ହାଇଦ୍ରାବାଦ:ସଞ୍ଜୟ ଲୀଲା ବଂଶାଲୀଙ୍କ ୱେବ ସିରିଜ 'ହୀରାମଣ୍ଡି' ସହ ଓଟିଟିରେ ଡେବ୍ୟୁ କରିଛନ୍ତି । ଏହି ସିରିଜ ନେଟଫ୍ଲିକ୍ସରେ ମେ ୧ ତାରିଖରେ ରିଲିଜ ହୋଇଥିଲା । ଏହା ରିଲିଜ ପରଠାରୁ ବେଶ ଚର୍ଚ୍ଚାରେ ରହିଥିବାବେଳେ ଏଥିରେ ଥିବା ସମସ୍ତ କାଷ୍ଟଙ୍କ ବେଶ ପ୍ରଶଂସା କରୁଛନ୍ତି ଦର୍ଶକ । ତେବେ ଏଥିରେ ମନୀଷା କୋରେଲା ମଲ୍ଲିକା ଜାନଙ୍କ ଚରିତ୍ରରେ ଅଭିନୟ କରିଛନ୍ତି । ତାଙ୍କୁ ଏଭଳି ଭିନ୍ନ ଚରିତ୍ରରେ ଦେଖି ଲୋକେ ତାଙ୍କ ଦିୱାନା ହୋଇଛନ୍ତି । କିନ୍ତୁ ଏହି ଚରିତ୍ର ପାଇଁ ନିର୍ମାତାଙ୍କ ପ୍ରଥମ ପସନ୍ଦ ନଥିଲେ ମନୀଷ । ଏହି ଚରିତ୍ର ପାଇଁ ମନୀଷାଙ୍କ ପୂର୍ବରୁ ବଲିଉଡ ଅଭିନେତ୍ରୀ ରେଖାଙ୍କୁ ଏହି ଅଫର କରାଯାଇଥିଲା । ଏକ ସାକ୍ଷାତକାରରେ ମନୀଷା କୋରେଲା ଏହା ସ୍ପଷ୍ଟ କରିଛନ୍ତି ।
ମନୀଷାଙ୍କ ପୂର୍ବରୁ ରେଖାଙ୍କୁ ମିଲିଥିଲା ଅଫର୍:
ମନୀଷା କହିଛନ୍ତି ଯେ, ପ୍ରଥମେ ରେଖାଙ୍କୁ ୧୮ରୁ ୨୦ ବର୍ଷ ପୂର୍ବେ ଏହି ଭୂମିକା ଅଫର ଦିଆଯାଇଥିଲା । ହେଲେ ସେ କୌଣସି କାରଣରୁ ଏହା କରିପାରିନଥିଲେ । ଏହାପରେ ସଂଜୟ ଲୀଲା ବଂଶାଲୀଙ୍କ ଶୋ’ରେ ମଲ୍ଲିକା ଜାନଙ୍କ ଭୂମିକାରେ ଅଭିନୟ ପାଇଁ ମନୀଷାଙ୍କୁ ଅଫର ହୋଇଥିଲା । ସେ ଏହି ଚରିତ୍ରରେ ଅଭିନୟ କରିବା ପରେ ରେଖା ତାଙ୍କୁ ଡାକି କହିଥିଲେ, ''ମୁଁ ପ୍ରାର୍ଥନା କରୁଥିଲି ଯଦି ମୁଁ ଏହି ଭୂମିକା ନକରିବି, ତେବେ ତୁମେ ଏହା କର ।'' ମୋର ପ୍ରାର୍ଥନା ସତ୍ୟ ହୋଇଛି । ଆପଣ ଆଶ୍ଚର୍ଯ୍ୟଜନକ ଭାବରେ ଏହା କରିଛନ୍ତି । ତୁମେ ଜୀବନରେ ବହୁତ କିଛି କରିଛ ଏବଂ ତୁମେ ଚରିତ୍ରରେ ମଜ୍ଜି ଯାଇଛ । ବହୁତ ଭଲ ଅଭିନୟ କରିଛ ।''
ମନିଷା କହିଛନ୍ତି, "ରେଖାଙ୍କ ପରି ଜଣେ ଭେଟେରାନ୍ କଳାକାରଙ୍କଠାରୁ ଆଶୀର୍ବାଦ ପାଇବା ମୋ ପାଇଁ ବହୁତ । ଏହା ଶୁଣି ମୋ ଆଖିରେ ଲୁହ ଆସିଗଲା । ରେଖା ଜଣେ ଦେବୀ । ମୁଁ ତାଙ୍କୁ ଭଲ ପାଏ । ସେ ବହୁତ ସୁନ୍ଦର ବ୍ୟକ୍ତି ।'' ସୂଚନା ଥାଉ କି, ଚଳଚ୍ଚିତ୍ର ନିର୍ଦ୍ଦେଶକ ସଞ୍ଜୟ ଲୀଲା ବଂଶାଲୀଙ୍କ ଏହି ସିରିଜ ସହ ମନୀଷା ୨୮ ବର୍ଷ ପରେ ତାଙ୍କ ସହ କାମ କରିଛନ୍ତି ।