ଜଗତସିଂହପୁର: ବଡବାଗ ବାଣ ବିସ୍ଫୋରଣ ଘଟଣା । ଆଜି (ରବିବାର) ଘଟଣାସ୍ଥଳରେ ସାଇଣ୍ଟିଫିକ ଟିମ୍ ତଦନ୍ତ କରିଛି । ଗତକାଲି ମଧ୍ୟ ଭଗ୍ନାବଶେଷ ତଳୁ ବିସ୍ଫୋରଣର ରହସ୍ୟ ଖୋଜିଥିଲା ଟିମ୍ ।
ଭଗ୍ନାବଶେଷ ତଳୁ ବିସ୍ଫୋରଣର ରହସ୍ୟ ଖୋଜୁଛି ସାଇଣ୍ଟିଫିକ ଟିମ୍
ଅନ୍ୟପଟେ ବିସ୍ଫୋରଣ ଖବର ପାଇ ବିଳମ୍ବିତ ରାତ୍ରରେ ପୋଲିସ ଓ ଉଦ୍ଧାରକାରୀ ଟିମ୍ ପହଞ୍ଚି ତଦନ୍ତ କରିଥିଲେ । ଗତକାଲି (ଶୁକ୍ରବାର) ଓ ଆଜି 2 ଦିନ ଧରି ଜଗତସିଂହପୁର ସାଇଣ୍ଟିଫିକ ଟିମ୍ ପହଞ୍ଚି ତଦନ୍ତ ଜାରି ରଖିଛନ୍ତି । ଭଗ୍ନାବଶେଷ ତଳୁ ବିସ୍ଫୋରଣର ରହସ୍ୟ ଖୋଜୁଛନ୍ତି ସାଇଣ୍ଟିଫିକ ଟିମ୍ । ବିସ୍ଫୋରଣ ଘଟିଥିବା ବିଭିନ୍ନ ସ୍ଥାନରୁ ନମୁନା ସଂଗ୍ରହ କରି ତଦନ୍ତ କରୁଛି ଟିମ୍ ।
ବଡବାଗ ବାଣ ବିସ୍ଫୋରଣ ଘଟଣା
ଗତ ଶୁକ୍ରବାର ରାତି ପ୍ରାୟ 10ଟା 45ରେ ଜଗତସିଂହପୁର ପୌରାଞ୍ଚଳର ୱାର୍ଡ ନମ୍ବର-୨ ବଡବାଗ ଗ୍ରାମରେ ପ୍ରଚଣ୍ଡ ବିସ୍ଫୋରଣ ହୋଇଥିଲା । ପୂର୍ବତନ କାଉନସିଲର ସୁଶୀଲ ଦାସଙ୍କ ବଡ଼ ପୁଅ ରାଜେଶ ଦାସ ଓ ତାଙ୍କ ପତ୍ନୀ ସସ୍ମିତା ଦାସ ଘରେ ଥିବା ସମୟରେ ଏହି ବିସ୍ଫୋରଣ ଘଟିଥିଲା । ପ୍ରଚଣ୍ଡ ବିସ୍ଫୋରଣ ଶବ୍ଦରେ ପୁରା ଗାଁ ଥରି ଉଠିଥିଲା । ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ଘରଟି ସମ୍ପୂର୍ଣ୍ଣ ଭୁଶୁଡି ପଡିଥିଲା । ପାଖ ଘରଗୁଡିକରେ ମଧ୍ୟ ଫାଟ ସୃଷ୍ଟି ହୋଇଯାଇଥିଲା । ଘର ଭିତରେ ଥିବା ରାଜେଶ ଦାସ ଓ ତାଙ୍କ ପତ୍ନୀ ସସ୍ମିତାଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ସୁଶୀଲ ଦାସଙ୍କ ସାନ ପୁଅ ପରେଶ ଦାସ ଓ ତାଙ୍କ ପତ୍ନୀ ଲକ୍ଷ୍ମୀପ୍ରିୟା ଦାସ ଗୁରୁତର ଆହତ ହୋଇଥିଲେ । ଏହାପୂର୍ବରୁ 2005 ମସିହାରେ ଏହିଠାରେ ବାଣ ବିସ୍ଫୋରଣ ଘଟିଥିଲା । ପୂର୍ବତନ କାଉନସିଲର ପୂର୍ବରୁ ବାଣ ବ୍ୟବସାୟ କରୁଥିଲେ । ଚାଳ ଘରେ ବାଣ ରଖିଥିବା ବେଳେ ମଧ୍ୟ ବିସ୍ଫୋରଣ ହୋଇଥିଲା ।
