ଆବୁଧାବି (ୟୁଏଇ) : ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନି 4 ବର୍ଷ ପୂର୍ବେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ । କିନ୍ତୁ, ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ରେ ଚେନ୍ନାଇ ସୁପର କିଙ୍ଗ୍ସ (CSK)ର 'ମେରୁଦଣ୍ଡ' ଏବେ ବି ଧୋନି । ଆଗାମୀ ଆଇପିଏଲ 2025 ପୂର୍ବରୁ କ୍ରିକେଟରଙ୍କ ରିଟେନ୍ସନ ପାଇଁ ବିସିସିଆଇ ଶନିବାର ନୂଆ ନିୟମ ପ୍ରଣୟନ କରିଛି, ଯେଉଁଠାରେ କ୍ରିକେଟରମାନେ 5 ବର୍ଷ ଧରି ଅନ୍ତର୍ଜାତୀୟ କ୍ରିକେଟ୍ ଖେଳିନଥିଲେ, ସେମାନଙ୍କୁ ଫ୍ରାଞ୍ଚାଇଜ ଚାହିଁଲେ ଅନ୍କ୍ୟାପଡ୍ ଖେଳାଳି ଭାବେ ରଖିପାରିବେ । ଏହାରି ଭିତରେ ଧୋନିଙ୍କୁ CSK ରିଟେନ କରିବା ନେଇ କଳ୍ପନାଜଳ୍ପନା ମଧ୍ୟରେ 'ବଲିଉଡ୍ର କିଙ୍ଗ' ଭାବେ ପରିଚିତ ଶାହାରୁଖ ଖାନଙ୍କ ଧୋନିଙ୍କୁ ନେଇ ଏକ ମନ୍ତବ୍ୟ ଇଣ୍ଟରନେଟରେ ଚର୍ଚ୍ଚାର ବିଷୟ ପାଲଟିଛି ।
ଧୋନିଙ୍କ ସହ ନିଜକୁ ତୁଳନା କଲେ ଶାହରୁଖ ଖାନ :-
ଆଇପିଏଲ୍ ଦଳ କୋଲକାତା ନାଇଟ୍ ରାଇଡର୍ସ (KKR) ମାଲିକ, 'କିଙ୍ଗ୍ ଖାନ' ନିକଟରେ ଏକ ଲୋକପ୍ରିୟ ପୁରସ୍କାର ସମାରୋହ IIFA କାର୍ଯ୍ୟକ୍ରମ ସମୟରେ ମାହିଙ୍କ ବିଷୟରେ ଏଭଳି ଏକ ମନ୍ତବ୍ୟ ଦେଇଥିଲେ, ଯାହା ସାମାଜିକ ଗଣମାଧ୍ୟମରେ ଖୁବ ଚର୍ଚ୍ଚାର ବିଷୟ ପାଲଟିଛି । ସୋସିଆଲ ମିଡିଆରେ ଭାଇରାଲ ହେଉଥିବା ଏକ ଭିଡିଓରେ ଶାହାରୁଖ ପ୍ରସିଦ୍ଧ ଫିଲ୍ମ ନିର୍ମାତା ତଥା ନିର୍ଦ୍ଦେଶକ କରଣ ଜୋହରଙ୍କ ସହ ନଜର ଆସିଛନ୍ତି । ଯେତେବେଳେ କରଣ ଶାହାରୁଖଙ୍କୁ ତାଙ୍କ ବଲିଉଡ୍ରୁ ଅବସର ଯୋଜନା ବିଷୟରେ ପଚାରିଥିଲେ, 'ବଲିଉଡର ବାଦଶାହା' ନିଜକୁ ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନିଙ୍କ ସହ ତୁଳନା କରିଥିଲେ ।
ଶାହରୁଖ ଖାନ କହିଥିଲେ, "ମୁଁ ଏକ ଭିନ୍ନ ପ୍ରକାରର କିମ୍ବଦନ୍ତୀ । ଧୋନି ଏବଂ ମୁଁ ବହୁତ ସମାନ । 'ନାଁ' କହିବା ପରେ ମଧ୍ୟ ଆମେ 10ଟି ଆଇପିଏଲ୍ ଖେଳି ସାରିଲୁଣି ।"