ଭୀମଭୋଇ ହସ୍ପିଟାଲରୁ ନବଜାତ ନିଖୋଜ ଘଟଣା, ଅଭିଯୁକ୍ତ ଦମ୍ପତି ଅଟକ

Balangir new born baby Missing: ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ଓ ଡାକ୍ତରଖାନାରୁ ନିଖୋଜ ନବଜାତ ଶିଶୁକୁ ବୌଦ୍ଧରୁ ଉଦ୍ଧାର କରାଯାଇଛି । ଏଥିସହ ୨ ଅଭିଯୁକ୍ତଙ୍କୁ ଅଟକ ରଖି ପଚରାଉଚରା କରୁଛି ପୋଲିସ । ଅଧିକ ପଢନ୍ତୁ,

ବଲାଙ୍ଗୀର:ଜିଲ୍ଲାର ଭୀମ ଭୋଇ ମେଡିକାଲ କଲେଜ ଓ ଡାକ୍ତରଖାନାରୁ ନିଖୋଜ ନବଜାତ ଶିଶୁକୁ ବୌଦ୍ଧରୁ ଉଦ୍ଧାର କରାଯାଇଛି । ବୌଦ୍ଧ ଜିଲ୍ଲା ଘଣ୍ଟ ପଡ଼ାରୁ ଶିଶୁଟି ମିଳିଛି । ଗତକାଲି(ଶୁକ୍ରବାର) ଡାକ୍ତରଖାନାର ଏସଏନଏସୟୁରୁ ଏକ ନବଜାତ ନିଖୋଜ ହୋଇଯାଇଥିବା ନେଇ ଅଭିଯୋଗ ଆସିଥିଲା । ଯାହାକୁ ନେଇ ଡାକ୍ତରଖାନା ପରିସରରେ ଦୀର୍ଘ ସମୟ ଧରି ହଙ୍ଗାମା ଦେଖିବାକୁ ମିଳିଥିଲା । ପୋଲିସ ନବଜାତଟିକୁ ଉଦ୍ଧାର କରିବା ପରେ ପରିସ୍ଥିତି ଶାନ୍ତ ପଡିଥିଲା । ଅନ୍ୟପଟେ ଏହି ମାମଲାରେ ଜଣେ ଦମ୍ପତିିଙ୍କୁ ପୋଲିସ ଅଟକ ରଖି ପଚରାଉଚରା କରିବା ସହ ତଦନ୍ତ ଜାରି ରଖିଛି ।

ସୂଚନାଯୋଗ୍ୟ, ଜିଲ୍ଲାର ବରଡି ପଦର ଗ୍ରାମର ସୁଶୀଲ ସ୍ୱାଇଁଙ୍କ ପତ୍ନୀ ଗତକାଲି(ମଙ୍ଗଳବାର) କାନ୍ତାଲ ସ୍ୱାଇଁ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ। ତେବେ ଶିଶୁର ଓଜନ କମ ଥିବାରୁ ତାକୁ ଏସଏନଏସୟୁରେ ଭର୍ତ୍ତି କରାଯାଇଥିଲା । ହେଲେ ଶିଶୁର ସ୍ବାସ୍ଥ୍ୟ ପରୀକ୍ଷା ପରେ ଶିଶୁ ସୁସ୍ଥ ଥିବାରୁ ଡ଼ାକ୍ତର ତାଙ୍କୁ ନେଇଯିବାକୁ କହିଥିଲେ ଡାକ୍ତର । ଏହି ସମୟରେ ଅଭିଯୁକ୍ତ ଦମ୍ପତି ନିଜକୁ ସେହି ନବଜାତର ବାପା ମା କହି ଶିଶୁଟିକୁ ନେଇ ଫେରାର ହୋଇଯାଇଥିଲେ । ପରେ ଶିଶୁଟିର ପ୍ରକୃତ ପିତାମାତା ଏହା ଜାଣିପାରି ହସ୍ପିଟାଲର ଅବହେଳାକୁ ନେଇ ତୀବ୍ର ଅସନ୍ତୋଷ ପ୍ରକାଶ କରିବା ସହ ହଙ୍ଗାମା କରିଥିଲେ ।

ନବଜାତକର ପରିବାର ଓ ବିଭିନ୍ନ ସଙ୍ଗଠନ ଡାକ୍ତରଖାନା ପରିସରରେ ସକାଳୁ ରାତି ପର୍ଯ୍ୟନ୍ତ ହଙ୍ଗାମା କରି ଧାରଣା ଦେଇ ଥିଲେ । ହସ୍ପିଟାଲ ପରିସରରେ ଦୀର୍ଘ ସମୟ ଧରି ଉତ୍ତେଜନା ଦେଖିବାକୁ ମିଳିଥିଲା । ପୋଲିସ ନିକଟରେ ମଧ୍ୟ ଶିଶୁ ଚୋରୀ ନେଇ ଅଭିଯୋଗ ହୋଇଥିଲା । ଏହାପରେ ବଲାଙ୍ଗୀର ଟାଉନ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ବୌଦ୍ଧ ଜିଲ୍ଲା ଘଣ୍ଟପଡ଼ାରେ ନବଜାତକଟି ରହିଥିବା ଜାଣିବାକୁ ପାଇଥିଲା । ଶିଶୁଟିକୁ ଘଣ୍ଟପଡାରୁ ତୁରନ୍ତ ଉଦ୍ଧାର କରାଯାଇ ପ୍ରକୃତ ପରିବାରକୁ ହସ୍ତାନ୍ତର କରିଥିଲା । ଏହାପରେ ପରିସ୍ଥିତି ଶାନ୍ତ ପଡିଥିଲା ।

ଅନ୍ୟପଟେ ଏହି ମାମଲାରେ ପୋଲିସ ଏକ ଦମ୍ପତ୍ତିକୁ ଅଟକ ରଖିବା ସହ ତଦନ୍ତ ଜାରି ରଖିଛି । ତେବେ ବଲାଙ୍ଗୀର ହସ୍ପିଟାଲରେ ବାରମ୍ବାର ଏଭଳି ଘଟଣା ସାମ୍ନାକୁ ଆସୁଥିବା ବେଳେ ଏହା ବିରୋଧରେ କଡା କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।

ଇଟିଭି ଭାରତ, ବଲାଙ୍ଗୀର