ପ୍ୟାରିସରେ AI ଆକ୍ସନ ସମ୍ମିଳନୀ, ମୋଦି-ମାକ୍ରୋନ କରିବେ ଯୁଗ୍ମ ଅଧ୍ୟକ୍ଷତା

କୃତିମ ବୁଦ୍ଧିମତା ଭବିଷ୍ୟତ ସମ୍ପର୍କରେ ମିଳିତ ଆଲୋଚନା କରିବେ ମୋଦି-ମାକ୍ରୋନ । ବୁଧବାର ରାତିରେ ଆମେରିକା ଯିବେ ପ୍ରଧାନମନ୍ତ୍ରୀ । ଗୁରୁବାର ହ୍ବାଇଟ ହାଉସରେ ଟ୍ରମ୍ପ-ମୋଦି ଭେଟଘାଟ୍‌ ।

ହାଇଦ୍ରାବାଦ: 2 ଦିନିଆ ଫ୍ରାନ୍ସ ଗସ୍ତରେ ପ୍ୟାରିସରେ ପହଞ୍ଚିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଜି ପ୍ରଧାନମନ୍ତ୍ରୀ AI ଆକ୍ସନ ସମ୍ମିଳନୀରେ ଯୋଗଦେଇ ଫ୍ରାନ୍ସ ରାଷ୍ଟ୍ରପତି ମାକ୍ରୋନଙ୍କ ସହ AI ଆକ୍ସନ ସମ୍ମିଳନୀର ସହ-ଅଧ୍ୟକ୍ଷତା କରିବେ । ଗତକାଲି (ସୋମବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଫ୍ରାନ୍ସ ରାଜଧାନୀ ପ୍ୟାରିସରେ ପହଞ୍ଚିବା ପରେ ପ୍ରତିପକ୍ଷ ମାକ୍ରୋନ ତାଙ୍କୁ ବିମାନ ବନ୍ଦରରେ ଭବ୍ୟ ସ୍ବାଗତ କରିଥିଲେ ।

Welcome to Paris, my friend @NarendraModi! Nice to meet you dear @VP Vance! Welcome to all our partners for the AI Action Summit.

Let’s get to work! pic.twitter.com/yatkrVYv9x

— Emmanuel Macron (@EmmanuelMacron) February 10, 2025

କୃତ୍ରିମ ବୁଦ୍ଧିମତ୍ତା (ଏଆଇ) ପ୍ରଯୁକ୍ତିବିଦ୍ୟା କ୍ଷେତ୍ରରେ ନିୟମ ତିଆରି କ୍ଷେତ୍ରରେ ଆଲୋଚନା କରିବା ଏହି ବୈଠକର ମୁଖ୍ଯ ରଣନୀତି ରହିଛି । AI ସମ୍ମିଳନୀର ସହ-ଅଧ୍ୟକ୍ଷ ହେବା ପାଇଁ ଭାରତକୁ ଫ୍ରାନ୍ସର ନିମନ୍ତ୍ରଣ ନୂଆଦିଲ୍ଲୀର AI ପ୍ରତି ଆଭିମୁଖ୍ୟ ଏବଂ ନୂତନ ପ୍ରଯୁକ୍ତିବିଦ୍ୟା କ୍ଷେତ୍ରରେ ଅଗ୍ରଗତିକୁ ଦର୍ଶାଉଛି । ଚୀନ ପ୍ରଯୁକ୍ତିବିଦ୍ୟାରେ ବିଶ୍ବର ଅଗ୍ରଣୀ ଦେଶ ତାଲିକାରେ ଥିବା ବେଳେ ଭାରତର ଏହି ଆଭିମୁଖ୍ୟ ବେଶ ଗୁରୁତ୍ବ ରଖୁଛି । ଏପରି ସମୟରେ ଫ୍ରାନ୍ସର ଏହି ନିମନ୍ତ୍ରଣରେ ଭାରତର ଭାଗିଦାରୀ ଏବଂ ମୂଲ୍ୟବୋଧ ବେଶ ଗୁରୁତ୍ବପୂର୍ଣ୍ଣ ବୋଲି ବିଚାର କରାଯାଉଛି ।

