சென்னை: விக்னேஷ் சிவன், நயன்தாரா தம்பதியின் திருமண வீடியோ விரைவில் நெட்ஃபிளிக்ஸ் ஒடிடி தளத்தில் வெளியாகும் என தகவல் வெளியாகியுள்ளது. நடிகை நயன்தாரா, இயக்குநர் விக்னேஷ் சிவன் இருவரும் கடந்த 2015ஆம் ஆண்டு முதல் ’நானும் ரௌடி தான்’ திரைப்படம் முதல் காதலிக்க தொடங்கினர்.
இதனைத்தொடர்ந்து இருவரும் கடந்த 2022ஆம் ஆண்டு திருமணம் செய்து கொண்டனர். இந்த திருமணத்தில் ரஜினிகாந்த், ஷாருக்கான், அட்லீ, உள்ளிட்ட திரைப் பிரபலங்கள் பலர் கலந்து கொண்டனர். மிகவும் விமர்சையாக நடைபெற்ற இந்த திருமணத்தில் விக்னேஷ் சிவன் பட்டு வேஷ்டி சட்டையிலும், நயன்தாரா சிவப்பு நிற புடவையிலும் ரசிகர்களை கவரும் வண்ணம் இருந்தனர்.
இந்நிலையில் திருமண நிகழ்ச்சிகளை ஒரு ஆவணப் படமாக வெளியிடுவதற்கான உரிமத்தை பிரபல ஒடிடி நிறுவனம் நெட்ஃபிளிக்ஸ் பெற்றுள்ளது. மேலும் அந்த ஆவணப் படத்தை பிரபல இயக்குநர் கௌதம் மேனன் இயக்கியுள்ளார். இந்நிலையில் திருமணம் முடிந்து சில மாதங்களிலேயே இந்த ஆவணப் படத்தை நெட்ஃபிளிக்ஸ் நிறுவனம் வெளியிடவுள்ளதாக தகவல் வெளியானது.