ମୁମ୍ବାଇ: ଷ୍ଟଣ୍ଟ ପ୍ରଦର୍ଶନ କରିବା ବଲିଉଡ ଅଭିନେତା ବିଦ୍ୟୁତ ଜାମୱାଲଙ୍କ ପାଇଁ ପଡିଲା ମହଙ୍ଗା । ଅଭିନେତାଙ୍କୁ ହେପାଜତକୁ ନେଇଛି ମୁମ୍ବାଇ ରେଲୱେ ପୋଲିସ । ବାନ୍ଦ୍ରାସ୍ଥିତ ରେଳୱେ ପୋଲିସ (ଆରପିଏଫ) କାର୍ଯ୍ୟାଳୟରୁ ଏକ ଫଟୋ ସାମ୍ନାକୁ ଆସିଛି, ଯେଉଁଥିରେ ଅଭିନେତା କାର୍ଯ୍ୟାଳୟରେ ବସିଥିବାର ନଜର ଆସିଛନ୍ତି । ଏହା ବାନ୍ଦ୍ରା ରେଳ ଷ୍ଟେସନ ପ୍ଲାଟଫର୍ମ ନମ୍ବର ୧ର ଆରପିଏଫ କାର୍ଯ୍ୟାଳୟର ବୋଲି ଜଣାପଡିଛି । ଏହି ଫଟୋ ବେଶ ଭାଇରାଲ ହେଉଛି । ରିପୋର୍ଟ ଅନୁଯାୟୀ, ଅଭିନେତାଙ୍କୁ ବିପଦପୂର୍ଣ୍ଣ ଷ୍ଟଣ୍ଟ କରିଥିବା ଅଭିଯୋଗରେ ରେଲୱେ ପୋଲିସ ଅଭିନେତାଙ୍କୁ ଅଟକ ରଖି ପଚରାଉଚରା କରୁଛି । ହେଲେ ଏପର୍ଯ୍ୟନ୍ତ ଏନେଇ ପୋଲିସ ପକ୍ଷରୁ କୌଣସି ଅଫିସିଆଲ ସୂଚନା ମିଳି ପାରିନାହିଁ ।
ବିଦ୍ୟୁତ ଜାମୱାଲ ଚଳଚ୍ଚିତ୍ରରେ ଆକ୍ସନ ସିନ୍ କରିବା ପାଇଁ ବେଶ ଜଣାଶୁଣା । ଜଣେ ଅଭିନେତା ହେବା ବ୍ୟତୀତ ସେ ଜଣେ ମାର୍ଶଲ ଆର୍ଟିଷ୍ଟ ମଧ୍ୟ । ସେ 'କମାଣ୍ଡୋ' ଚଳଚ୍ଚିତ୍ର ସହ ଦର୍ଶକଙ୍କ ମଧ୍ୟରେ ଲୋକପ୍ରିୟ ହୋଇଥିଲେ । ଫିଲ୍ମଫେୟାର ବ୍ୟତୀତ ସେ ଅନେକ ପୁରସ୍କାର ଜିତିଛନ୍ତି । ସେ 'ଶକ୍ତି' ଚଳଚ୍ଚିତ୍ର ସହିତ ତେଲୁଗୁ ସିନେମାରେ ଡେବ୍ୟୁ କରିଥିଲେ । ଫିଲ୍ମ 'ଫୋର୍ସ' ସହ ହିନ୍ଦୀ ସିନେମାରେ ପ୍ରବେଶ କରିଥିଲେ । ଫିଲ୍ମ 'କମାଣ୍ଡୋ'ରେ ସେ ପ୍ରଥମ ଥର ପାଇଁ ମୁଖ୍ୟ ଭୂମିକାରେ ନଜର ଆସିଥିଲେ । ଏହାପରେ ସେ 'ଅନଜାନ', 'ବାଦଶାହୋ', 'କମାଣ୍ଡୋ ୨', 'ଜଙ୍ଗଲି', 'ୟାରା', 'କମାଣ୍ଡୋ 3' ଏବଂ 'ସନକ' ଭଳି ଚଳଚ୍ଚିତ୍ରରେ ମଧ୍ୟ ଅଭିନୟ କରି ଦର୍ଶକଙ୍କ ମନ ଜିତିଛନ୍ତି ।