• AI ଆକ୍ସନ ସମ୍ମିଳନୀ:

AI ଆକ୍ସନ ସମ୍ମିଳନୀ ବିଶ୍ବ ପାଇଁ ବେଶ ଗୁରୁତ୍ବ ବହନ କରିବ । ଏହି ସମ୍ମିଳନୀରେ ବିଶ୍ବସ୍ତରୀୟ ନେତା ଏବଂ ବଡ଼ ବଡ଼ AI କମ୍ପାନୀଗୁଡିକର ଅଧ୍ୟକ୍ଷ ଅଂଶ ଗ୍ରହଣ କରିବେ । ଯାହା କୃତ୍ରିମ ବୁଦ୍ଧିମତ୍ତା (AI)ର ଭବିଷ୍ୟତ ବିଷୟରେ ଆଲୋଚନା ହେବ । ଏଥିରେ ନବସୃଜନ ଏବଂ ନୈତିକ ବିକାଶକୁ ଅଧିକ ଧ୍ୟାନ ଦିଆଯିବ । ତେବେ ବୈଦେଶିକ ବ୍ୟାପାର ମନ୍ତ୍ରଣାଳୟର ସୂଚନା ଅନୁଯାୟୀ, ପ୍ରଧାନମନ୍ତ୍ରୀ ମୋଦିଙ୍କ ଏହି ଗସ୍ତରେ ଫ୍ରାନ୍ସ ରାଷ୍ଟ୍ରପତି ମାକ୍ରୋନଙ୍କ ସହ ଗୁରୁତ୍ବପୂର୍ଣ୍ଣ ଦ୍ବିପାକ୍ଷିକ ଆଲୋଚନା ହେବା କାର୍ଯ୍ୟକ୍ରମ ରହିଛି । ପ୍ରଧାନମନ୍ତ୍ରୀ ମୋଦି ରାଷ୍ଟ୍ରପତି ମାକ୍ରୋନଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିବେ । ଏହି ଆଲୋଚନାରେ ଭାରତ-ଫ୍ରାନ୍ସର ରଣନୈତିକ ସମ୍ପର୍କକୁ ଆହୁରି ସଦୃଢ କରିବା ଉଦ୍ଦେଶ୍ୟରେ ଅନେକ ଗୁରୁତ୍ବପୂର୍ଣ୍ଣ ପଦକ୍ଷେପ ଗ୍ରହଣ କରାଯାଇପାରେ ବୋଲି ବୈଦେଶିକ ମନ୍ତ୍ରଣାଳୟ ତରଫରୁ ସୂଚନା ମିଳିଛି ।

Delighted to meet my friend, President Macron in Paris. @EmmanuelMacron pic.twitter.com/ZxyziqUHGn

— Narendra Modi (@narendramodi) February 10, 2025

• ପ୍ୟାରିସରେ ପ୍ରଧାନମନ୍ତ୍ରୀ ମୋଦି :

ଏନେଇ ଗସ୍ତ ପୂର୍ବରୁ ପ୍ରଧାନମନ୍ତ୍ରୀ ମୋଦି କହିଥିଲେ,"ରାଷ୍ଟ୍ରପତି ମାକ୍ରୋନଙ୍କ ନିମନ୍ତ୍ରଣ କ୍ରମେ ମୁଁ 10ରୁ 12 ଫେବୃଆରୀ ଯାଏଁ ଫ୍ରାନ୍ସ ଗସ୍ତ କରିବି । ପ୍ୟାରିସରେ ମୁଁ AI ଆକ୍ସନ ସମ୍ମିଳନୀର ସହ-ଅଧ୍ୟକ୍ଷ ହେବାକୁ ଅପେକ୍ଷା କରିଛି । ବିଶ୍ବନେତା ଏବଂ ବଡ଼ ବଡ଼ ବୈଶୟିକ କମ୍ପାନୀଗୁଡ଼ିକର ଅଧ୍ୟକ୍ଷଙ୍କ ସମାବେଶ ହେବ । ଏଥିରେ ଆର୍ଟିଫିସିଆଲ ଇଣ୍ଟେଲିଜେନ୍ସ ତଥା କୃତିମ ବୁଦ୍ଧିମତ୍ତା ସମ୍ପର୍କରେ ଆଲୋଚନ ହେବ । ଏହି ଶକ୍ତିଶାଳୀ ପ୍ରଯୁକ୍ତିବିଦ୍ୟା ଜନସାଧାରଣଙ୍କୁ ଉତ୍ତମ ସେବା ପ୍ରଦାନ କରିବ ।"

