ହାଇଦ୍ରାବାଦ: କେନ୍ଦ୍ର ସରକାର ସିଭିଲ ରେଜିଷ୍ଟ୍ରେସନ ସିଷ୍ଟମ (CRS) ଆପ୍ ଲଞ୍ଚ କରିଛନ୍ତି । ଏହି ଆପରେ ଆପଣ ଘରେ ବସି ଜନ୍ମ ଏବଂ ମୃତ୍ୟୁ ପ୍ରମାଣପତ୍ର ପଞ୍ଜୀକରଣ କରିପାରିବେ । ମଙ୍ଗଳବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଜନ୍ମ ଏବଂ ମୃତ୍ୟୁ ପଞ୍ଜିକରଣ ପାଇଁ ଏହି ମୋବାଇଲ ଆପ୍ ଲଞ୍ଚ କରିଛନ୍ତି। ଏହି ଆପ୍ ପଞ୍ଜୀକରଣ ପ୍ରକ୍ରିୟାକୁ ସହଜ କରିବ ବୋଲି ଗୃହମନ୍ତ୍ରୀ କହିଛନ୍ତି ।
କେନ୍ଦ୍ର ଗୃହମନ୍ତ୍ରୀ ଶାହ କହିଛନ୍ତି, "ନାଗରିକମାନେ ବର୍ତ୍ତମାନ ଏହି ଆପରେ ଯେକୌଣସି ସମୟରେ ଯେକୌଣସି ସ୍ଥାନରେ ଏବଂ ନିଜ ରାଜ୍ୟର ସରକାରୀ ଭାଷାରେ ଜନ୍ମ ଓ ମୃତ୍ୟୁ ପ୍ରମାଣପତ୍ର ପାଇଁ ପଞ୍ଜୀକୃତ ହୋଇପାରିବେ । ଏହା ପଞ୍ଜୀକରଣ ପ୍ରକ୍ରିୟାକୁ ସରଳ ଏବଂ ସହଜ କରିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଡିଜିଟାଲ ଇଣ୍ଡିଆ ଦୃଷ୍ଟିକୋଣରେ ଶାସନ ସହିତ ଟେକ୍ନୋଲୋଜିକୁ ଏକୀଭୂତ କରିବା ପାଇଁ ଏହି ଆପ୍ଆରମ୍ଭ କରାଯାଇଛି । ଯାହା ପଞ୍ଜୀକରଣ ପାଇଁ ଆବଶ୍ୟକ ସମୟକୁ ହ୍ରାସ କରିବ ।"
| ଏହା ବି ପଢନ୍ତୁ |
ଜନ୍ମ ଏବଂ ମୃତ୍ୟୁ ପାଇଁ ଡିଜିଟାଲ ପଞ୍ଜୀକରଣ ଆବଶ୍ୟକ । ଏହି ଆପ୍ ରେଜିଷ୍ଟ୍ରାର୍ ଜେନେରାଲ୍ ଏବଂ ଭାରତର ଜନଗଣନା କମିଶନରଙ୍କ ଦ୍ବାରା ତିଆରି କରାଯାଇଛି । ଜନ୍ମ ଏବଂ ମୃତ୍ୟୁ (ସଂଶୋଧନ) ଅଧିନିୟମ 2023 ଅନୁଯାୟୀ, ଅକ୍ଟୋବର 1, 2023 ଠାରୁ ଦେଶର ସମସ୍ତ ଜନ୍ମ ଓ ମୃତ୍ୟୁକୁ କେନ୍ଦ୍ରୀୟ ପୋର୍ଟାଲ୍ dc.crsorgi.gov.in ମାଧ୍ୟମରେ ଡିଜିଟାଲ୍ ପଞ୍ଜୀକରଣ କରିବାକୁ ପଡ଼ିବ। ଇଲେକ୍ଟ୍ରୋନିକ୍ ବଣ୍ଟନ ପ୍ରକ୍ରିୟାକୁ CRS ସହଜ କରିବ । ଏହି ଆପ୍ ଜନ୍ମ ଏବଂ ମୃତ୍ୟୁ ପଞ୍ଜୀକରଣ ଏବଂ ପ୍ରମାଣପତ୍ରର ଇଲେକ୍ଟ୍ରୋନିକ୍ ବିତରଣର ସମଗ୍ର ପ୍ରକ୍ରିୟାକୁ ନିରବିହୀନ, ଦ୍ରୁତ ଏବଂ ସହଜ କରିବ । ଏହା କେନ୍ଦ୍ରୀୟ ଡାଟାବେସ୍ ଜାତୀୟ ଜନସଂଖ୍ୟା ରେଜିଷ୍ଟର (NPR), ରାସନ କାର୍ଡ, ସମ୍ପତ୍ତି ରେଜିଷ୍ଟର ଏବଂ ଭୋଟର ତାଲିକା ଅପଡେଟ୍ କରିବାରେ ସାହାଯ୍ୟ କରିବ ।
NPRରେ 119 କୋଟି ଲୋକଙ୍କ ତଥ୍ୟ:-
କେନ୍ଦ୍ରୀୟ ଡାଟାବେସ୍ ଜାତୀୟ ଜନସଂଖ୍ୟା ରେଜିଷ୍ଟର ପାଇଁ ତଥ୍ୟ ପ୍ରଥମେ 2010ରେ ସଂଗୃହିତ ହୋଇଥିଲା । ଏହି ତଥ୍ୟ 2015ରେ ଘର ଗଣନା ମାଧ୍ୟମରେ ଅପଡେଟ କରାଯାଇଥିଲା । ଏଥିରେ 119 କୋଟି ବାସିନ୍ଦାଙ୍କ ସୂଚନା ଅନ୍ତର୍ଭୁକ୍ତ । ନାଗରିକତ୍ବ ଅଧିନିୟମ ଅନୁଯାୟୀ ଜାତୀୟ ନାଗରିକ ରେଜିଷ୍ଟର ସୃଷ୍ଟି କରିବାରେ NPR ହେଉଛି ପ୍ରଥମ ପଦକ୍ଷେପ ।