్యర్థులను వెనక్కినెట్టి విజయకేతనం ఎగురవేశారు. జమ్ముకశ్మీర్​లో నేషనల్ కాన్ఫరెన్స్ నాయకుడు ఒమర్ అబ్దుల్లాపై ఇండిపెండెంట్ అభ్యర్థి అబ్దుల్ రషీద్ 1,86,000 ఓట్ల తేడాతో విజయం సాధించారు. మాజీ ప్రధాని ఇందిరా గాంధీ హంతకుల్లో ఒకరైన బియాంత్ సింగ్ కుమారుడు సరబ్జీత్ సింగ్ ఖల్సా పంజాబ్​లోని ఫరీద్‌కోట్ నుంచి స్వతంత్ర అభ్యర్థిగా పోటీ చేశారు. ఆయన తన ఆమ్ ఆద్మీ పార్టీకి చెందిన కరమ్‌ జిత్ సింగ్ అన్మోల్‌పై 66,000 ఓట్ల తేడాతో గెలుపొందారు.

2014, 2019 లోక్ సభ ఎన్నికల పోటీ చేసి విఫలమైన సురబ్జీత్ సింగ్ మూడోసారి విజయం సాధించారు. అలాగే పంజాబ్​లోని ఖదూర్ సాహిబ్ లోక్‌సభ స్థానం నుంచి వేర్పాటువాది అమృతపాల్ సింగ్ గెలిచారు. ఆయన ప్రస్తుతం అసోంలోని దిబ్రూగఢ్ జైలులో ఉన్నారు. మహారాష్ట్రలోని సాంగ్లీలో శివసేన (యూబీటీ) అభ్యర్థిపై ఇండిపెండెంట్‌గా పోటీ చేసిన విశాల్ ప్రకాశ్ బాపు పాటిల్ గెలుపొందారు. లద్దాఖ్ నుంచి పోటీ చేసిన మహ్మద్ హనీఫా జాన్, దమన్ డయ్యూ నుంచి పటేల్ ఉమేష్ భాయ్ బాబుభాయ్ విజయం సాధించారు.