ରାୟଗଡ଼ା:ଅନୁସୂୟା ମାଝୀଙ୍କୁ ରାୟଗଡା ନିର୍ବାଚନ ମଣ୍ଡଳୀରୁ ବିଜେଡି ବିଧାୟିକା ପ୍ରାର୍ଥୀ ଭାବେ ଟିକେଟ ମିଳିଛି । ଯାହାକୁ ନେଇ ଜିଲ୍ଲା ବିଜେଡିରେ ବିଦ୍ରୋହ ଦେଖିବାକୁ ମିଳିଛି ।ପୁରୁଖା ନେତା ଭାସ୍କର ରାଓଙ୍କୁ ଶିବିରରୁ ଏନେଇ ତେଜିଛି ବିରୋଧ । ଭାସ୍କର ରାଓଙ୍କ ଅନୁଗାମୀମାନେ ଅନୁସୂୟା ମାଝୀଙ୍କ ଟିକେଟକୁ ବିରୋଧ କରି ବିଜେଡିରୁ ଇସ୍ତଫା ଦେଇଛନ୍ତି । ଏହାକୁ ନେଇ ଜିଲ୍ଲାରେ ରାଜନୈତିକ ଉଷ୍ମତା ବଢିବାରେ ଲାଗିଛି । ଅନ୍ୟପଟେ ଅନୁସୂୟା ଆର୍ଶୀବାଦ ଭିକ୍ଷା ପାଇଁ ଭାସ୍କରଙ୍କ ପାଖକୁ ଯିବା ନେଇ ମଧ୍ୟ ରାଜନୀତି ଜୋର ଧରିଛି । ଦୀର୍ଘ ୫୦ବର୍ଷ ଧରି ରାୟଗଡ଼ା ଜିଲ୍ଲାର ବିଜେଡି ଦଳର ଟାଣୁଆ ନେତା ଭାବେ ସକ୍ରିୟ ରହିଆସିଛନ୍ତି ଭାସ୍କର ରାଓ ।
ଭାସ୍କରଙ୍କ ମତାମତ ନିଆ ନଯାଇ ରାୟଗଡ଼ା ନିର୍ବାଚନ ମଣ୍ଡଳୀର ବିଧାୟକ ପ୍ରାର୍ଥୀ ଭାବେ ଅନୁସୂୟା ମାଝୀଙ୍କୁ ଚୟନ କରିବାକୁ ସଜରେ ଗ୍ରହଣ କରିପାରୁନାହାନ୍ତି ଭାସ୍କର ସମର୍ଥକ । ଏପରିକି ଏହାକୁ ନେଇ ଭାସ୍କରଙ୍କ ଅନୁଗାମୀମାନେ ସାମ୍ବାଦିକ ସମ୍ମିଳନୀ କରି ଦଳର ଏହି ଚୟନ ପ୍ରକ୍ରିୟାକୁ ବିରୋଧ କରିଛନ୍ତି । ବହୁ ଆଶାୟୀଙ୍କ ସମେତ ବିଜେଡିରେ ଥିବା ବହୁ ନେତା ପ୍ରାଥମିକ ସଦସ୍ୟ ପଦ ଛାଡିଛନ୍ତି । ସୂଚନା ଅନୁସାରେ, ଗତକାଲି (ଶନିବାର) ଭାସ୍କର ରାଓଙ୍କ ବାସଭବନରେ ଗୋଟିଏ ବଡ଼ ସଭା ଅନୁଷ୍ଠିତ ହୋଇଥିଲା । ଭାସ୍କର ରାଓଙ୍କ ଉପସ୍ଥିତିରେ ତୁଙ୍ଗ ନେତାଏଁ ଜଣ ଜଣ କରି ରାଜ୍ୟ ବିଜେଡି ସଂଗଠନ ବିରୋଧରେ ଗର୍ଜି ଉଠିଥିଲେ । ଦଳର ଏଭଳି ଏକତରଫା ନିଷ୍ପତ୍ତିକୁ ତୀବ୍ର ବିରୋଧ କରିଛନ୍ତି ଦଳୀୟ କର୍ମୀ । ଏପରିକି ଟାଣୁଆ ନେତା ତଥା ରାଜ୍ୟ ବିଜେଡି ସମ୍ପାଦକ ଜଗଦୀଶ ପାତ୍ର ନିଜ ଭାଷଣରେ ରାଜ୍ୟର ନେତୃତ୍ୱମାନଙ୍କୁ ନିନ୍ଦା କରିଥିବା ଦେଖିବାକୁ ମିଳିଛି । ରାୟଗଡ଼ାରୁ ୫ଶହ କିଲୋମିଟର ଦୂର ଭୁବନେଶ୍ବରକୁ ଗଲେ ସେଠାରେ ରାଜ୍ୟ ସ୍ତରୀୟ ନେତାଙ୍କ ଏକ ମିନିଟ କଥା ହେବାପାଇଁ କାହା ପାଖରେ ସମୟ ରାହୁନଥିବା ନେଇ କ୍ଷୋଭ ପ୍ରକାଶ କରିଛନ୍ତି ଦଳୀୟ କର୍ମୀ ।