କୁନି ଝିଅ ହାତରୁ ଫଟୋଚିତ୍ର ନେଲେ ପ୍ରଧାନମନ୍ତ୍ରୀ, ଖୁସିରେ ମାଗଣା ଚା' ବାଣ୍ଟିଲେ ପ୍ରଶଂସକ (EV Bharat Odisha) ପୁରୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁରୀ ଗସ୍ତରେ ଆସି ମହାପ୍ରଭୁଙ୍କୁ ଦର୍ଶନ କରିବା ସହ ବିଶାଳ ରୋଡ଼ ସୋ' କରିଛନ୍ତି । ପ୍ରଧାନମନ୍ତ୍ରୀଙ୍କ ଝଲକ ଟିକିଏ ପାଇବା ପାଇଁ ଶ୍ରୀମନ୍ଦିର ସିଂହଦ୍ଵାର ସମ୍ମୁଖ ଓ ବଡଦାଣ୍ଡରେ ହଜାର ହଜାର ଲୋକଙ୍କ ଭିଡ ଜମିଥିଲା । ଏହି ସମୟରେ ଏକ ନିଆରା ଦୃଶ୍ୟ ଦେଖିବାକୁ ମିଳିଥିଲା । ଭିଡ ଭିତରେ ଥିବା ଜଣେ କୁନି ଝିଅ ହାତରୁ ସେ ତିଆରି କରିଥିବା ଏକ ସୁନ୍ଦର ଫଟୋଚିତ୍ରକୁ ପ୍ରଧାନମନ୍ତ୍ରୀ ମୋଦି ଉପହାର ଭାବେ ଗ୍ରହଣ କରିଥିଲେ । ଯାହାକି ବେଶ୍ ଚର୍ଚ୍ଚାର ବିଷୟ ହୋଇଥିବା ବେଳେ ପ୍ରଧାନମନ୍ତ୍ରୀ ଛୋଟ ପିଲାଙ୍କୁ କିଭଳି ଭଲ ପାଆନ୍ତି ତାହା ପୁଣି ପ୍ରମାଣିତ ହୋଇଛି ।
ପୁରୀ ବାସିନ୍ଦା ରଶ୍ମିରେଖା ଦାସ ତାଙ୍କ ଝିଅ ପ୍ରସ୍ତୁତ କରିଥିବା ଏକ ଜଗନ୍ନାଥଙ୍କ ଏକ ଫଟୋଚିତ୍ର ଧରି ଠିଆ ହୋଇଥିଲେ । ଶ୍ରୀମନ୍ଦିରରୁ ଦର୍ଶନ ସାରି ଫେରିବା ବେଳେ କୁନି ଝିଅ ଉପରେ ପ୍ରଧାନମନ୍ତ୍ରୀଙ୍କ ଦୃଷ୍ଟି ପଡ଼ିଥିଲା । ସେ ସଙ୍ଗେ ସଙ୍ଗେ ଏସପିଜିକୁ ନିର୍ଦ୍ଦେଶ ଦେଇଥିଲେ କୁନି ଝିଅ ଓ ତାଙ୍କ ମାଆ ରଶ୍ମି ଦାସ ମହାପାତ୍ରଙ୍କୁ ପାଖକୁ ଆଣିବାକୁ । ସ୍ନାନବେଦୀରେ ମହାପ୍ରଭୁ ବସିଥିବା ଫୋଟୋ ଚିତ୍ର ଦେଖି ପ୍ରଧାନମନ୍ତ୍ରୀ ମୋଦି ଖୁସି ହୋଇଯାଇଥିଲେ । ସଙ୍ଗେ ସଙ୍ଗେ ଚିତ୍ରଟିକୁ ଗ୍ରହଣ କରିବା ସହ କୁନି ଝିଅକୁ ଭଲ ମଣିଷ ହୋଇ ଦେଶର ନାଁ ରଖିବାକୁ କହିଥିଲେ ଏବଂ ମୁଣ୍ଡରେ ହାତ ରଖି ଆଶୀର୍ବାଦ ଦେଇଥିଲେ ।
ଏହା ମଧ୍ୟ ପଢନ୍ତୁ: ପୁରୀରେ ପ୍ରଧାନମନ୍ତ୍ରୀଙ୍କ ବିଶାଳ ରୋଡ ସୋ', ଜନସମୁଦ୍ର ପାଲଟିଲା ବଡଦାଣ୍ଡ - PM Modi Roadshow
