పెళ్లికి రాని వరుడు- బావను వివాహం చేసుకున్న వధువు- ఆ పథకం డబ్బుల కోసమే!

Fraud In CM Samuhik Marriage Scheme : సామూహిక వివాహ వేడుకకు వరుడు రాలేకపోవడం వల్ల తన బావను పెళ్లి చేసుకుంది వధువు. ఈ ఘటన ఉత్తర్​ప్రదేశ్​లో జరిగింది. సీఎం సామూహిక వివాహ పథకం కింద ప్రభుత్వం ఇచ్చే ఆర్థికసాయం కోసమే ఆమె ఇలా చేసినట్లుగా సమాచారం.

Fraud In CM Samuhik Marriage Scheme :ముహూర్తం సమయానికి పెళ్లి కుమారుడు రాకపోవడం వల్ల మరో వ్యక్తిని వివాహం చేసుకుంది ఓ వధువు. ఈఘటన ఉత్తర్​ప్రదేశ్​లోని ఝూన్సీలో జరిగింది. సీఎం సామూహిక వివాహాల పథకం ప్రయోజనాలను పొందేందుకే వదువు ఇలా చేసినట్లు తెలుస్తోంది. ఈ వ్యవహారంపై సీరియస్​ అయిన ఉన్నతాధికారులు సమగ్ర దర్యాప్తునకు ఆదేశించారు.

ఇంతకీ ఏం జరిగిందింటే?
ఝాన్సీలోని ప్రభుత్వ పాలిటెక్నిక్ కళాశాల వేదికగా ముఖ్యమంత్రి సామూహిక వివాహ కార్యక్రమాన్ని నిర్వహించారు. ఈ కార్యక్రమంలో 132 జంటలు అంగరంగ వైభవంగా వివాహం చేసుకున్నాయి. ఇందులో పాల్గొనేందుకు సుదూర ప్రాంతాల నుంచి వధూవరులు వచ్చారు. ఇందులో ఝాన్సీ బామోర్​కు చెందిన ఖుషీ వివాహం మధ్యప్రదేశ్​లోని ఛతర్​పుర్​కు చెందిన బ్రిష్​భన్​తో నిశ్చయమైంది. ఈ సామూహిక వివాహ వేడుకలో పాల్గొనేందుకు రిజిస్ట్రేషన్​ కూడా చేయించుకున్నారు. వారిద్దరి పేరుతో 36 నంబర్ రిజిస్ట్రేషన్​ నమోదైంది. అయితే, ఖుషీ వివాహం బ్రిష్​భన్​తో జరగాల్సి ఉండగా అతడికి బదులుగా మరో వ్యక్తి వరుడిగా కనిపించాడు. దీనిపై వారిని అడగగా, 'పెళ్లి కుమారుడు రాలేకపోయాడు. కొంతమంది అధికారుల సలహా మేరకు బ్రిష్​భన్ స్థానంలో తాను వరుడిని అయ్యాను' అని నకిలీ వరుడు చెప్పాడు. అతడికి ఇదివరకే పెళ్లి అయ్యిందని, ఖుషీకి వరుసకు బావ అవుతారని తెలిసింది.

ప్రభుత్వం ఇచ్చే ఆర్థిక సహాయం కోసమే అతడు ఇలా చేసినట్లుగా సమాచారం. ఈ వ్యవహారంలో ఆ శాఖ అధికారులు, ఉద్యోగులు పాత్ర కూడా ఉందనే ఆరోపణలు ఉన్నాయి. దీనికపై జిల్లా సాంఘిక సంక్షేమ అధికారిణి లలితా యాదవ్ సమగ్ర విచారణకు ఆదేశించారు. ఈ వ్యవహారంపై విచారణ జరిపి బాధ్యలపై చర్యలు తీసుకుంటామని తెలిపారు. సీఎం సామూహిక వివాహాల పథకం కింద వివాహం చేసుకున్న జంటలకు రూ.51వేలు ఉత్తర్​ప్రదేశ్​ ప్రభుత్వం ఇస్తోంది. ఆ మొత్తంలో రూ.35వేలను వధువు బ్యాంకు ఖాతాలో జమ చేస్తారు. మరో రూ.10వేలను బహుమతుల కోసం, రూ.6వేలను వివాహ ఏర్పాట్ల కోసం ప్రభుత్వం ఇస్తుంది.