ଅଗ୍ନିକାଣ୍ଡରେ ପୋଡିଗଲା ୨୦ରୁ ଊର୍ଦ୍ଧ୍ବ ଘର, ସର୍ବସ୍ବାନ୍ତ ହୋଇଗଲେ ପରିବାର ଲୋକ - fire broke out in Mayurbhanj
Published : May 7, 2024, 10:18 PM IST
Mayurbhanj fire incident: ରାଇରଙ୍ଗପୁର: ଆକସ୍ମିକ ଅଗ୍ନିକାଣ୍ଡ । ୨୦ ବଖରାରୁ ଊର୍ଦ୍ଧ୍ବ ଘର ଜଳି ଭସ୍ମିଭୂତ । ଏପରି ଅଭାବନୀୟ ଘଟଣା ଘଟିଯାଇଛି ମୟୂରଭଞ୍ଜ ଜିଲ୍ଲା ବଡ଼ସାହି ବ୍ଲକ କେନ୍ଦୁଡିହା ପଞ୍ଚାୟତ ଅନ୍ତର୍ଗତ କୁଳିଅଣା ବିନ୍ଧାଣିସାହିରେ । ଘରକୁ ଘର ଲାଗି ରହିଥିବା ଫଳରେ ନିଆଁ ଗୋଟିଏ ଘରରୁ ଅନ୍ୟ ଘରକୁ ବ୍ୟାପି ଯାଇଥିଲା । ଏହିଭଳି ଭାବରେ ୨୦ରୁ ଊର୍ଦ୍ଧ୍ବ ଘରେ ନିଆଁ ଲାଗି ଯାଇ ସମ୍ପୂର୍ଣ୍ଣ ଜଳି ପୋଡ଼ି ପାଉଁଶ ହୋଇ ଯାଇଥିଲା ।
ଘର ଜଳିଯିବା ସହିତ ଘରେ ଥିବା ନଗଦ ଟଙ୍କା, ଧାନ, ଚାଉଳ, ଦରକାରୀ କାଗଜପତ୍ର ସମେତ ଲକ୍ଷାଧିକ ଟଙ୍କାର ଆସବାବପତ୍ର ଜଳିପୋଡି ଛାରଖାର ହୋଇଯାଇଛି। ତେବେ କେଉଁ କାରଣରୁ ଅଗ୍ନିକାଣ୍ଡ ଘଟିଥିଲା ତାହା ଅସ୍ପଷ୍ଟ ରହିଛି। ହଠାତ୍ ଦେଖୁ ଦେଖୁ ଅଗ୍ନିଶିଖା ବ୍ୟାପିବା ସହ ସାହିରେ ଅଗ୍ନିକାଣ୍ଡ ଘଟି ଯାଇଥିଲା। ତେବେ ଘର ଗୁଡିକ ଜଳିବା ଦେଖି ସ୍ଥାନୀୟ ଲୋକେ ଅଗ୍ନିଶମ ବିଭାଗକୁ ଖବର ଦେଇଥିଲେ। ଖବର ପାଇ ବେତନଟୀ ଓ ବଡ଼ସାହିରୁ ଦମକଳ ବାହିନୀର କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା ଚଳାଇଥିଲେ।
ହେଲେ ସବୁ କିଛି ଜଳି ପୋଡ଼ି ପାଉଁଶ ହୋଇ ଯାଇଥିଲା। ତେବେ ଅଗ୍ନିକାଣ୍ଡ ନେଇ ଖବର ଦେବାର କିଛି ସମୟ ବିଳମ୍ବରେ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚିବାକୁ ନେଇ ଗ୍ରାମରେ ଉତ୍ତେଜନା ଦେଖା ଦେଇଥିଲା। ସେପଟେ ଖବର ପାଇ ସ୍ଥାନୀୟ ବିଡିଓ ଓ ଅତିରିକ୍ତ ତହସିଲଦାର ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିବା ସହିତ ସର୍ବହରା ପରିବାର ଲୋକଙ୍କୁ ଖଣ୍ଡେ ଖଣ୍ଡେ ପଲିଥିନ ଦେଇ ହାତ ଟେକି ଦେଇଥିଲେ। ତେବେ ସର୍ବସ୍ବାନ୍ତ ହୋଇ ଯାଇଥିବା ପରିବାର ଲୋକଙ୍କୁ ଆର୍ଥିକ ସହାୟତା ଯୋଗାଇ ଦେବାକୁ ସ୍ଥାନୀୟ ଲୋକେ ପ୍ରଶାସନ ନିକଟରେ ଦାବି କରିଛନ୍ତି।
ଇଟିଭି ଭାରତ, ରାଇରଙ୍ଗପୁର