சென்னை: 'கங்குவா' திரைப்படம் டிக்கெட் புக்கிங்கில் சாதனை படைத்து வருகிறது. ஸ்டுடியோ கிரீன் ஞானவேல் ராஜா தயாரிப்பில் சிவா இயக்கத்தில் சூர்யா, பாபி தியோல், திஷா பதானி உள்ளிட்ட பலர் நடித்துள்ள 'கங்குவா' திரைப்படம் வரும் நவம்பர் 14ஆம் தேதி உலகம் முழுவதும் வெளியாகிறது.
தமிழ், தெலுங்கு, மலையாளம், ஹிந்தி, கன்னடம் ஆகிய மொழிகளில் உலகம் முழுவதும் 11,000க்கும் மேற்பட்ட திரையரங்குகளில் பிரமாண்டமாக வெளியாகிறது. பிரமாண்ட பொருட்செலவில் தயாராகியுள்ள கங்குவா படத்தில் சூர்யா இரட்டை வேடத்தில் கங்குவா, ஃபிரான்சிஸ் ஆகிய கதாபாத்திரங்களில் நடித்துள்ளார்.
சூர்யா நடிப்பில் கடைசியாக ’எதற்கும் துணிந்தவன்’ திரைப்படம் கடந்த 2021ஆம் ஆண்டு பிப்ரவரி மாதம் திரையரங்குகளில் வெளியானது. இதனையடுத்து வெளியான சூர்யா படங்கள் சூரரைப் போற்று, ஜெய் பீம் ஆகியவை நேரடியாக ஓடிடியில் வெளியானது. இதனைதொடர்ந்து 2 வருடங்களுக்கு பிறகு சூர்யா நடிப்பில் பிரமாண்ட பொருட்செலவில் தயாராகியுள்ள கங்குவா திரைப்படம் திரையரங்குகளில் வெளியாகிறது.
கங்குவா திரைப்படம் ரசிகர்களுக்கு விருந்தாக இருக்கும் என நடிகர் சூர்யா ப்ரமோஷனில் தெரிவித்துள்ளார். கங்குவா ரிலீஸ் டிரெய்லர் மேலும் எதிர்பார்ப்பை அதிகரிக்க செய்துள்ளது. இந்நிலையில் கங்குவா திரைப்படம் அட்வான்ஸ் புக்கிங்கில் சாதனை படைத்து வருகிறது. பிரபல சினிமா வர்த்தக இணையதளம் வெளியிட்டுள்ள அறிக்கையின்படி, கங்குவா திரைப்படம் டிக்கெட் புக்கிங்கில் இதுவரை இந்திய அளவில் 2.3 கோடி வசூல் செய்துள்ளது.