Man Bitten by Snake 7th Time in 40 Days : 40 రోజుల వ్యవధిలో ఏడు సార్లు పాము కాటుకు గురయ్యాడు ఓ యువకుడు. ఇంకా రెండు సార్లు సైతం పాము తనను కాటు వేస్తుందని కలలో వచ్చిందని తెలిపాడు. 9వసారి కాటు వేసిన తర్వాత ఎవరూ కాపాడలేరని చెప్పాడు. ఈ వింత ఘటన ఉత్తర్ప్రదేశ్లోని ఫతేపుర్లో జరిగింది.
ఇదీ జరిగింది
మాల్వా పోలీస్ స్టేషన్ పరిధిలోని సౌరా గ్రామానికి చెందిన వికాస్ ద్విదేది అనే యువకుడు సుమారు 40 రోజుల వ్యవధిలోనే ఏడుసార్లు పాము కాటుకు గురయ్యాడు. ప్రస్తుతం వికాస్ ఆస్పత్రిలో చికిత్స పొందుతున్నాడు. అతడి పరిస్థితి విషమంగా ఉందని వైద్యులు తెలిపారు. అయితే, ఇటీవల ఆరోసారి కాటు వేయగా వికాస్ ఆశ్చర్యపోయే విషయం బయటపెట్టాడు. తనకు వచ్చిన ఓ కల గురించి కుటుంబసభ్యులకు చెప్పాడు. తనను కలలో ఒకే పాము 9 సార్లు కాటు వేసిందని, చివరిసారి తనను ఎవరూ కాపాడలేరని వచ్చినట్లు వికాస్ వివరించాడు. ఎలాంటి చికిత్స అందించినా సరే 9వ సారి పాము కాటు నుంచి తనను ఎవరూ రక్షించలేరని తెలిపాడు. తనను ప్రతి సారి ఆడ పాము కాటు వేస్తుందని, అది కూడా శని లేదా ఆదివారాల్లో మాత్రమే వేస్తుందని చెప్పాడు. ఏదో హాని జరగబోతుందంటూ వికాస్ భయపడుతున్నాడని కుటుంబసభ్యులు తెలిపారు. మరోవైపు వికాస్కు చికిత్స అందించిన వైద్యులు సైతం ఆశ్చర్యం వ్యక్తం చేస్తున్నారు. వరుసగా వికాస్ను మాత్రమే పాములు ఎందుకు కాటు వేస్తున్నాయో అనే విషయం అర్థం కావడం లేదని తెలిపారు.