ସ୍ୟାଣ୍ଡ ଆନିମେସନ୍ରେ ରାଣୀ ସାହେବା, ଶ୍ରଦ୍ଧାଞ୍ଜଳି ଜଣାଇଲେ ଯୁବ ବାଲୁକାଶିଳ୍ପୀ ସତ୍ୟ ମହାରଣା - ସୁଜ୍ଞାନ ଦେଓଙ୍କୁ ଶ୍ରଦ୍ଧାଞ୍ଜଳି
Published : Feb 10, 2024, 7:35 PM IST
Tributes Paid To V Sugnana Kumari Deo: ବ୍ରହ୍ମପୁର: ଗଞ୍ଜାମ ଜିଲ୍ଲା ଖଲ୍ଲିକୋଟ ରାଣୀ ସାହେବା ଭି.ସୁଜ୍ଞାନ କୁମାରୀ ଦେଓଙ୍କ ଗତକାଲି ରାତିରେ ପରଲୋକ ହୋଇଛି । ଚିକିତ୍ସାଧିନ ଅବସ୍ଥାରେ ଚେନ୍ନାଇର ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ରାଣୀ ସାହେବାଙ୍କ ଦେହାନ୍ତକୁ ନେଇ ସବୁଠି ଶୋକର ଛାୟା ଖେଳିଯାଇଛି । ଏଭଳି ସମୟରେ ବ୍ରହ୍ମପୁର ସହରର ଯୁବ ବାଲୁକାଶିଳ୍ପୀ ସତ୍ୟ ନାରାୟଣ ମହାରଣା ନିଜର କଳା ସ୍ୟାଣ୍ଡ ଆନିମେସନ୍ ମାଧ୍ୟମରେ ଖଲ୍ଲିକୋଟ ରାଣୀ ସାହେବାଙ୍କୁ ନିଜର ଶ୍ରଦ୍ଧାଞ୍ଜଳି ଜଣାଇଛନ୍ତି ।
ଗଞ୍ଜାମ ଜିଲ୍ଲାର ଖଲ୍ଲିକୋଟ ନିର୍ବାଚନ ମଣ୍ଡଳୀ ଏବଂ ପରବର୍ତ୍ତୀ ସମୟରେ ଜିଲ୍ଲାର କବିସୂର୍ଯ୍ୟନଗର ନିର୍ବାଚନ ମଣ୍ଡଳୀରେ କ୍ରମାଗତ ଭାବରେ ୧୦ ଥର ବିଧାୟିକା ଭାବରେ ନିର୍ବାଚିତ ହୋଇ ରାଜ୍ୟ ବିଧାନସଭାକୁ ଯାଇଥିବା ସୁଜ୍ଞାନ ଦେଓଙ୍କର ବ୍ରହ୍ମପୁର ସହର ପ୍ରତି ରହିଥିବା ଅନେକ ଅବଦାନକୁ ଏହି ଅବସରରେ ସମସ୍ତେ ସ୍ମରଣ କରିଛନ୍ତି । ବ୍ରହ୍ମପୁରର ସେହି ସମୟରେ ଖଲ୍ଲିକୋଟ କଲେଜ ତଥା ବର୍ତ୍ତମାନର ଖଲ୍ଲିକୋଟ ବିଶ୍ୱବିଦ୍ୟାଳୟ, କେ.ସି ପବ୍ଲିକ ସ୍କୁଲ ଠାରୁ ଆରମ୍ଭ କରି କେ.ସି ହାଇସ୍କୁଲ ଭଳି ଅନେକ ଶିକ୍ଷାନୁଷ୍ଠାନ ଗଢିଉଠିବା କ୍ଷେତ୍ରରେ ରହିଥିବା ଭୂମିକାକୁ ଏହି ଅବସରରେ ସମସ୍ତେ ସ୍ମରଣ କରିଛନ୍ତି । ରାଣୀଙ୍କ ପରଲୋକରେ ବିଶିଷ୍ଟ ଲୋକମାନେ ଶୋକ ପ୍ରକାଶ କରିଥିବା ବେଳେ ଯୁବ ବାଲୁକା ଶିଳ୍ପୀ ସତ୍ୟ ନାରାୟଣ ସ୍ୟାଣ୍ଡ ଆନିମେସନ୍ ମାଧ୍ୟମରେ ରାଣୀ ସାହେବାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି ।
ଏହା ମଧ୍ୟ ପଢ଼ନ୍ତୁ....ନିରବୀ ଗଲେ ଖଲ୍ଲିକୋଟ ରାଣୀ, ସବୁ ମହଲରେ ଶୋକର ଛାୟା
ଇଟିଭି ଭାରତ, ବ୍ରହ୍ମପୁର