சென்னை: பிரபல நடிகர் அஜித் தற்போது மகிழ் திருமேனி இயக்கத்தில் 'விடாமுயற்சி' மற்றும் ஆதிக் ரவிச்சந்திரன் இயக்கத்தில் 'குட் பேட் அக்லி' ஆகிய இரண்டு படங்களில் நடித்து வருகிறார். அஜித் நடித்து கடந்த வருடம் பொங்கல் பண்டிகைக்கு துணிவு திரைப்படம் வெளியானது. அதனைத் தொடர்ந்து அஜித் திரைப்படம் குறித்து எந்த அப்டேட்களும் வெளியாகாத நிலையில், மகிழ் திருமேனி இயக்கும் 'விடாமுயற்சி' படத்தில் கமிட்டானார்.
ஆனால் படப்பிடிப்பும் சில நேரங்களில் தள்ளிப் போனதால், படம் கைவிடப்பட்டதாக கோலிவுட் வட்டாரத்தில் தகவல் பரவிய நிலையில், மீண்டும் படப்பிடிப்பு தொடங்கியது. ஆனாலும் அஜித் படம் குறித்து எந்த வித தகவலும் வெளியாகாததால் ரசிகர்கள் ஏமாற்றத்தில் இருந்தனர். ஒரு பக்கம் 'விடாமுயற்சி' திரைப்பட படப்பிடிப்பு நடைபெற்று வந்த நிலையில், அஜித் திடீரென ஆதிக் ரவிச்சந்திரன் இயக்கத்தில் 'குட் பேட் அக்லி' படத்தில் கமிட்டானார். மைத்ரி மூவி மேக்கர்ஸ் தயாரிப்பில் இப்படத்தின் அப்டேட்டுகள் தொடர்ச்சியாக வெளிவந்தது.
மேலும் வரும் 2025 பொங்கல் பண்டிகைக்கு வெளியாகும் எனவும் அறிவிக்கப்பட்டது அஜித் ரசிகர்களை மகிழ்ச்சியில் ஆழ்த்தியது. அதே நேரத்தில் விடாமுயற்சி படக்குழு அமைதியாக படப்பிடிப்பு நடத்தி வந்தது. இந்நிலையில் கடந்த சில வாரங்களாக விடாமுயற்சி படக்குழு அப்டேட்டுகள் சமூக வலைதளங்களில் தொடர்ச்சியாக வெளியாகி வருகிறது.