ହାଇଦ୍ରାବାଦ:ବର୍ତ୍ତମାନ କୌନ ବନେଗା କରୋଡପତି ସିଜନ 16 ସୋନି ଟିଭିରେ ଆରମ୍ଭ ହୋଇଯାଇଛି । ଏଥର ନୂଆ ଶୈଳୀରେ ଅମିତାଭ ବଚ୍ଚନ ଫେରିଥିବା ବେଳେ ଏହି ଶୋ'କୁ ଲୋକେ ବେଶ ପସନ୍ଦ କରୁଛନ୍ତି । ବର୍ତ୍ତମାନ ଶୋ'ର ଲାଟେଷ୍ଟ ପ୍ରମୋ ରିଲିଜ ହୋଇଛି । ଯେଉଁଥିରେ ପ୍ୟାରିସ ଅଲିମ୍ପିକ୍ସ 2024 ରେ ଭାରତ ପାଇଁ ଦୁଇଟି ପଦକ ଆଣିଥିବା ମହିଳା ସୁଟର ମନୁ ଭାକର ଏବଂ ରେସଲର ଅମାନ ସେରାୱତଙ୍କୁ ଦେଖିବାକୁ ମିଳିଛି । ଉଭୟ କେବସି ହଟସିଟରେ ଅମିତାଭ ବଚ୍ଚନଙ୍କ ସହ ବସିଥିବାର ନଜର ଆସିଛନ୍ତି । ଖୁବଶୀଘ୍ର ଏହି ଶୋ' ଏହି ଏପିସୋଡ ଲାଇଭ ପ୍ରସାରିତ ହେବ ।
କେବିସି 16 ର ସେଟରେ ମନୁ ଭାକର ଏବଂ ଅମନ ସେରାୱତଙ୍କୁ ଦେଖିବାକୁ ମିଳିଛି। ଅମାନ ଏକ ବ୍ଲାକ ସୁଟରେ ନଜର ଆସିଥିବା ବେଳେ ମନୁ ଭାକର ଶାଢୀ ସହ ଦେଶୀ ଲୁକରେ ନଜର ଆସିଛନ୍ତି । ମନୁ ଭାକର ବ୍ରୋଞ୍ଜ ପଦକ ସହ କେବିସି 16 ରେ ପହଞ୍ଚିଛନ୍ତି। ଏହା ସହ ଏହି ଏପିସୋଡ କେବେ ପ୍ରସାରିତ ହେବ ତାହା ମଧ୍ୟ ପ୍ରକାଶ କରାଯାଇଛି । ମନୁ ଭାକର ଏବଂ ଅମନ ସେରାୱତଙ୍କ ସହ ଏପିସୋଡ୍ 5 ସେପ୍ଟେମ୍ବର, ଗୁରୁ ଦିବସ ଅବସରରେ ପ୍ରସାରିତ ହେବାକୁ ଯାଉଛି ।
ଅଲିମ୍ପିକ୍ସ 2024ରେ ଇତିହାସ ରଚିଥିଲେ ମନୁ
ମନୁ ଭାକର ପ୍ୟାରିସ ଅଲିମ୍ପିକ୍ସ 2024ରେ ଇତିହାସ ରଚିଥିଲେ । ସେ ମହିଳା 10 ମିଟର ଏୟାର ପିସ୍ତଲ ଏକକ ଇଭେଣ୍ଟରେ ବ୍ରୋଞ୍ଜ ପଦକ ଜିତି ଦେଶକୁ ପ୍ୟାରିସରୁ ପ୍ରଥମ ମେଡାଲ ଦେଇଥିଲେ । ଏହାପରେ ସରବଜୋତ ସିଂହଙ୍କ ସହ ମିଶି ସେ 10 ମିଟର ଏୟାର ପିସ୍ତଲ ମିଶ୍ରିତ ବର୍ଗରେ ଦ୍ବିତୀୟ ବ୍ରୋଞ୍ଜ ମେଡାଲ ହାସଲ କରିଥିଲେ । ଏହା ସହିତ ଗୋଟିଏ ଅଲିମ୍ପିକ୍ସ ସଂସ୍କରଣରେ ଦୁଇଟି ପଦକ ଜିତିଥିବା ପ୍ରଥମ ଭାରତୀୟ ହେବାର ଗୌରବ ଅର୍ଜନ କରିଥିଲେ ମନୁ ଭାକର । ଏହାପରେ ପ୍ୟାରିସ ଅଲିମ୍ପିକ୍ସ 2024 ଉଦ୍ଯାପନୀ ସମାରୋହରେ ମନୁଙ୍କୁ ଭାରତୀୟ ଦଳର ଧ୍ବଜାବାହକ ଘୋଷଣା କରାଯାଇଥିଲା ।