ଲକ୍ଷ୍ନୌ:ବହୁଚର୍ଚ୍ଚିତ କାଶୀରଜ୍ଞାନବ୍ୟାପୀ ମସଜିଦ ମାମଲାରେ ହିନ୍ଦୁପକ୍ଷର ବଡ ବିଜୟ । ମସଜିଦ କ୍ୟାମ୍ପସରେ ପୂଜାର୍ଚ୍ଚନା କରିବା ପାଇଁ ବାରଣାସୀ କୋର୍ଟ ଅନୁମତି ଦେଇଛନ୍ତି । ରାୟକୁ ସ୍ବାଗତ କରିଛି ହିନ୍ଦୁପକ୍ଷ । ଏହା ସହ ଆସନ୍ତା ସପ୍ତାହେ ମଧ୍ୟର ପୂଜାର୍ଚ୍ଚନା ଆରମ୍ଭ କରାଯିବା ନେଇ ହିନ୍ଦୁପକ୍ଷ ପ୍ରସ୍ତୁତି ମଧ୍ୟ ଆରମ୍ଭ କରିଛି । ନିକଟରେ ଭାରତୀୟ ପ୍ରତ୍ନତାତ୍ତ୍ବିକ ବିଭାଗ (ଏଏସଆଇ) ଦ୍ବାରା ଶେଷ ହୋଇଥିବା ସର୍ଭେରେ ଏହି ମସଜିଦ ହିନ୍ଦୁ ମନ୍ଦିରର ଭଗ୍ନାବଶେଷ ଉପରେ ନିର୍ମାଣ ହୋଇଥିବା ପ୍ରମାଣ ମିଳିଥିଲା । ଯାହାର କପି କୋର୍ଟରେ ଦାଖଲ ହେବା ସହ ଉଭୟ ପକ୍ଷଙ୍କୁ ମଧ୍ୟ ହସ୍ତନ୍ତର କରାଯାଇଥିଲା । ତେବେ ପୂଜାର୍ଚ୍ଚନାର ସମସ୍ତ ବ୍ୟବସ୍ଥା 7 ଦିନ ମଧ୍ୟରେ ପ୍ରଶାସନ କରିବ ବୋଲି ନିର୍ଦ୍ଦେଶ ରହିଛି ।
ଏହି ରିପୋର୍ଟ ସାର୍ବଜନୀନ ହେବା ପରେ ଏହି ପ୍ରସଙ୍ଗରେ ଦେଶବ୍ୟାପୀ ପ୍ରତିକ୍ରିୟା ପ୍ରକାଶ ପାଇଥିଲା । ବିଶ୍ବହିନ୍ଦୁ ପରିଷଦ ସମେତ ଏକାଧିକ ହିନ୍ଦୁ ଓ ଦକ୍ଷଣପନ୍ଥୀ ସଂଗଠନ ଏହି ମସଜିଦକୁ ତୁରନ୍ତ ହିନ୍ଦୁପକ୍ଷକୁ ହସ୍ତାନ୍ତର କରିବା ପାଇଁ ମୁସଲିମ ପକ୍ଷକୁ ଆହ୍ବାନ କରିଥିଲେ । ସର୍ଭେ ରିପୋର୍ଟ ପ୍ରକାଶ ପାଇବାର ମାତ୍ର 7 ଦିନ ମଧ୍ୟରେ ସେଠାରେ ପୂଜାଚର୍ଚ୍ଚା କରିବାକୁ ହିନ୍ଦୁପକ୍ଷ ଅନୁମତି ମଧ୍ୟ ପାଇଛନ୍ତି । ଏହା ସହ ଉତ୍ତର ପ୍ରଦେଶ ସମେତ ଦେଶର ବିଭିନ୍ନ ସ୍ଥାନରେ ସେଲିବ୍ରେସନ ମଧ୍ୟ ଆରମ୍ଭ ହୋଇଗଲାଣି ।
ପୂର୍ବରୁ ବାରାଣାସୀ ଜିଲ୍ଲା କୋର୍ଟଙ୍କ ନିର୍ଦ୍ଦେଶରେ ହୋଇଥିବା କାର୍ବନଡେଟିଂ ସର୍ଭେରେ ମସଜିଦ କ୍ୟାମ୍ପସରେ ଏକ ଶିବଲିଙ୍ଗ ମିଳିଥିବା ହିନ୍ଦୁପକ୍ଷ ଦାବି କରିଥିଲେ । ଏହା ସହ ମସଜିଦ କ୍ୟାମ୍ପସରେ ପ୍ରବେଶ ଓ ପୂଜାର୍ଚ୍ଚନା ଅନୁମତି ପାଇଁ ଆଉ ଏକ ପୃଥକ ମାମଲା ମଧ୍ୟ ଦାଏର ହୋଇଥିଲା । ଏହାକୁ ମୁସଲିମ ପକ୍ଷ ଏକ ଓ୍ବାଟର ଫାଉଣ୍ଟେନ ବୋଲି କହିଆସୁଛି । ଏହି ସ୍ଥାନ ଏବେ ସିଲ ରହିଛି । ନିକଟରେ ଆହ୍ଲାବାଦ ହାଇକୋର୍ଟ ତଥାକଥିତ ଶିବଲିଙ୍ଗ ଥିବା ଏରିଆ ଓ ଏହାର ଚତୁଃପାର୍ଶ୍ବରେ ଥିବା ପାଣିଟାଙ୍କି ସଫା କରିବାକୁ ଅନୁମତି ଦେଇଛନ୍ତି । ବାରଣାସୀ ଜିଲ୍ଲା ମାଜିଷ୍ଟ୍ରେଟଙ୍କ ପ୍ରତ୍ୟେକ୍ଷ ତତ୍ତ୍ବବଧାନରେ ଏହି ସଫେଇ ଶେଷ ହେବ ।