ଜଗତସିଂହପୁରରେ ପୂର୍ବରୁ ଘଟିଥିବା ବିସ୍ଫୋରଣ
2003 ମସିହାରେ ଜଗତସିଂହପୁର ସଦର ଥାନା ଅନ୍ତର୍ଗତ ନବାପାଟଣା ଗ୍ରାମରେ ଏକ ଭୟଙ୍କର ବାଣ ବିସ୍ଫୋରଣ ହୋଇଥିଲା । ଏଥିରେ ବାଣ ବ୍ୟବସାୟୀ ପୂର୍ଣ୍ଣାନନ୍ଦ ସାହୁଙ୍କର ମୃତ୍ୟୁ ହୋଇଥିଲା । ବିସ୍ଫୋରଣ ଏତେ ଭୟଙ୍କର ଥିଲା ଯେ ଛାତ କଣା କରି ପୂର୍ଣ୍ଣାନନ୍ଦଙ୍କ ଶରୀର ବାହାରକୁ ବାହାରି ଆସିଥିଲା । ଏହି ଘଟଣାରେ ସୁକାନ୍ତ ସାହୁ ଓ ବଗା ସାହୁ ନାମକ ଦୁଇଜଣ ବ୍ୟକ୍ତି ଦିବ୍ୟାଙ୍ଗ ହୋଇ ଯାଇଥିଲେ ।
- 2005 ମସିହାରେ ବର୍ତ୍ତମାନ ବଡବାଗରେ ସୁଶୀଲ ଦାସଙ୍କ ଘରେ ବାଣ ବିସ୍ଫୋରଣ ହୋଇଥିଲା । ଏଥିରେ 3ଜଣ ଗୁରୁତର ହୋଇଥିଲେ, ସୁଶୀଲ ଦାସ ଅଳ୍ପକେ ବର୍ତ୍ତି ଯାଇଥିଲେ ।
- 2005ରେ ତିର୍ତ୍ତୋଲ ଥାନା ଅନ୍ତର୍ଗତ ସଅଁରଠାରେ ବାଣ ବିସ୍ଫୋରଣ ହୋଇଥିଲା । ବୋମା ଭିଡୁଥିବା ବେଳେ ବିସ୍ଫୋରଣ ହେବାରୁ ବାବାଜୀ ସାହୁଙ୍କ ଦୁଇପୁଅ ରଶ୍ମିକାନ୍ତ ସାହୁ ଓ କମଲେସ ସାହୁଙ୍କର ମୃତ୍ୟୁ ଘଟିଥିଲା ।
ଏହାମଧ୍ୟ ପଢନ୍ତୁ... ଭୟଙ୍କର ବାଣ ବିସ୍ଫୋରଣରେ ଉଡିଲା ଛାତ ଭାଙ୍ଗିଲା ଘର, 2 ମୃତ ସତ୍ୟନଗରରେ ଭୟଙ୍କର ଅଗ୍ନିକାଣ୍ଡ, ଜଳିଗଲା ଇଲେକ୍ଟ୍ରୋନିକ୍ସ ସାମଗ୍ରୀ |
- 2023 ଫେବ୍ରୁୁଆରୀ 28 ତାରିଖରେ ବାଲିକୁଦା ଥାନା ଅନ୍ତର୍ଗତ ଇଚ୍ଛାପୁରଠାରେ ବାଣଗୋଦାମରେ ବିସ୍ଫୋରଣ ଘଟି ଗୋଦାମ ମାଲିକ ସୁଶାନ୍ତ କୁମାର ପୃଷ୍ଟିଙ୍କ ସମେତ ତିନିଜଣଙ୍କର ମୃତ୍ୟୁ ହୋଇଥିଲା ।
- ସେହିପରି ଜଗତସିଂହପୁର ସହରର ଗୋପାଳସାଗର ଠାରେ ବାଣ ଧରି ଜଣେ ବ୍ୟକ୍ତି ସାଇକେଲରେ ଯିବା ସମୟରେ ସାଇକେଲଟି ପଡିଯିବାରୁ ବିସ୍ଫୋରଣ ହୋଇଥିଲା । ଏଥିରେ ଜଣଙ୍କର ମୃତ୍ୟୁ ହୋଇଥିଲା । ଶୁକ୍ରବାରର ବିସ୍ଫୋରଣ ଘଟଣା ଏହି ପୂର୍ବ ଘଟଣାଗୁଡିକୁ ତାଜା କରିଛି ।
ଇଟିଭି ଭାରତ, ଜଗତସିଂହପୁର
