Delhi HC Female Wrestlers Security :భారత రెజ్లింగ్ సమాఖ్య-WFI మాజీ చీఫ్ బ్రిజ్ భూషణ్‌పై లైంగిక వేధింపుల ఆరోపణలు చేసిన మహిళా రెజ్లర్‌కు వెంటనే భద్రతను పునరుద్ధరించాలని దిల్లీ కోర్టు గురువారం నగర పోలీసులను ఆదేశించింది. అడిషనల్ చీఫ్ జ్యుడీషియల్ మేజిస్ట్రేట్ ప్రియాంక రాజ్‌పూత్ ఈ మేరకు మధ్యంతర ఉత్తర్వులు జారీ చేశారు. ఈ విషయంలో మహిళా రెజ్లర్ తన స్టేట్‌మెంట్‌ను రికార్డ్ చేయడానికి శుక్రవారం కోర్టుకు హాజరుకావాలని పేర్కొన్నారు.
ముగ్గురు రెజ్లర్లకు బుధవారం రాత్రి భద్రతను ఉపసంహరించుకున్నారని వారి తరఫున న్యాయవాది రెబెక్కా జాన్ పిటిషన్ దాఖలు చేశారు. దీనిపై విచారణ చేపట్టిన అడిషనల్ చీఫ్ జ్యుడీషియల్ మేజిస్ట్రేట్ ఈ మేరకు ఆదేశాలు జారీ చేశారు. రెజ్లర్లకు భద్రతను ఉపసంహరించుకోవడానికి గల కారణాలపై శుక్రవారంలోగా వివరణాత్మక నివేదికను సమర్పించాలని పోలీసులను ఆదేశించారు.
కోర్టులో బ్రిజ్ భూషణ్‌కు వ్యతిరేకంగా సాక్ష్యం చెప్పేందుకు సిద్ధంగా ఉన్న మహిళా రెజ్లర్ల భద్రతను పోలీసులు ఉపసంహరించుకున్నారని భారత అగ్రశ్రేణి రెజ్లర్ వినేష్ ఫోగాట ఎక్స్‌లో పోస్ట్ చేశారు. ఆ పోస్ట్‌ను దిల్లీ పోలీసులతో పాటు జాతీయ మహిళా కమిషన్, దిల్లీ కమిషన్‌కు ట్యాగ్ చేశారు.
క్లారిటీ ఇచ్చిన పోలీసులు!
భద్రత ఉపసంహరించారన్న రెజ్లర్ల ఆరోపణలపై పోలీసులు క్లారిటీ ఇచ్చారు. " రెజ్లర్లకు అందించిన భద్రతను ఉపసంహరించుకోలేదు. రెజ్లర్లు హరియాణాలో నివసిస్తారు కాబట్టి, భవిష్యత్తులో వారి భద్రత బాధ్యతను హరియాణా పోలీసులు నిర్వహించేలా ఆ రాష్ట్ర ప్రభుత్వానికి విజ్ఞప్తి చేయాలని నిర్ణయించాము. కానీ దీన్ని దిల్లీ పోలీసు PSOలు తప్పుగా అర్థం చేసుకున్నారు. ఈ విషయాన్ని నివేదించడంలో ఆలస్యం చేశారు. కానీ ఇప్పుడు పరిస్థితిని సరిదద్దాము. రెజ్లర్లకు సెక్యూరిటీ కంటిన్యూ అవుతుంది." అని న్యూదిల్లీ డీసీపీ ఎక్స్ వేదికగా తెలిపారు.