ଭୁବନେଶ୍ୱର:ପଦ୍ମ ଛାଡି ଶଙ୍ଖ ଫୁଙ୍କିଲେ ଅଭିନେତ୍ରୀ ଜିନା ସାମଲ । ବିଜେଡିରେ ଆଜି (ଶୁକ୍ରବାର) ବିଧିବଦ୍ଧ ଭାବେ ସାମିଲ ହୋଇଛନ୍ତି ଅଭିନେତ୍ରୀ ଜିନା(ସ୍ୱାତି) ସାମଲ । ଆଜି ସକାଳେ ସେ ବିଜେପିରୁ ଇସ୍ତଫା ଦେଇଥିବା ବେଳେ ବର୍ତ୍ତମାନ ବିଜେଡିରେ ଯୋଗ ଦେଇଛନ୍ତି । ଶଙ୍ଖ ଭବନରେ ଆୟୋଜିତ ଏହି ମିଶ୍ରଣ ପର୍ବରେ ସେ ବିଜେଡିରେ ମିଶିଛନ୍ତି । ବିଜେଡିର ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର ଓ ପ୍ରିୟବ୍ରତ ମାଝୀ ଉତ୍ତରୀୟ ଦେଇ ଜିନାଙ୍କୁ ଦଳରେ ସାମିଲ କରାଇଛନ୍ତି । ଜିନାଙ୍କ ଯୋଗଦାନ ଭୋଗରାଇ ତଥା ବାଲେଶ୍ଵର ଜିଲ୍ଲାରେ ବିଜେଡିକୁ ଆଉ ଟିକେ ମଜବୁତ କରିବା ବୋଲି ଦଳ ଆଶା ରଖିଛି ।
ବିଜେଡିରେ ସାମିଲ ହେବା ପରେ ଜିନା କହିଛନ୍ତି, "ଦଳରେ ସାମିଲ କରିଥିବାରୁ ବିଜେଡି ସଭାପତି ନବୀନ ପଟ୍ଟନାୟକଙ୍କୁ ଧନ୍ୟବାଦ । ଷ୍ଟାର ପ୍ରଚାରକ ଭାବେ ବିଜେଡି ଲାଗି କାର୍ଯ୍ୟ କରିଛି । ବିଜେଡି ଦଳରେ ମିଶାଇଥିବାରୁ ଧନ୍ୟବାଦ । ନାରୀ ସଶକ୍ତିକରଣ ପ୍ରକ୍ରିୟାରେ ସାମିଲ ହୋଇଥିବାରୁ ମୁଁ ଗର୍ବିତ । ସାରା ଓଡିଶାରେ ଧର୍ମ ଅନୁଷ୍ଠାନର ବିକାଶ ମୋତେ ପ୍ରଭାବିତ କରିଛି । 2036ରେ ଓଡିଶାକୁ ବିକଶିତ ରାଜ୍ୟ ଗଠନ କରିବାରେ ମୁଖ୍ୟମନ୍ତ୍ରୀଙ୍କ ପ୍ରଚେଷ୍ଟା ଜାରି ରହିଛି । ଏହି ପ୍ରକ୍ରିୟାରେ ମୁଁ ମଧ୍ୟ ସାମିଲ ହେବି । ମୋ ଦ୍ୱାରା ଯାହା ସମ୍ଭବ ତାହା କରିବାକୁ ପ୍ରତିଶ୍ରୁତିବଦ୍ଧ । ବିଜେଡିକୁ ସବୁବେଳେ ଓଡିଶାବାସୀ ଭରଷା କରି ଆସିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସହଯୋଗ କରୁଛନ୍ତି ।"