BJP Drops Sitting MPs : ఉత్తర భారత దేశంలో బలంగా కనిపిస్తున్నప్పటికీ సిట్టింగ్‌లను భారీ సంఖ్యలో మార్చింది బీజేపీ. 2019 లోక్సభ ఎన్నికల్లో లక్షల మెజారిటీతో గెలిచిన అభ్యర్థులనూ వివిధ కారణాలతో పక్కనబెట్టింది. గత ఎన్నికల్లో లక్ష నుంచి 6 లక్షల వరకు మెజారిటీతో గెలుపొందిన 39 మంది అభ్యర్థులను మార్చింది. ఈ లోక్ సభ ఎన్నికల్లో బీజేపీ పక్కన పెట్టిన అభ్యర్థుల్లో కేంద్ర సామాజిక న్యాయం, సాధికారశాఖ సహాయ మంత్రి ప్రతిమా భౌమిక్‌, జౌళిశాఖ సహాయ మంత్రి దర్శనా జర్దోస్‌ ఉన్నారు. గత ఎన్నికల్లో భౌమిక్‌ను త్రిపుర అసెంబ్లీ ఎన్నికల్లో పోటీ చేయించగా ఆమె గెలిచారు. అయితే, ఆమెను ముఖ్యమంత్రిని చేస్తారని భావించినా చివరి నిమిషంలో ఆ పదవి దక్కలేదు. దీంతో ఆమె కేంద్రంలోనే కొనసాగారు. 2019 ఎన్నికల్లో బీజేపీ అభ్యర్థులకు రాజస్థాన్‌, మధ్యప్రదేశ్‌, గుజరాత్‌, హరియాణా, దిల్లీల్లో భారీ మెజారిటీలు దక్కాయి. ఇందులో ఒక్క మధ్యప్రదేశ్‌లో మినహాయించి మిగిలిన 4 రాష్ట్రాల్లో బీజేపీ 100 శాతం సీట్లను కైవసం చేసుకుని తిరుగులేని ఆధిపత్యాన్ని ప్రదర్శించింది. ఇప్పుడూ అదే జోరును కొనసాగించేందుకు అభ్యర్థులను మార్చి పార్టీ కేడర్‌ను క్రియాశీలకంగా ఉంచే ప్రయత్నం చేసింది.
విమర్శలతో దక్కని స్థానం
ప్రజా జీవితంలో నిర్లక్ష్యంగా, అచేతనంగా ఉన్నవారిని, అత్యుత్సాహం ప్రదర్శిస్తూ మాటలు, చేతలతో పార్టీకి చెడ్డపేరు తెచ్చిన వారిని ఈ సారి పక్కనబెట్టింది. ప్రధానీ నరేంద్ర మోదీ స్వరాష్ట్రమైన గుజరాత్‌లో 9 మంది సిట్టింగ్‌లను ఇంటికి పంపింది. ఇందులో ప్రధాని ప్రాతినిధ్యం వహించిన వడోదరా ఎంపీ రంజనాబెన్ భట్‌ ఉన్నారు. ఆమెకు పార్టీ ప్రకటించిన తొలి జాబితాలో స్థానం కల్పించారు. ఆ తర్వాత రంజనాబెన్పై ఆస్ట్రేలియాలో హోటళ్లు ఉన్నాయనే ఆరోపణలు చుట్టుముట్టడం వల్ల పక్కనబెట్టింది. దిల్లీకి చెందిన మాజీ ముఖ్యమంత్రి సాహెబ్‌సింగ్‌ వర్మ కుమారుడు పర్వేష్‌ వర్మ, రమేష్‌ బిదూరి మైనారిటీలను ఉద్దేశించి చేసిన వ్యాఖ్యలు వారి అవకాశాలను దెబ్బతీసినట్లు చెబుతున్నారు. ఒక మతం చేసే వ్యాపారాలను బాయ్‌కాట్‌ చేయాలని ఒక బహిరంగ సభలో పర్వేష్‌ వర్మ చేసిన వ్యాఖ్యలు ఆయన రాజకీయ భవిష్యత్తును దెబ్బతీశాయి. అలాగే రమేష్‌ బిదూరి లోక్‌సభలో ప్రస్తుతం కాంగ్రెస్‌ తరఫున యూపీ నుంచి బరిలోకి దిగిన బీఎస్పీ ఎంపీ డానిష్‌ అలీకి వ్యతిరేకంగా చేసిన వ్యాఖ్యలు సీటు కోల్పోయేలా చేశాయి. భోపాల్‌ ఎంపీ సాద్వీ ప్రజ్ఞాసింగ్‌ ఠాకుర్‌ తొలగింపుకు కూడా ఇలాంటి కారణాలే ఉన్నాయి.
అసెంబ్లీ ఎన్నికల్లో గెలుపే
రాజస్థాన్‌కు చెందిన దియా కుమారి, రాజ్యవర్ధన్‌సింగ్‌ రాఠోడ్‌, బాబా బాలక్‌నాథ్‌, మధ్యప్రదేశ్‌ నుంచి ప్రహ్లాద్‌ పటేల్‌, రాకేష్‌ సింగ్‌ గత ఏడాది జరిగిన శాసనసభ ఎన్నికల్లో గెలుపొందడం వల్ల వారిని లోక్సభ బరి నుంచి తప్పించారు. ఈసారి ఎన్నికల్లో బీజేపీకి 370, ఎన్డీఏ కూటమికి 400కిపైగా సీట్లు రావాలని లక్ష్యంగా పెట్టుకున్న నాయకత్వం అభ్యర్థుల ఎంపికలో కేవలం విజయావకాశాలకే ప్రాధాన్యం ఇస్తోంది. పార్టీలో అంతర్గత కలహాలు, ఒకరిని ఒకరు దెబ్బ తీసుకునేందుకు ప్రయత్నించడం, అనవరమైన వ్యాఖ్యలు చేసి పార్టీని వివాదాల్లోకి లాగిన వారిని ఏమి ఆలోచించకుండా పక్కనబెడుతోంది. దీంతోపాటు సామాజిక సమీకరణాలకు పెద్దపీట వేస్తోంది.