டெல்லி: சென்னையில் கடந்த ஆண்டு சனாதன ஒழிப்பு மாநாடு நடைபெற்றது. இந்த மாநாட்டில் தமிழ்நாடு அமைச்சர் உதயநிதி ஸ்டாலின் பங்கேற்றார். அப்போது, டெங்கு, மலேரியா, கரோனாவை ஒழித்தது போல சனாதன தர்மத்தையும் ஒழிக்க வேண்டும் என பேசினார்.
இதனை அடுத்து, பிரதமர் மோடி உள்பட மத்திய அமைச்சர்களும், பாஜக நிர்வாகிகளும் அமைச்சர் உதயநிதி ஸ்டாலின் பேச்சுக்கு எதிராக கண்டனம் தெரிவித்தனர். உதயநிதி ஸ்டாலினின் சனாதன தர்மம் குறித்த பேச்சு மிகுந்த சர்ச்சையை ஏற்படுத்தியது.
இதனிடையே, அமைச்சர் உதயநிதி ஸ்டாலினின் சனாதனம் குறித்த பேச்சுக்கு எதிராக கர்நாடகா, பீகார், மகாராஷ்டிரா, ஜம்மு காஷ்மீர், உத்தரப்பிரதேசம் உள்ளிட்ட மாநிலங்களில் வழக்குகள் தொடரப்பட்டன. இந்த நிலையில், இந்த வழக்குகள் அனைத்தையும் ஒருங்கிணைத்து சென்னை உயர் நீதிமன்றத்துக்கு மாற்றக் கோரி உச்ச நீதிமன்றத்தில் உதயநிதி ஸ்டாலின் மனு ஒன்றைத் தாக்கல் செய்திருந்தார்.
இந்த மனு இன்று (ஆக.14) உச்ச நீதிமன்ற நீதிபதிகள் சஞ்சீவ் கன்னா, சஞ்சய் குமார் ஆகியோர் அடங்கிய அமர்வு முன்பாக விசாரணைக்கு வந்தது. அப்போது நீதிபதிகள், "அனைத்து வழக்குகளையும் ஒருங்கிணைத்து சென்னை உயர் நீதிமன்றத்துக்கு மாற்ற வேண்டும் என்ற கோரிக்கையை ஏற்க முடியாது" என்று மறுப்பு தெரிவித்தனர்.