• 'ରାଷ୍ଟ୍ରପତି ମାକ୍ରୋନଙ୍କୁ ଭେଟି ମୁଁ ଆନନ୍ଦିତ':

ପ୍ୟାରିସରେ AI ସମ୍ମିଳନୀର ସହ-ଅଧ୍ୟକ୍ଷ ହେବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରୋନ୍ ଭବ୍ୟ ସ୍ବାଗତ କରିଥିଲେ । ସେପଟେ ମୋଦି ଗତକାଲି ନିଜ ‘X’ରେ ପୋଷ୍ଟ କରି କହିଛନ୍ତି,"ପ୍ୟାରିସରେ ମୋର ବନ୍ଧୁ ରାଷ୍ଟ୍ରପତି ମାକ୍ରୋନଙ୍କୁ ଭେଟି ଆନନ୍ଦିତ ।" ସେହିପରି ରାତ୍ରିଭୋଜନରେ ପ୍ରଧାନମନ୍ତ୍ରୀ ଆମେରିକାର ଉପ-ରାଷ୍ଟ୍ରପତି ଜେଡି ଭାନ୍ସଙ୍କୁ ମଧ୍ୟ ଭେଟିଥିବା ସୂଚନା ମିଳିଛି । ଏହି ଗସ୍ତରେ ଦୁଇ ଦେଶର ଦ୍ୱିପାକ୍ଷିକ ପ୍ରସଙ୍ଗରେ ପ୍ରଧାନମନ୍ତ୍ରୀ ଅଧିକ ଗୁରୁତ୍ବ ଦେଇଛନ୍ତି । ରାଷ୍ଟ୍ରପତି ମାକ୍ରୋନଙ୍କ ସହ ଆଲୋଚନା 2047 ରୋଡମ୍ୟାପ୍ ଅଗ୍ରଗତିରେ ସହାୟକ ହେବ । ଭାରତ-ଫ୍ରାନ୍ସ ରଣନୈତିକ ଭାଗିଦାରୀକୁ ସୁଦୃଢ କରିବା ପାଇଁ ଏହା ଏକ ବ୍ୟାପକ ଯୋଜନା ହେବ ।’’

• ଭାରତର ନୂତନ ଦୂତାବାସ କାର୍ଯ୍ୟାଳୟ ଉଦଘାଟନ କରିବେ ମୋଦି :

ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି, "ଫ୍ରାନ୍ସର ଐତିହାସିକ ସହର ମାର୍ସେଲରକୁ ମଧ୍ୟ ଯାତ୍ରା କରିବୁ । ଯେଉଁଠାରେ ମୁଁ ଭାରତର ପ୍ରଥମ କନସୁଲେଟ୍ ଉଦଘାଟନ୍‌ କରିବି । ଏଥିସହ ମୁଁ ଅନ୍ତର୍ଜାତୀୟ ଥର୍ମୋନ୍ୟୁକ୍ଲିୟର ଏକ୍ସପେରିମେଣ୍ଟାଲ୍ ରିଆକ୍ଟର (ITER) ପରିଦର୍ଶନ କରିବି । ଯାହା ଏକ ଗୁରୁତ୍ବପୂର୍ଣ୍ଣ ପ୍ରକଳ୍ପ । ଫ୍ୟୁଜନ୍ ଶକ୍ତି ବ୍ୟବହାର କରିବାକୁ ଲକ୍ଷ୍ୟ ରଖାଯାଇଛି । ଯେଉଁଠାରେ ଭାରତ କନ୍ସୋର୍ଟିୟମର ପ୍ରମୁଖ ସଦସ୍ୟ ଭାବେ ରହିଛି ।" ପ୍ରଧାନମନ୍ତ୍ରୀ ମୋଦି ବିଶ୍ୱଯୁଦ୍ଧ ସମୟରେ ନିଜ ଜୀବନକୁ ଉତ୍ସର୍ଗ କରିଥିବା ଭାରତୀୟ ସୈନିକମାନଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଜଣାଇବେ ।

