புதுச்சேரி:புதுச்சேரி மாநிலம் காரைக்கால் நெடுங்காடு தொகுதியில் போட்டியிட்டு வெற்றி பெற்ற சந்திர பிரியங்கா. முதலமைச்சர் ரங்கசாமி தலைமையிலான அமைச்சரவையில் போக்குவரத்துத் துறை அமைச்சராக நியமனம் செய்யப்பட்டார். ஆனால் அவரது செயல்பாடு சரியில்லை எனக் கூறி கடந்த கடந்தாண்டு அக்.10தேதி அவர் பதவி நீக்கம் செய்யப்பட்டார்.
இதனையடுத்து 5 மாதங்களாய் அமைச்சர் பதவி காலியாக இருந்தது. இதனையடுத்து முதலமைச்சர் ரங்கசாமி பரிந்துரையின் பேரில், காரைக்கால் வடக்கு தொகுதி சட்டமன்ற உறுப்பினராக உள்ள திருமுருகனை அமைச்சராக நியமிக்கக் குடியரசுத் தலைவர் ஒப்புதல் அளித்தார். ஆனால் இரண்டு முறை அவரது பதவி தேதி அறிவிக்கப்பட்டு, பதவி ஏற்பு தள்ளி வைக்கப்பட்ட நிலையில், இன்று பதவி ஏற்பு விழா நடைபெற்றது.
ஆளுநர் மாளிகையில் நடந்த விழாவில் துணைநிலை ஆளுநர் தமிழிசை, என்.ஆர்.காங்கிரஸ் சட்டமன்ற உறுப்பினர். திருமுருகனுக்கு பதவிப் பிரமாணம் மற்றும் ரகசிய காப்பு பிரமாணம் செய்து வைத்தார். இந்த விழாவில் முதல்வர் ரங்கசாமி, சபாநாயகர் செல்வம்,அமைச்சர்கள் மற்றும் சட்டமன்ற உறுப்பினர்கள் பங்கேற்றனர். முதலமைச்சர் ரங்கசாமி தலைமையிலான அமைச்சரவையில் தற்போது என்.ஆர்.காங்கிரஸ் சார்பில் 3 அமைச்சர்கள், பாஜக சார்பில் 2 அமைச்சர்கள் உள்ளனர்.