ପ୍ରଧାନମନ୍ତ୍ରୀ ମୋଦିଙ୍କ ଗସ୍ତକୁ ନେଇ ତାଙ୍କର ଅନେକ ପ୍ରଶଂସକ ଭିନ ଭିନ୍ନ ଢଙ୍ଗରେ ସ୍ଵାଗତ ଜଣାଇଥିଲେ । ଏହି ସମୟରେ ମୋଦିଙ୍କ ଜଣେ ବଡ ପ୍ରଶଂସକ ଭାବେ ଜଣାଶୁଣା ସହରର ଚା' ଦୋକାନୀ ଅକ୍ଷୟ ଜୟସିଂହ ଲୋକଙ୍କୁ ମାଗଣାରେ ୩ ହଜାର କପ ଚା' ବଣ୍ଟନ କରିଥିଲେ । ଅକ୍ଷୟ ତାଙ୍କ ଚା' ଦୋକାନ ଆଗରେ ପ୍ରଧାନମନ୍ତ୍ରୀଙ୍କ ଏକ ବଡ ତୋରଣ ଲଗାଇ ସ୍ଵାଗତ କରିଥିଲେ । ଏନେଇ ଅକ୍ଷୟ କହିଛନ୍ତି, ସେ ପ୍ରଧାନମନ୍ତ୍ରୀ ମୋଦିଙ୍କ ବଡ ଅନୁଗାମୀ । ତାଙ୍କ କାର୍ଯ୍ୟଧାରାକୁ ପ୍ରଶଂସା କରନ୍ତି । ମୋଦିଙ୍କ ଯୋଗୁଁ ଭାରତର ସମ୍ମାନ, ଗୌରବ ବଢ଼ିଛି । ତାଙ୍କ ଭଳି ଜଣେ ପରିଶ୍ରମୀ, ସଚ୍ଚୋଟ ବ୍ୟକ୍ତି ପ୍ରଧାନମନ୍ତ୍ରୀ ହେବା ଉଚିତ୍ । ତାଙ୍କ ଶାସନ କାଳରେ ଭାରତର ବହୁ ଉନ୍ନତି ହୋଇଛି । ଆମେ ତାଙ୍କୁ ସମର୍ଥନ ଦେବା ଉଚିତ୍ । ସେ ଆହୁରି ଭଲ କାର୍ଯ୍ୟ କରନ୍ତୁ । ଏହା ପୂର୍ବରୁ ମୋଦି ପ୍ରଧାନମନ୍ତ୍ରୀ ଭାବେ ଶପଥ ନେବା ଏବଂ ତାଙ୍କର ଜନ୍ମଦିନରେ ମଧ୍ୟ ଅକ୍ଷୟ ମାଗଣାରେ ଚା, ମିଠା ବଣ୍ଟନ କରିଥିଲେ । ଏଣୁ ଅକ୍ଷୟଙ୍କୁ ପୁରୀରେ ମୋଦିଙ୍କ ବଡ ପ୍ରଶଂସକ ବୋଲି କୁହାଯାଏ ।
ଆଜି ପୁରୀ କାର୍ଯ୍ୟକ୍ରମ ସାରି ପ୍ରଧାନମନ୍ତ୍ରୀ ଅନୁଗୋଳରେ ଏକ ନିର୍ବାଚନୀ ସଭାକୁ ସମ୍ବୋଧିତ କରିଥିଲେ । ଏହି ସମୟରେ ସ୍ଥାନୀୟ ଅଞ୍ଚଳର ଜଣେ ଦିବ୍ୟାଙ୍ଗ ବାଳକ ଶାରୀରିକ ଅକ୍ଷମତା ସତ୍ତ୍ବେ ହ୍ୱିଲଚେୟାରରେ ବସି ମୋଦିଙ୍କ ସଭାକୁ ଆସିଥିଲେ । ଏହି ଯୁବକ ହେଲେ ଅନୁଗୋଳର ଅଂଶୁମାନ ମହାପାତ୍ର । ପ୍ରଧାନମନ୍ତ୍ରୀ ଅଂଶୁମାନଙ୍କ ଫଟୋକୁ ନିଜର ସୋସିଆଲ ମିଡିଆରେ ସେୟାର କରି ଭାବବିହ୍ବଳ ପୋଷ୍ଟ କରିଛନ୍ତି ।
ଇଟିଭି ଭାରତ, ପୁରୀ