• ଭବ୍ୟ ସ୍ବାଗତ କଲେ ପ୍ରବାସୀ ଭାରତୀୟ

ପ୍ୟାରିସରେ ମୋଦି ଅବତରଣ କରିବା ପରେ ସେଠାରେ ରହୁଥିବା ପ୍ରବାସୀ ଭାରତୀୟଙ୍କ ଦ୍ବାରା ଭବ୍ୟ ସ୍ବାଗତ କରାଯାଇଥିଲା । ପ୍ରବାସୀ ଭାରତୀୟମାନେ ହାତରେ ତ୍ରିରଙ୍ଗା ଏବଂ “ଭାରତ ମାତା କି ଜୟ” ସ୍ଲୋଗାନ ସହ “ମୋଦି ମୋଦି” ନାରା ଦେଉଥିବା ଦେଖିବାକୁ ମିଳିଥିଲା ।

• ଆସନ୍ତାକାଲି ଯିବେ ଆମେରିକା:-

ଆଜି ଓ ଆସନ୍ତାକାଲି ଦୁଇଦିନିଆ ପ୍ୟାରିସ ଗସ୍ତ ଶେଷ କରିବା ପରେ ପ୍ରଧାନମନ୍ତ୍ରୀ ବୁଥବାର ରାତିରେ ଆମେରିକା ଅଭିମୁଖେ ଯାତ୍ରା କରିବେ । ସେଠାରେ ସେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ସାକ୍ଷାତ କରିବେ । ୨୦୨୪ ରେ ମୋଦି ପ୍ରଧାନମନ୍ତ୍ରୀ ଭାବେ ଓ ଟ୍ରମ୍ପ ଆମେରିକାର ରାଷ୍ଟ୍ରପତି ଭାବେ ନିର୍ବାଚିତ ହେବା ପରେ ଉଭୟ ରାଷ୍ଟ୍ରମୁଖ୍ୟଙ୍କ ମଧ୍ୟରେ ଏହା ପ୍ରଥମ ଭେଟଘାଟ୍‌ । ଉଭୟ ଦେଶର ମିଳିତ ପ୍ରସଙ୍ଗ ସହ ବୈଶ୍ବିକ ପ୍ରସଙ୍ଗରେ ମଧ୍ୟ ଉଭୟଙ୍କ ମଧ୍ୟରେ ଆଲୋଚନା ହେବ । ଟ୍ରମ୍ପଙ୍କ ଆକ୍ରମଣାତ୍ମକ ବାଣିଜ୍ୟ ଓ ଇମିଗ୍ରେସନ ନୀତି ମଧ୍ଯରେ ସାରା ବିଶ୍ବ ଭୟଭୀତ ଥିବା ବେଳେ ମୋଦିଙ୍କର ଏହି ଗସ୍ତ ଭୂ-ରାଜନୈତିକ ସ୍ଥିତିରେ ବେଶ ଗୁରୁତ୍ବପୂର୍ଣ୍ଣ ବିଚାର କରାଯାଉଛି । ଚୀନ ଓ ଅନ୍ୟ ବଡ ଆର୍ଥିକ ଶକ୍ତି ଉପରେ ଆମେରିକା ଟାରିଫ୍‌ ବୃଦ୍ଧି କରିଥିବା ବେଳେ ନୂଆଦିଲ୍ଲୀ ପ୍ରତି ସେପରି ଚରମ ଆଭିମୁଖ୍ୟ ଗ୍ରହଣ କରିନାହିଁ । ଯାହା ଟ୍ରମ୍ପ ପ୍ରଶାସନ ଓ ମୋଦି ସରକାର ମଧ୍ୟରେ ଉତ୍ତମ ସମ୍ପର୍କ ବୋଲି ଚର୍ଚ୍ଚା ହେଉଛି ।

ବ୍ୟୁରୋ ରିପୋର୍ଟ , ଇଟିଭି ଭାରତ