சென்னை:தமிழ் சினிமாவில் முன்னணி நடிகர்களில் ஒருவராகத் திகழ்பவர் விஜய். இவர் தற்போது இயக்குநர் வெங்கட் பிரபு இயக்கத்தில் 'கோட்' திரைப்படத்தில் நடித்து வருகிறார். இந்த படத்தை ஏஜிஎஸ் நிறுவனம் தயாரிக்கிறது. இந்த படத்திற்கு யுவன் சங்கர் ராஜா இசையமைக்கிறார். இந்த படம் வருகின்ற செப்.5 ஆம் தேதி விநாயகர் சதுர்த்தியை முன்னிட்டு வெளியாகும் எனப் படக்குழு அறிவித்துள்ளது.
இந்த படத்தில் மீனாட்சி சவுத்ரி, பிரசாந்த், பிரபுதேவா, லைலா, வைபவ், மோகன், யோகிபாபு, விடிவி கனேஷ் உள்ளிட்ட பல நடிகர்கள் நடித்துள்ளனர். சித்தார்த்த நுனி ஒளிப்பதிவாளராக பணியாற்றி வருகிறார். இதில் விஜய் இரட்டை வேடத்தில் நடிக்கிறார் என்றும் கூறப்படுகிறது. தற்போது இப்படத்தின் படப்பிடிப்பு பணிகள் ரஷ்யாவில் நடைபெற்று வருவதாகக் கூறப்படுகிறது.
கோட் படத்தின் முதல் பாடல் பற்றிய ப்ரோமோவை படக்குழுவினர் நேற்று வெளியிட்ட நிலையில், தமிழ் வருடப் புத்தாண்டான இன்று (ஏப்.14) கோட் படத்தின் முதல் பாடல் வெளியாகி ரசிகர்கள் மத்தியில் பெரும் வரவேற்பைப் பெற்றுள்ளது. இந்த பாடலை பாடலாசிரியர் மதன் கார்க்கி எழுதியுள்ளார்.