சென்னை: தமிழ் சினிமாவின் வசூல் சக்கரவர்த்தியாக இருப்பவர் நடிகர் விஜய். இவர் தற்போது வெங்கட் பிரபு இயக்கத்தில் 'கோட்' திரைப்படத்தில் நடித்து வருகிறார். இந்த படம் செப்.5 ஆம் தேதி வெளியாக உள்ளது. இந்த படத்திற்கு இசையமைப்பாளர் யுவன் சங்கர் ராஜா இசையமைக்கிறார். சமீபத்தில் கோட் திரைப்படத்திலிருந்து 'விசில் போடு' பாடல் வெளியாகி ரசிகர்கள் மத்தியில் பெரும் வரவேற்பைப் பெற்றது.
தமிழ் சினிமாவில் சமீப காலமாக, சில திரைப்படங்கள் ரீ ரிலீஸ் செய்யப்பட்டு ரசிகர்கள் மத்தியில் பெரும் வரவேற்பைப் பெற்று வருகின்றன. அந்தவகையில், கடந்த 2004ஆம் ஆண்டு இயக்குநர் தரணி இயக்கத்தில் விஜய், த்ரிஷா நடித்து வெளியாகி மிகப்பெரிய வெற்றியைப் பெற்ற திரைப்படமான 'கில்லி'. நேற்று மீண்டும் ரீ ரிலீஸ் செய்யப்பட்டது.
ரீ ரிலீஸ் செய்யப்பட்ட முதல் நாளிலேயே அனைத்து திரையரங்குகளிலும் ஹவுஸ் ஃபுல் காட்சிகளாகக் கில்லி திரைப்படம் ஓடி வருகிறது என ரசிகர்களால் கூறப்படுகிறது. 20 வருடம் கழித்து வெளியானாலும் ரசிகர்கள் மட்டுமின்றி திரைப் பிரபலங்கள் மத்தியிலும் இப்படம் மிகுந்த வரவேற்பைப் பெற்று வருகிறது.